လာန်ဒါန်၊ ဂျောန် ၂၆
ကၠာသ္ကိုပ်ဝန်ဇၞော်ဗျိတိၚ် ရဳယှဳသူနက် ဂွိုအ်လလောၚ်တြး တ္ၚဲကၠောန်ဗဒှ်ပေါဲရုဲမာဲဂှ်ဏီ ၜိုတ်မွဲၜါသတ္တာဟဂှ် ဒဒှ်ရလံၚ်လဝ် စပ်ကဵုတ္ၚဲကၠောန်ဗဒှ်အာပေါဲရုဲမာဲဂှ် ဝန်ဇၞော်ကောန်သာဗေတေဗ် ဂကောံအလဵုအသဳဂှ်မွဲတၠ ဒုၚ်လဝ်ဝန်ရ။
ဝန်ဇၞော်သကတ်တလာန် အလဳသာ ဂျက်ဂှ် အပ္ဍဲဂိတုမာတ်တုဲကၠုၚ်တေံ ဒဒှ်မလံၚ်လဝ်ဂှ် ကျအာၜါဝါတုဲ တ္ၚဲကၠောန်ဗဒှ်ပေါဲရုဲမာဲဂှ်ဝွံ ဒတုံအကြာဂိတုဂျူလာၚ်ကဵု ဂိတုသေပ်တေမ်ဗာဏောၚ်ဂှ် လံၚ်လဝ်ပ္ဍဲဂိတုဨပရဴတေံ ဒးအာလဝ်ရောၚ် ဟီုရ။
ကြဴနူယိုက်တာလျိုၚ် ပ္ဍဲကၠတ်ထဝ် ပွိုၚ် ၇ သၞာံတုဲဂှ် ဝန်ဇၞော်အလဵုအသဳ ဂျက် ဟွံလုပ်ပြိုၚ်ပေါဲရုဲမာဲရဂှ် နကဵုညး မုသၞောဝ်မှ ဟွံဖံက်ပ္ကဝ်လဝ်ပုဟ်ဂှ် ဟီုရ။
ညးဝွံ ပ္ဍဲကဵုဝေၚ်လံၚ်လဝ်ဂမၠိုၚ် မွဲဂှ်တှ်ေ ဂွံဇၞးလဝ် သြန်သတာလေန် ၂၁၀၀ ပံၚ်ရောၚ် ကၠာတေံဟီုလဝ်ကီုလေဝ် ဗွဲကြဴဏံ ခဍုတ်ခမက်တုဲ ဟီုလဝ်ရောၚ် ကလေၚ်ဟီုလဝ်ရ။
ပ္ဍဲကဵုဟီုလဝ် ဂိတုဂျောန် ၂၅ ဂှ် ဝန်ဇၞော် ဂျက်ဂှ် ညးဝွံ လံၚ်လဝ် သြန်သတာလေန် ၂၀ ပံၚ်တုဲ ဂွံဇၞးလဝ် ၁၂၀ ပံၚ်ရောၚ် ဒုၚ်လဝ်ဝန်ရ။
တုဲကၠုၚ်ဂိတုမေ ကဵု ဂိတုဂျောန်တေံ ကၠောန်ဗဒှ်ပေါဲရုဲမာဲဏောၚ်ဂးတုဲ ပ္ဍဲဂိတုမာတ်ဂှ် လံၚ်လဝ် သတာလေန် ၅ ပံၚ် ၜါအလန်ရောၚ် ညးဟီုလဝ်ရ။
သ္ကိုပ်ဝန်ဇၞော် သောန်နက်ဂှ် ကၠောန်ဗဒှ်ပေါဲရုဲမာဲဏောၚ် ပ္ဍဲဂိတုမေ ၂၂ တေံ ဟွံထေၚ်ခယျမွဲသာ် လလောၚ်တြးလဝ်ရ။
ကၠာဂွိုအ်လလောၚ်တြး တ္ၚဲကၠောန်ဗဒှ်ပေါဲရုဲမာဲဂှ်ဏီ နကဵုညး ဟွံတီလဝ် တ္ၚဲဂှ်ပုဟ်ဂှ် ဝန်ဇၞော်ဂျက်ဂှ် ဟီုရ။
ညးဝွံ အပ္ဍဲအာယုက်သ္ကိုပ်ဝန်ဇၞော် ဗဝ်ရေတ်ဂျောန်သေန်၊ လေဿထရာဇ်၊ ရဳယှဳသူနက်တံဂှ် နူစသၞာံ ၂၀၁၉ တေံဂှ် ဒှ်ညးသ္ပကၠုၚ်လဝ်စၞး သကတ်တလာန် ပ္ဍဲကဵုဂကောံဝန်ဇၞော်ဗျိတိၚ်ရ။
ကမ္မယှေန်ဝေၚ်လံၚ်ၛၚ်ဂှ်တှ်ေ ညးမပါလုပ်ဒၟံၚ် ပ္ဍဲဂဗုတ်ဂၠိုက်ဂၠါဲစၟဳတ်ဒၟံၚ်ဂှ် ဒှ်ညးလဵုမွဲရောဟီုဂှ် သ္ပဒတန်အာဟွံသေၚ်တုဲ ကယျာန်ပါဲအာလေဝ် ဟွံသေၚ်ပုဟ်ဂှ် ဟီုလဝ်ရ။
Ref: BBC