ဒုသမ္မတဖဳလေတ်ဖေန် သာရာဒူတာတေဝွံ အခိၚ်မဟာမိတ်ညးထ္ကးပြးဒၟံၚ်ဂှ် နုက်တိတ်လဝ် နူဂကောံဝန်ဇၞော်မာကောသ်ရ။
ဒုသမ္မတ သာရာဒူတာတေဝွံ ပ္ဍဲဂိတုဂျောန် ၁၉ တေံ နုက်တိတ်လဝ် နူကဵုဂကောံအလဵုအသဳ သမ္မတ ဝှာဒဳနာန်မာကောသ်ဂျူနဳယျာ ကေုာံ နူကဵုကဆံၚ်ဒၞါဲအဓိကတၞဟ်ဟ်တံရ။
ပရေၚ်ဆက်ဆောံ ကြံၚ်မ္ၚိုဟ်ဒၟံၚ် အကြာဂြောဝ်ဂတာ ဒူတာတေကဵု မာကောသ်တံၜါဂှ်ဝွံ တုဲကၠုၚ်ခြာဟွံလအ်ဏံ ပ္တဝ်ကၠုၚ်က္ဍိုပ် လ္ပာ်ထ္ကးပြးတုဲ ပရေၚ်နုက်တိတ် သာ်ဏံ က္တဵုဒှ်လဝ်ရ။
နကဵုဒူတာတေ နူကဵုဝန်ဇၞော်ပရေၚ်ပညာ ညးကေတ်လဝ်တာလျိုၚ်ဂှ်သၟးဟွံက သီုကဵုကဆံၚ်ဒၞါဲဒုဥက္ကဌ ဂကောံဗ္တိုက်သရိုဟ်ပွပကီုပရာပ်ဂှ်လေဝ် နုက်တိတ်လဝ်တုဲ လိက်နုက်တိတ်ဂှ်လေဝ် ဒဒှ်ရမာကောသ် ဒုၚ်လဝ်တဲယျဂှ် ဝန်အပ္ဍဲပရေၚ်ဆက်စၠောံ ရုၚ်သမ္မတ Cheloy Garafil သ္ပဒတန်ဟီုလဝ်ရ။
ဟိုတ်ဂွံနုက်တိတ် နူကဵုကဆံၚ်ဒၞါဲညး သာ်ဏံဂှ်လေဝ် ကဵုလဝ်ဟိုတ် ဟွံမွဲဂှ် မာကောသ် ဟီုလဝ်ရ။
သာရာဒူတာတေ ဆက်နွံဒၟံၚ် နဒဒှ်ဒုသမ္မတဂှ် ညးနုက်တိတ်ဂှ်ဝွံ ဟိုတ်နူတၚ်ဍိုန်လျညးဟွံသေၚ်တုဲ သွက်အ္စာဘာ ကေုာံ ညးသၟတ်တံဂှ် ပွဂွိၚ်ဂွါဲတံ နွံဒၟံၚ်ဍာံဍာံဂှ်ရ ဒးကၠောန်လဝ်သာ်ဏံရောၚ် ဟီုလဝ် ပ္ဍဲပေါဲသောၚ်ကလးလိက်ပရိုၚ်ရ။
ပွမဒက်မိတ် အကြာဂြောဝ်ဂတာညးတံတုဲ မာကောသ် ကေုာံ သာရာဒူတာတေ ကလိဂွံလဝ်အဝဵု ပ္ဍဲသၞာံ ၂၀၂၂ တေံဂှ်ဝွံ အခိၚ်လၟုဟ် ဟိုတ်နူမူဝါဒ ကေုာံ ပရေၚ်ဍုၚ်ကွာန် လညာတ်ဟွံတုပ်တံဂှ်တုဲ မဟာမိတ်ညးတံ ဒဒှ်ရလီုအာရဏောၚ်ဂှ်လေဝ် ညးခါတ်အကာဲပရေၚ်ဍုၚ်ကွာန်တံ တော်ဆလဝ်ရ။
“ ဒှ်အခိၚ်ဒေါအ်ဇူ ပိုယ်တံသီုညးဖအိုတ် မ္ဒးမၚ်စၟဳဒၟံၚ်ဂှ်ရ” သာ်ဝွံ ပါမောက္ခ သိပ္ပံပရေၚ်ဍုၚ်ကွာန် နူတက္ကသိုလ်ဖဳလေတ်ဖေန် Jean Encinas-Franco ဟီုလဝ်ရ။ ဂလာန်သာ်ဏံဂှ်ဝွံ ဒဒှ်ရထံက်လဝ်ဂလာန် ကုပရေၚ်ဒုသမ္မတ နုက်တိတ်နူဂကောံအလဵုအသဳဂှ်လေဝ် မဒှ်ရ။
Ref: Reuters