ကျာ်ထဝ်၊ မေ ၃၀
တွဵုရးဍုၚ်မန် ပွိုၚ်ဍုၚ်ကျာ်ထဝ် ပ္ဍဲကွာန်ကအ်ထေန် ဂိတုမေ ၂၈ ၜိုတ်အခိၚ်လဒေါဝ်တ္ၚဲဂှ် ညးသၟတ်ၜါတၠ ဒးဒုၚ်ပန်ပှော်ရပ်ဒက်တုဲ ချိုတ်အာလဝ်မွဲတၠရောၚ် ဂွံတီကေတ် ဇရေၚ်ညးဒေသတံရ။
ညးသၟတ်ၜါတၠ ဂ္ဇအ်ဒၟံၚ် ပ္ဍဲဆေၚ်အရက်မွဲဆေၚ် ကွာန်ကအ်ထေန်ဂှ် အခိၚ်ဒပ်ကံၚ်ဇြဳပၞာန် လုပ်စိုပ်ရပ်ဒက်ဂှ် ဖေက်လကိုတ်တုဲ ညးသၟတ်ဂြိပ်တိတ်အာမွဲတၠ ဒးဒုၚ်ပန်လဝ်ဂှ်ရ ချိုတ်အာလဝ်ရ။
အခိၚ်ဒပ်ကံၚ်ဇြဳပၞာန် ပန်ပှော်ရပ်ဒက်ဂှ် ကိုဝ်တေန်နာၚ်ဝေန် ကော် ကိုဝ်ဖျူနာၚ် အာယုက် ၂၈ သၞာံ ဒၟံၚ်ကွာန်ကအ်ထေန် ဒးဒုၚ်ရပ်လဝ်တုဲ ညးမဒှ်သ္ကအ်ရဲ ဂၠိုက်ဂၠါဲဒၟံၚ်ယၟုဖိုဟ်ဂှ် ဒးချိုတ်အာလဝ် ပ္ဍဲဒၞါဲဒှ်ပရူဂှ်ရောၚ် ညးဒေသတံ ဟီုရ။
ပ္ဍဲချာန်နေဝ်ထလဳဂရာန် ရဲထံက်ဂလာန်ဒပ်ပၞာန်တံဂှ် ကိုဝ်တေန်နာၚ်ဝေန် ဒးဒုၚ်ပန်ရပ်ဒက်ဂှ်ဝွံ ဒှ်ကောန်ဒပ် KRF တုဲ ပ္ဍဲကဵုပရေၚ်ပန်ဂစိုတ် ဗိုလ်ဝေန်သဵု နူဒပ်မၚ်ပယျဵု BGF ကေုာံ သမ္ဘာညး ဗ္ဒါဲကွာန်ကအ်ထေန် သၞာံ ၂၀၂၃ ဂိတုအဝ်ဂါတ်ဂှ် ဒှ်ညးပံၚ်တောဲပါလုပ်လဝ်ရောၚ် စောဲစပ်လဝ်ရ။
ညးတာလျိုၚ် ဂကောံဇြဟတ်ပၠန်ဂတးကျာ်ထဝ် KRF မွဲတၠဂှ် ကောန်ဒပ်ညးတံ ဒးဒုၚ်ရပ်ဒက် ဟွံမွဲဂှ်ကီု၊ လၟေၚ်ဒဒှ်လၟုဟ်ဝွံ ဗဒှ်ကေတ်လဝ်ဏောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကိုဝ်တေန်နာၚ်ဝေန် ညးဒေသကွာန်ကွာန်ကအ်ထေန် ဒးဒုၚ်ပန်ပှော်ရပ်ဒက်လဝ်ဂှ် ကံၚ်ဇြဳပၞာန် ဖန်ဇန်ဒၟံၚ် သွက်ဂွံပံက်ဂဗုတ် နကဵုၝောံပိုဒ် သၞောဝ်ဗ္တိုက်သ္အးပွပကီုပရာပ် ကံၚ်ဇြဳပၞာန်ဂှ် ဂွံတီကေတ် ဇရေၚ်ညးမစုက်လုက်ကဵု ကံၚ်ဇြဳပၞာန်တံရ။
ပ္ဍဲပွိုၚ်ဍုၚ်ကျာ်ထဝ် ဒၞါဲဂကောံဇြဟတ်ပၠန်ဂတးတံ ချဳဒရာၚ်ဇြဟတ်ခိုဟ်ဂှ် နကဵုဟိုတ် ထံက်ပၚ် PDF ၊ ဒှ်ကောန်ဒပ် PDF တံဂှ် မွဲဏှမွဲဏှဟီုဂွံ ဒပ်ကံၚ်ဇြဳပၞာန် ရပ်ဒက်ဒၟံၚ် ညးဍုၚ်ကွာန်ဒေသတံ နွံဒၟံၚ်ရောၚ် ဂွံတီကေတ် ဇရေၚ်ညးဒေသတံရ။
ပရိုၚ်−သြၚ်လောန်တိုၚ်(မ်)
ဗီု−SAC Telegram