ကျာ်ထဝ်၊ မေ ၃၁
တွဵုရးဍုၚ်မန် ပွိုၚ်ဍုၚ်ကျာ်ထဝ် ပ္ဍဲကွာန်မုခ်ပြေၚ် (မုပ္ပလၚ်) တၠဆေၚ်တာယာ (ဟဲဗီးဝိတ်) သ္ကဲဂၠံၚ်ကွဳစက် လ္ဂုၚ်−မတ်မလီုဂှ် ထံက်ပၚ်ဒၟံၚ်သြန် ဇရေၚ် PDF ဂးတုဲ ဒပ်ကံၚ်ဇြဳပၞာန် ကၠုၚ်စိုပ်ရပ်ဒက်ဏာလဝ်ရောၚ် ဂွံတီကေတ် ဇရေၚ်ညးမစုက်လုက်ကဵု ဂြောဝ်ဂတာညးရ။
တၠဆေၚ်တာယာ (ဟဲဗီးဝိတ်) ကိုဝ်အံၚ်လှမိုဝ် ကော် ကိုဝ်ကျဳဇြုၚ်ဂှ် တုဲကၠုၚ်ဂိတုမေ ၂၅ အခိၚ်လဒေါဝ်တ္ၚဲတေံ ဒပ်ကံၚ်ဇြဳပၞာန် ကၠုၚ်စိုပ်ရပ်ဒက်ဏာလဝ်ရ။
ကိုဝ်အံၚ်လှမိုဝ်ဝွံ နကဵုတၚ်စောဲစပ် ထံက်ပၚ်ကဵုလဝ် ဇရေၚ်ဂကောံဒပ်စဵုဒၞါညးဍုၚ်ကွာန်မုခ်ပြေၚ် (မုပ္ပလၚ်) PDF သြန် ၅ ကိုဋ်ဘာ် ၜါဝါတုဲ လ္ပာ်ကံၚ်ဇြဳပၞာန် ရပ်ဒက်လဝ်ရ။
ကိုဝ်အံၚ်လှမိုဝ် ဒးဒုၚ်ရပ်ဒက်လဝ်ဂှ် ကံၚ်ဇြဳပၞာန် ရပ်ချုက်လဝ် ပ္ဍဲဗ္ဒိုပ်ဗၠာဲသၟိၚ်ၝောံဍုၚ်ကျာ်ထဝ်တုဲ ပံက်လဝ်ဂဗုတ် နကဵုသၞောဝ်ဗ္တိုက်သ္အးပွပကီုပရာပ် ၝောံပိုဒ် ၅၀ ညဂှ် ဂွံတီကေတ်ရ။
အတိုၚ်ၝောံပိုဒ် ၅၀ ည ကံၚ်ဇြဳပၞာန် ပံက်လဝ်ဂဗုတ်ဂှ်မ္ဂး ကိုဝ်အံၚ်လှမိုဝ်ဝွံ ယဝ်ရဒုဟ်ဒဏ်ပြာကတ်မ္ဂး ဒဏ်သၠုၚ်အိုတ် ဒဏ်ထံၚ်မွဲအာယုက် ဟွံသေၚ်မ္ဂး ဒဏ်ထံၚ် စဵုကဵု ၂၀ သၞာံ ဒးဒုၚ်ဖျေံစၟတ်မာန်ရ။
အတိုၚ်လိက်ဒုၚ်စဳရေၚ် ဇြဟတ်ရာမညဖေဝ်ဒရာခေတ်တၟိ NRFF ပၞာန်သီအဝဵုပေၚ်ပိသၞာံဂှ်မ္ဂး ပ္ဍဲတွဵုရးဍုၚ်မန် ညးဍုၚ်ကွာန်ကောန်အရာပ် ဟွံအောန်နူကဵု ၉၀၀ ဒးဒုၚ်ရပ်လဝ်ရောၚ် တုဲကၠုၚ်ဂိတုဖေဖဝ်ဝါရဳ ၁ တေံ လလောၚ်ပ္တိတ်လဝ်ရ။
ပရိုၚ်−-သြၚ်လောန်တိုၚ်(မ်)
ဗီု−-SBM