ကအ်ကြိက်၊ မေ ၃၀
တွဵုရးကရေၚ် ဍုၚ်ကအ်ကြိက် ပ္ဍဲအရာပ် စၟတ် (၄) ဂှ် ဟိုတ်နူလိုန်ဒးမာၚ်တိုပ်တိ မသှ်ေနူပေါဲဗ္တိုက်တံ ဗ္တိုဟ်ထ္ကးတုဲ ညးဗြဴမွဲတၠ ဇိုၚ်ပိုတ်အာဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ညးဗြဴအာယုက် ၅၀ သၞာံမွဲတၠ စဴကၠုၚ်ဌာန်ဒၟံၚ် ပ္ဍဲဂိတုမေ ၂၈ အခိၚ်လဒေါဝ်တ္ၚဲ ၜိုတ် ၂ နာဍဳဂှ်ဝွံ အခိၚ်စဲဒၟံၚ်ဂၠိက်ယာတ် ဗ္ဒါဲဇိုၚ်ဒပ်ကၠအ်ညးမံၚ်ဂှ် လိုန်ဒးလဝ်မာၚ်တိုပ်တိရ။
ဟိုတ်နူလိုန်ဒးမာၚ်တိုပ်တိတုဲ ညးဗြဴဒေသဂှ်ဝွံ ဇိုၚ်လ္ပာ်ပါဲပိုတ်အာတုဲ ဇိုၚ်လ္ပာ်ပုၚ်ဂှ်လေဝ် ကလိဂွံလဝ်ဝပ် ဂဒအ်ဗြာတ် စာ်ထောၚ်ဂှ် ဂွံတီကေတ်ရ။
ဟိုတ်နူမာၚ်တိုပ်တိဗ္တိုဟ်ထ္ကးတုဲ ညးဗြဴကလိဂွံလဝ်ဝပ်သ္ကာတ်မြဟ်ဂှ် နကဵုအရီုဗၚ်ညးဒေသတံဂှ် ပလံၚ်ဗစိုပ်ကဵုလဝ် ဇရေၚ်ရုၚ်ဂဥုဲညးဍုၚ်ကွာန်ကအ်ကြိက်တံဂှ် ဂွံတီကေတ်ရ။
တုဲကၠုၚ်ဂိတုမေ ၁၄ တေံဂှ်လေဝ် ပ္ဍဲအရာပ်ဝေန်ကျဳ စၟတ် ၂ ဍုၚ်ကအ်ကြိက်ဂှ် ဟိုတ်နူလွဟ်ဇၞော် သှ်ေနူပေါဲဗ္တိုက်တံ ဗ္တိုဟ်ထ္ကးအာတုဲ မၞိဟ်တြုံပါဲဘဲပၞာန် စဴကၠုၚ်ဌာန်ဒၟံၚ်မွဲတၠ ချိုတ်အာလဝ်ရ။
စနူဂိတုဒဳဇြေမ်ဗာသၞာံတုဲကၠုၚ်တေံတုဲ ဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA တံ လုပ်စိုပ်ဗ္တိုက်ထ္ပက်ပၞာန်ဂှ် ပေါဲဗ္တိုက် ကုဒပ်ကံၚ်ဇြဳပၞာန် သ္ကာတ်မြဟ်လဝ်တုဲ ပေါဲဗ္တိုက်ကဵုဂိတု က္တဵုဒှ်လဝ်ရ။
အပ္ဍဲပေါဲဗ္တိုက်ဂှ် ညးဍုၚ်ကွာန်ကောန်အရာပ် ချိုတ်အာ ၃၀ ပြၚ်နွံလဝ်တုဲ သ္ၚိဒၟံၚ် ဂၠိုၚ်ကဵုကၠံ ပၟတ်တူလီုအာလဝ်တုဲ ညးဍုၚ်ကွာန်ဒေသအလုံကွာန်မွဲ ဒးဂြိပ်ဒဴပါဲဒလေတ်လဝ်ရ။
လ္ပာ်ကံၚ်ဇြဳပၞာန် ကြဴနူကလေၚ်ထိၚ်ဂွံ ဍုၚ်ကအ်ကြိက် အပ္ဍဲဂိတုဨပရဴတေံတုဲဂှ် ညးဒေသလ္ၚဵု ကလေၚ်စဴမံၚ်အပ္ဍဲဍုၚ်ကီု၊ သ္အးဇ္ၚးသ္ၚိကၠအ်တုဲ ကလေၚ်တိတ်အာကီုတံ နွံဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−Social Media