ကွာလာလာမ်ပူ၊ မေ ၂၉
သွက်ဂွံဂၠါဲအာသွဟ် မတန်ကြန်အာအဓာန်ဇမၠိၚ် ဗွဲမၜိုဟ်လလမ် သွက်ပြဒ္ဒညာ မက္တဵုဒှ်ဒၟံၚ်လၟုဟ်တံဂှ် ဒဒှ်ရဆက်ကဵုလဝ်ကတိ သွက်ဂွံရီုဗၚ်ဍုၚ်ဗၟာဂှ် က္ဍိုပ်သ္ကိုပ်အာဇြဳယာန်ဂမၠိုၚ် ဟီုလဝ် ပ္ဍဲဂိတုမေ ၂၇ တေံရ။
ပ္ဍဲအရာသောၚ်ကလး ပြဒ္ဒညာပရေၚ်ဍုၚ်ကွာန် ဍုၚ်ဗၟာဂှ် တၚ်တုပ်စိုတ် ၅ သာ် မတုပ်လဝ်စိုတ် ပ္ဍဲသၞာံ ၂၀၂၁ ဂှ်ဝွံ ဆက်နွံအာ နဒဒှ်ဗီုပြၚ်ခၞံပတန် အဓိကမွဲဏောၚ်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးပံၚ်တောဲ က္ဍိုပ်သ္ကိုပ်အာဇြဳယာန်ဂမၠိုၚ်ဂှ်ရ။
ပွမဗ္တိုက်ပကီုပရာပ်ဒၟံၚ် ကောန်အရာပ်ကေုာံစမြိုၚ်ညးဍုၚ်ကွာန်ဂမၠိုၚ်ဂှ် ဒဒှ်ရညးတံဖ္တိုက်ဖ္အောဝ် ဂကောံမဆေၚ်စပ်သီုဖအိုတ် သွက်ဂွံဒေါအ်ဒေၚ်ကဵုလွာဲဂှ်ကီု၊ သီုညးဖအိုတ် ချိၚ်ဆတုဲသွက်ဂွံကၠောန်သ္ပအိုတ်ဂှ်ကီု၊ ကောန်အရာပ်ဂမၠိုၚ် ဂွံဗၠးဘဲဂှ် စွံက္ဍိုပ်တုဲသ္ဂောံရေၚ်တၠုၚ်အိုတ်ဂှ် ဒဒှ်ရဖ္တိုက်ဖ္အောဝ်လဝ်ဂှ် က္ဍိုပ်သ္ကိုပ်အာဇြဳယာန်ဂမၠိုၚ် ဟီုလဝ်ရ။
အရီုဗၚ်ပရေၚ်ဗ္စာရဏာမၞိဟ်အာဇြဳယာန်တံဂှ် ညံၚ်ဂွံတြးကဵု ဗွဲမဗၠးဘဲ၊ ဗွဲမဂတာပ်အခိၚ်၊ ဗွဲမစိုပ်တရဴ၊ သီုမၞုံကဵုပရေၚ်သောၚ်ကၠးတံမာန်ဂှ် ဂကောံဗော်သွးဂမၠိုၚ် ညံၚ်ဂွံဒုၚ်ကဵုလျိုၚ် ကေုာံ အလုံဍုၚ်မွဲ သွက်ဂွံဒေါအ်ပန်ပှော် လှဲလှဲလးလးကီုဂှ် က္ဍိုပ်သ္ကိုပ်အာဇြဳယာန်ဂမၠိုၚ် ဖ္တိုက်ဖ္အောဝ်လဝ်ရ။
ကြဴနူတိချဳ မၞိဟ် ၃၈၀၀ ပြၚ် မဒးချိုတ်အာလဝ်တုဲဂှ် တၚ်တုပ်စိုတ်ဒေါအ်ပန်ပှော် မံက်တိတ်ကၠုၚ်လဝ်တုဲ ပပဵုပ္တိုန်လဝ်အာယုက်ဒေါအ်ပန်ပှော် စဵုကဵုဂိတုမေ ၃၁ ကီုလေဝ် ပေါဲဗ္တိုက်ဂမၠိုၚ် ဆက်ဒှ်ဒၟံၚ်ဖိုဟ်ရ။
သွက်ဂွံဖအိုတ်ကၠေံ ပရေၚ်ဗ္တိုက်ပကီုပရာပ်ဂမၠိုၚ်၊ သွက်ဂွံပလံၚ်ဗစိုပ်ကဵု အရီုဗၚ်ပရေၚ်ဗ္စာရဏာမၞိဟ်ဂမၠိုၚ်၊ ဂကောံမဆေၚ်စပ်ဂမၠိုၚ် သွက်ဂွံသဳကၠဳညးသ္ကအ်၊ သွက်ဂွံခါန်ကၞက်ပ္တိုန် ညးစၞးတၟေၚ် ကေုာံ ညးစၞးတၟေၚ်ဏံ သွက်ဂွံပညဳပညပ် ကုဂကောံမဆေၚ်စပ်သီုဖအိုတ် ဒှ်တမ် တၚ် ၅ သာ်ဏံဂှ် လလောၚ်ပ္တိတ်လဝ် နဒဒှ်တၚ်တုပ်စိုတ်အာဇြဳယာန်ကီုလေဝ် လ္ပာ်ကံၚ်ဇြဳပၞာန် ထ္မံက်ကၠုၚ်လဝ်ရုပ်ရဴ ဂွံညိညဓဝ်ရ။
ဥက္ကဌဒးအလန်အာဇြဳယာန် သ္ကိုပ်ဝန်ဇၞော်မလေဝ်ယှာ အာန်ဝါဂှ် ပ္ဍဲဍုၚ်ဗၟာဂှ် ဒးကဵုက္ဍိုပ်ကဵု ပေါဲရုဲမာဲဟွံသေၚ်၊ ညံၚ်ပရေၚ်ဗ္တိုက်ပွပကီုပရာပ်ဂမၠိုၚ် ဂွံအိုတ်အးအာဂှ် ဒးကဵုက္ဍိုပ် ဒးကၠောန်ဏောၚ်ဂှ် ကဵုလဝ်သမ္တီ ကုကံၚ်ဇြဳပၞာန်ရ။
Ref: AA