ဝဝ်၊ မေ ၃၁
ရးဗဂေါ ပွိုၚ်ဍုၚ်ဝဝ် ပ္ဍဲကွာန်ဂမၠိုၚ်တံဂှ် ဒပ်ကံၚ်ဇြဳပၞာန် သွက်ဂွံယိုက်ဂၠေၚ်လျိုၚ်ပၞာန်ဂးတုဲ ဗက်ရပ်ဒက်ဒၟံၚ် ညးသၟတ်ဒေသတံဂှ်ရ ညးသၟတ် ဟွံအောန်နူကဵု ၂၀ တၠ ဒးဒုၚ်ရပ်လဝ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဒပ်ကံၚ်ဇြဳပၞာန် ဇြဟတ် ၅၀ ပြၚ်ဂှ်ဝွံ နူဂိတုမေ ၂၉ ပယျာံဂယး စဵုကဵုဇိုၚ်သဝ်တ္ၚဲဂှ် ဗက်ရပ်ဒက်ဒၟံၚ်ညးသၟတ်ဒေသ ပွိုၚ်ဍုၚ်ဝဝ် နူကဵုကွာန်ကျာလဟာ၊ ယှာန်သု၊ အေဆာန်၊ ဖယျာပျဵု၊ ဇြိုၚ်တဳသု ကေုာံ ကွာန်ညံၚ်ကိုၚ်တံဂှ်ရ။
အတိုၚ်ဂလာန် ညးဒေသတံဂှ်မ္ဂး ဒပ်ကံၚ်ဇြဳပၞာန်ဝွံ ညးသၟတ် ပါလုပ်ဒၟံၚ် ပ္ဍဲစရၚ်ယိုက်ဂၠေၚ်လျိုၚ်ပၞာန်တံဂှ် စကာဇြဟတ်တုဲ တိုန်မွဲသ္ၚိစှ်ေမွဲသ္ၚိ ရပ်ဒက်ဏာတုဲဂှ် ကော်ဏာလဝ် ဇရေၚ်တမ်ဒပ်ဖျေံသ္ဇိုၚ်ကံၚ်ဇြဳပၞာန် မၞုံဍုၚ်ဝဝ်ဂှ်ရောၚ် ဂွံတီကေတ်ရ။
ပ္ဍဲအရာရပ်ဒက် ညးသၟတ်ဒေသတံဂှ် ဒပ်ကံၚ်ဇြဳပၞာန် ကဵုကေတ်ဂၠိက်ယာတ်ၜါစုမ်၊ တၞးကာဒ်ကောန်ဍုၚ် ကေုာံ စရၚ်သ္ၚိကၟိန်တုဲ ကော်ဏာမွဲတဲဓဝ်ဂှ် ညးဒေသညံၚ်ကိုၚ်မွဲတၠ ဟီုရ။
ဟိုတ်နူဒပ်ကံၚ်ဇြဳပၞာန် ဗက်ရပ်ဒက်ဒၟံၚ်တုဲ ညးသၟတ် စရၚ်ပါဒၟံၚ် သ္ဂောံလုပ်ပၞာန် ဗွဲမဂၠိုၚ်ဂှ် ဂြိပ်ပါဲဒလေတ်ဒၟံၚ်အိုတ်ဂှ် ဂွံတီကေတ် အတိုၚ်ဂလာန်ညးဒေသတံရ။
သွက်တန်ဗ္တောန်ကွတ်ပၞာန်လၟေၚ် ၂ ဂှ် နူဍုၚ်ဝဝ်ဂှ် စၟတ်လဝ် သွက်ဂွံကဵုတန်ဗ္တောန်ကွတ်ပၞာန် ကုညးသၟတ် ၅၀ တၠ ကီုလေဝ် ဟိုတ်နူလၟိဟ်ၜိုတ်ကေတ် ဟွံပေၚ်တုဲ ဒးဒုၚ်ရပ်လဝ်သာ်ဏံရောၚ် ညးမစုက်လုက်ကဵု ကံၚ်ဇြဳပၞာန်တံ လဴထ္ၜးလဝ်ရ။
အတိုၚ်လိက်ဒုၚ်စဳရေၚ် ဂကောံလ္ၚတ်ပဋိပက္ခ ကေုာံ ကေၚ်ကာဗၟာ BACS ဂှ်မ္ဂး ကံၚ်ဇြဳပၞာန်ဝွံ သွက်တန်ဗ္တောန်ကွတ်ပၞာန် လၟေၚ် (၂) ဂှ် နူအလုံဍုၚ်မွဲ ညးသၟတ် ၉၀၀ ပြၚ် နူကဵု ၂၀ ပွိုၚ်ဍုၚ်ဂှ် ရပ်ဒက်အတေၚ်အဓမ္မတုဲ ပလံၚ်ဗစိုပ်လဝ် တန်ဗ္တောန်ကွတ်ပၞာန်ရောၚ် လလောၚ်ပ္တိတ်လဝ်ရ။
ပရိုၚ်−-သြၚ်လောန်တိုၚ်(မ်)
ဗီု−-SAC Telegram