ထဝ်ပိတၠၚ်၊ ဂျောန် ၆
ကောန်ဍုၚ်မဝ်ရိုဝ်ကိုဝ် Youtuber မွဲတၠ သွက်ဂွံထ္မံက်ပရူကောန်ဍုၚ်မဝ်ရိုဝ်ကိုဝ် ဒးဒုၚ်တံၚ်ရပ်လဝ် ပ္ဍဲတွဵုဒၞက်ဍုၚ်ဗၟာ ဒေသထဝ်ပိတၠၚ်ဂှ်တုဲ မအာစိုပ်လဝ်ဂှ်ဝွံ ဒဒှ်ရကၠေံဒၟံၚ် တၟေၚ်ၚ်တၟဟ်ဟ်ဂှ် ဂွံတီကေတ်ရ။
ကောန်ဍုၚ်မဝ်ရိုဝ်ကိုဝ် အဒါမ် ဒဝ်ဝှေတ် မၞိဟ်တီဂၠိုၚ် နဒဒှ် New Battuta ဂှ်ဝွံ ဂိတုမေ ၂၃ ဂှ် ဂွံလဝ်အဆက် ကုဂြောဝ်ဂတာညး လက္ကရဴအိုတ်ရ။ အခိၚ်ဂှ် ညးဝွံ စိုပ်ဒၟံၚ်ဍုၚ်ဗဳယေတ်နာမ်တုဲ စဳဇန်ဒၟံၚ် သွက်ဂွံအာ ဍုၚ်လာအိုဝ်ရောၚ် ဒဒှ်ရဟီုလဝ်ဂှ် ထ္မံက်ထ္ၜးလဝ် ပ္ဍဲဝါပ်သာ်ပရိုၚ်မဝ်ရိုဝ်ကိုဝ် Hespress ရ။
ညးဝွံ ဇၟာပ်အခိၚ်အာတရဴ လေပ်ကေတ်တဴအဆက် ကဵုဂြောဝ်ဂတာညးလၟိုန်တုဲ လၟုဟ် ဟွံဂွံအဆက် ကုညးရတုဲ ဒှ်ဒၟံၚ်အကာဲအရာ သ္ဇက်ဒးဂွိၚ်ရောၚ် ထ္မံက်ထ္ၜးလဝ် ပ္ဍဲပရိုၚ်ဂှ်ရ။
Youtuber ကောန်ဍုၚ်မဝ်ရိုဝ်ကိုဝ်မွဲတၠပၠန် မဗက်အာ ကရောံဒဝ်ဝှေတ် မၞုံယၟု အာမ်ဂျက် ရာမဳဂှ် အခိၚ်ဒဝ်ဝှေတ် နွံဒၟံၚ်ပ္ဍဲဗဳယေတ်နာမ်တေံ ဒဒှ်ရစဳဇန်လဝ် သွက်ဂွံအာဒေသထဝ်ပိတၠၚ်ဂှ် ဟီုလဴလဝ်ကဵု ညးရောၚ် သ္ဂးရ။
ဒၞါဲဒေသထဝ်ပိတၠၚ် ပယျဵုသေံ၊လာအိုဝ်၊ ဗၟာ ဒၞါဲဂကောံရပ်လွဟ်တံ ချဳဒရာၚ်ဒၟံၚ်ဂှ် ကောန်ဍုၚ်သ္အာၚ်ဂမၠိုၚ် အာစိုပ်မ္ဂး စၟတ်တဲကၠောံဍုၚ်ညးတံ ဒးဒုၚ်သီစလေပ်ရ။
ပ္ဍဲဒေသထဝ်ပိတၠၚ်ဂှ် ကောန်ဍုၚ်မဝ်ရိုဝ်ကိုဝ် ဗၞတ် ၁၄၀ ဝွံ ဂွံကလောန်ခိုဟ်ဟ်ဏောၚ်ဂးတုဲ ဒးဒုၚ်လီဠာန်တုဲ ဆန္ဒဟွံပါမွဲသာ် ဒးကၠောန်ဒၟံၚ်ကလောန် ပ္ဍဲဂိုဏ်လီဠာန်လပှ်ကျာအိုတ်ရောၚ်ဂှ် စှ်ေစိုတ်ရ။
ကောန်ကလောန်သာ်ဏံတံဂှ်ဝွံ အတိုၚ်စကာ ဟွံကၠောန်မ္ဂး ဒးဒုၚ်ပျဲပျာံတုဲ ဂွံကလေၚ်ဗၠးမာန် မွဲတၠဂှ် ဒးကဵုဒၟံၚ် အမေရိကာန်ဒဝ်ဠာ ၁၀၀၀၀ ရောၚ် သ္ဂးရ။
သၟိၚ်တၠအဝဵု မဝ်ရိုဝ်ကိုဝ်တံဂှ် ဂၠိုက်ဂၠါဲစၟဳတ်ဒၟံၚ် ကိစ္စဏံတုဲ ဆဵုဂဗသၟာန်သၟုက်ဒၟံၚ်ကဵု ညးကလေၚ်ဗၠးကၠုၚ်တံကဵု ဂြောဝ်ဂတာ ညးမဒဒုၚ်တံၚ်ရပ်လဝ်တံရ။
သွက်ဂွံစွံသတိ စပ်ကဵုအန္တရာယ် ရဲသွံရာန်မၞိဟ်တံ မဟီုဂးကၠုၚ် ဂွံကလောန်ခိုဟ်ဟ် နကဵုပွမလီဠာန်လ္တူလပှ်ကျာဂှ် အလဵုအသဳ ဖ္တိုက်ဖ္အောဝ်လဝ် ကောန်ဍုၚ်မဝ်ရိုဝ်ကိုဝ်ဂမၠိုၚ်ရ။
Ref: The News Arab