ၜၚ်ကံက်၊ ဂျောန် ၁၈
သွက်ဂွံကဵုအခေါၚ်ညးလိၚ်တုပ်တံ သ္ပမ္ၚဵုထပ်တဲတံဂှ်တုဲ ပ္ဍဲဂိတုဂျောန် ၁၈ တေံ အမာတ်ကၠတ်ထဝ်သေံတံ ပါ်မာဲသ္ဂုတ်သွာတ်လဝ်ဂှ်ရ ပ္ဍဲအာယှဒိုဟ်အဂၞဲဏံ ဍုၚ်သေံဝွံ ဒှ်ကၠုၚ်ဍုၚ်ကဵုအခေါၚ်ညးလိၚ်တုပ်တံ သ္ပမ္ၚဵုထပ် ပထမကၠာအိုတ်ရ။
သၞောဝ်ဏံဂှ် နူကၠတ်ထဝ်လ္တူ ကဵုအာအခေါၚ်ဏောၚ် ဂွံစၟဳကေတ်တုဲ ကြဴနူဂွံတၚ်တုပ်စိုတ်ကၠတ်ထဝ်တုဲ ဒးကေတ်အာအခေါၚ် နူဨကရာဇ်ဏောၚ်ဂှ် ဌာန်ပရိုၚ်နန်ဨကရာဇ် ထ္မံက်ထ္ၜးလဝ်ရ။ ကြဴနူဂှ်တုဲ အပ္ဍဲပွိုၚ် ၁၂၀ တ္ၚဲဂှ် သၞောဝ်ဏံ လမျီုလုပ်အာရဏောၚ် မဒှ်ရ။
ဍုၚ်သေံဝွံ ကြဴနူထိုၚ်ဝါန် ကဵု နဳပဝ်တုဲမ္ဂး ပ္ဍဲအာယှဏံ ဒှ်ကၠုၚ်ဍုၚ်မရနုက်ကဵုတတိယ ကဵုအခေါၚ်သ္ပမ္ၚဵုထပ်တဲ လိၚ်တုပ်တံဂှ်ရ။
စနူဂိတုအံက်တဝ်ဗာကၠုၚ်စိုပ်ဏံတုဲ ညးသ္ဍိုက်မၠိုက်လိၚ်တုပ်တံ သ္ပအာမ္ၚဵုထပ်တဲ ဗွဲမလုပ်သၞောဝ်မာန်ရဏောၚ်ဂှ် ညးချဳဒရာၚ်ဂမၠိုၚ် ဟီုရ။
ပ္ဍဲကဵုသၞောဝ် စပ်ကဵုသ္ပမ္ၚဵုထပ်တဲ သၞောဝ်တၟိဏံဂှ် နူကဵုမအရေဝ် မၞိဟ်တြုံ၊ မၞိဟ်ဗြဴ၊ သမ္ဘာ၊ တၠသ္ၚိတံဂှ် ပြံၚ်လှာဲရပ်စပ်လဝ် နဒဒှ်လိၚ် (တြုံ၊ ဗြဴ) ကေုာံ ညးမံၚ်အကြာတံရ။
နကဵုညးသ္ပလဝ်မ္ၚဵုထပ်တဲ လိၚ်တုပ်ဂမၠိုၚ် ညံၚ်ရဴတောဲဆော ဓမ္မတာတံကီု အခေါၚ်လွဳစကောန်ၚာ်၊ အခေါၚ်ဒုၚ်စအာဲကၟာဲတံဂှ် ကလိဂွံအာ ဗွဲမလုပ်သၞောဝ်ဏောၚ် မဒှ်ရ။
ပ္ဍဲလဒေါဝ်ဍုၚ် ဍုၚ်ၜၚ်ကံက်ဂှ် ညးချဳဒရာၚ်ကတိုၚ်ကၟဟ် စပ်ကဵုအခေါၚ်သ္ပမ္ၚဵုထပ်တဲလိၚ်တုပ်ဂမၠိုၚ် သွက်ဂွံကောံကလောံဗဒှ်သဘၚ်ပေါဲအံၚ်ဇၞးဂှ် ဒဒှ်ရစဳဇန်လဝ်ရောၚ် ဂွံတီကေတ်ရ။
ဍုၚ်သေံဝွံ ပ္ဍဲအရာအေၚ်ဒုၚ် လ္တူဗွိုၚ်ညးမသ္ဍိုက်ဆာန်လိၚ်တုပ်ရေၚ်သ္ကအ်တံဂှ် ဒယှ်ဒၟံၚ်လအ်ကၠုၚ်ယျတုဲ ညးဍုၚ်ကွာန်ဗွဲမဂၠိုၚ်လေဝ် ဒဒှ်ရထံက်ဂလာန် အခေါၚ်သ္ပမ္ၚဵုထပ်တဲလိၚ်တုပ်တံဂှ် တၚ်နၚ်ကံက်ကပှ်လဝ်ဂမၠိုၚ် ထ္မံက်ထ္ၜးဒၟံၚ်ရ။
သၞာံ ၂၀၀၁ တေံ ဍုၚ်နေဝ်တာလာန် ကဵုထောံအခေါၚ်ညးလိၚ်တုပ်တံ သ္ပမ္ၚဵုထပ်တဲ အလန်ကိုပ်ကၠာအိုတ်တုဲ ကြဴနူဂှ်တုဲ လ္တူဂၠးတိဏံ ၃၀ ဍုၚ်ပြၚ် ကဵုလဝ်အခေါၚ်ညးလိၚ်တုပ်တံ သ္ပမ္ၚဵုထပ်တဲရ။
ပ္ဍဲအာယှဏံ ထိုၚ်ဝါန်ကဵု နဳပဝ် ၜါဍုၚ်ရဟေၚ် ကဵုလဝ်အခေါၚ်ညးလိၚ်တုပ်တံ သ္ပမ္ၚဵုထပ်တဲတုဲ အိန္ဒိယဂှ်တှ်ေ အပ္ဍဲဂိတုအံက်တဝ်ဗာသၞာံတုဲကၠုၚ်တေံ ဂွံကဵုအခေါၚ် ကြပ်ကၠုၚ်ကီုလေဝ် ဂအုပ်ရုၚ်သၞောဝ်ဓဝ်ဂှ် နူကၠတ်ထဝ်မွဲကဆံၚ် သွက်ဂွံသ္ဂုတ်သွာတ်ဂးတုဲ ကလေၚ်လှဲကဵုလဝ်ရ။
Ref: AFP