ၜၚ်ကံက်၊ ဂျောန် ၁၀
နူရုၚ်သၞောဝ်ဓဝ်သၞောဝ်သ္ဇိုၚ်ဒက်ပ္တန် အခေါၚ်ပလီုဗော်ညးတံဟွံမွဲပုဟ်ဂှ် Move Forward Party ဟီုလဝ်တုဲ တၚ်သ္ဂုတ်သွာတ်ရုၚ်သၞောဝ်ဓဝ်ကၠာတေံ သွက်တၚ်ဒတူလိုၚ်ဗော် မဆက်စပ်ကဵုဂဗုတ်ဖ္ဍိုက်ဂရိုက် နန်ဨကရာဇ်ဂှ်ဝွံ ဟွံဆက်စပ်ကဵု ပရေၚ်ပလီုဗော် မက္တဵုဒှ်ဒၟံၚ်လၟုဟ်ဂှ်ပုဟ်ဂှ် သ္ဂးရ။
ဖဳထာ လေန်ဂျာရိုဝ်အာန်ရာတ် မဒှ်က္ဍိုပ်သ္ကိုပ်တြေံ ဂအုပ်ညးကဵုကသပ် ဗော် MFP ဂှ် ဂကောံပရေၚ်ဂဗုတ် ညးကဵု ဗော်ညးဂှ်ဝွံ လ္ၚတ်လဝ် သၞောဝ်သ္ဇိုၚ်ဒက်ပ္တန်ဂှ်တုဲ ၝောံပိုဒ်သၞောဝ်ဥပဒေ ကဵုလဝ်အခေါၚ်ပလီု ဗော်ပရေၚ်ဍုၚ်ကွာန်မွဲမွဲ ဟွံသေၚ်မ္ဂး ကဵုလဝ်အခေါၚ်ရုပ်သီ အခေါၚ်အရာစပ်ကဵုပရေၚ်ဍုၚ်ကွာန်ဗော်တံဂှ် ဟွံဂွံဆဵုကေတ်ပုဟ်ဂှ် ဂိတုဂျောန် ၉ တေံ ဟီုလဝ် ပ္ဍဲဌာန်ဂအုပ်ဗော်ဂှ်ရ။
စပ်ကဵုဂဗုတ် ကဵုပလီုလဝ်ဗော်ဂှ်တုဲ နကဵုဗော်ညး ဟွံဂွံလဝ် တၚ်နၚ်ပရိုၚ် ရုမ်မ်ဂပ်ပ်ပုဟ်တုဲ သွက်တၚ်နၚ် မစောဲစပ်လဝ် လ္တူဗော်ညးတံဂှ် အခေါၚ်အရာသ္ဂောံကယျာန်ပါဲလေဝ် ဟွံမွဲဒၟံၚ်ပုဟ်ဂှ် ဖဳထာ ညးဇၞော်ကဵုကသပ်ဂှ် ဟီုရ။
တၚ်သ္ဂုတ်သွာတ် ရုၚ်သၞောဝ်ဓဝ် ပ္ဍဲဂိတုဂျာန္နဝါရဳ ၃၁ ဂှ်ဝွံ ဟွံဆက်စပ်ကဵုဂဗုတ် မဒးဆေၚ်ဒၟံၚ်မုက် လၟုဟ်ဏံပုဟ်ဂှ်လေဝ် ဖဳထာ ဟီုတဴရ။
ပွမပ္တိတ်ဇြဟတ် သ္ဂောံပလေဝ် သၞောဝ်ဖ္ဍိုက်ဂရိုက် နန်ဨကရာဇ် ၝောံပိုဒ် ၁၁၂ ဂှ် နကဵုဗော် MFP ဒးဒေါအ်ဒေၚ်အာဏောၚ် ပ္ဍဲဂိတုဂျာန္နဝါရဳ ၃၁ တေံ ရုၚ်သၞောဝ်ဓဝ် သၞောဝ်သ္ဇိုၚ်ဒက်ပ္တန် သ္ဂုတ်သွာတ်လဝ်ရ။
တၚ်ကဵုသတိဏံဝွံ ဆက်စပ်ဒၟံၚ်ကဵု ကိစ္စဟွံဂွံက္တဵုဒှ်ဏီဂှ်လေဝ် ဖဳထာ ဟီုလဝ်ရ။
သွက်ဂွံစဵုဒၞါဒဳမဝ်ကရေဇြဳရဟေၚ် ထေက်ကဵုဒးပလီု ဗော်ပရေၚ်ဍုၚ်ကွာန်တံဂှ်တုဲ သွက်ဂွံဗ္တိုက်သရိုဟ် ပြသၞာပၟိက်ဇၞော် ဟွံမွဲကဵုတၚ်သောၚ်ကလးတၞဟ်ဟ်တံဓဝ်ဂှ် ကဵုပလီုကၠေံဗော် ကၠောန်ဟွံထေက်ပုဟ်ဂှ် ဖဳထာ ဟီုရ။
ပွမပ္တိတ်ဇြဟတ် သွက်ဂွံပလေဝ် ၝောံပိုဒ် ၁၁၂ ဂှ်ဝွံ ဓမ္မတာမ္ဂး ဒးပ္တိုန်ဂလာန် ကုကၠတ်ထဝ်ဏောၚ်ကီုလေဝ် ဂလာန်ပ္တိုန်သာ်ဏံတံဂှ် ဟွံစိုပ်ကၠတ်ထဝ်ဏီပုဟ်ဂှ် ဖဳထာ ဟီုရ။
ဂလာန်ပ္တိုန်တံဏံ ၜိုန်စိုပ်ကၠုၚ် ပ္ဍဲကၠတ်ထဝ်ကီုလေဝ် နကဵုဟိုတ် ဒးစဵုဒၞါ သၞောတ်နန်ဨကရာဇ် စပ်ကဵုပရေၚ်အုပ်ဓုပ်ဒက်ပ္တန်တံဂှ်တုဲ ကၠတ်ထဝ် တးပါဲဖျေံမာန်ဒၟံၚ်ဏီရ။
ဟိုတ်ဂှ်ရ ဟွံဒးကဵုပလီုကၠေံဗော်ပုဟ်ဂှ် ဖဳထာ က္ဍိုပ်သ္ကိုပ်တြေံ ဗော် MFP ဂှ် ဟီုလဝ်ရ။
Ref: Bangkokpost