မတ်မလီု၊ ဂျူလာၚ် ၄
ပ္ဍဲတမ်ဒပ် PDF သၟဝ်ကောပ်ကာဲ ဌာနဝန်ဇၞော်ကာစဵုဒၞါ အလဵုအသဳညဳသၟဟ်ဂကူဂှ်ကဵု ပ္ဍဲပကဖတံဂှ် အပ္ဍဲဂိတုဂျောန်ဏံ သ္ကိုပ်ဗိုလ်ကံၚ်ဇြဳပၞာန်မွဲတၠ မပါလုပ် ဗၠာဲသၟိၚ် ကေုာံ ကောန်ဒပ် ၄၃ တၠ လုပ်စိုပ်ဖျေံကၠုၚ်လွဟ်ဂှ် ပ္ဍဲဂိတုဂျူလာၚ် ၃ တေံ NUG လလောၚ်ပ္တိတ်လဝ်ရ။
ပ္ဍဲကဵုဏံ သ္ကိုပ်ဗိုလ်ကဆံၚ်သၞာဲဒဴမွဲတၠ၊ ဗိုလ်ဇၞော်ၜါတၠ ကေုာံ ဒုသ္ကိုပ်ဗၠာဲသၟိၚ် မွဲတၠ မပါလုပ် ကောန်ဒပ်ဂမၠိုၚ် ကေုာံ ဗၠာဲသၟိၚ် ၄၃ တၠဝွံ ထောံလသာကၠေံ ကံၚ်ဇြဳပၞာန်သီအဝဵုတုဲ ပြံၚ်ဒတူလိုၚ်ကၠုၚ် လ္ပာ်ညးဍုၚ်ကွာန်တံတုဲ ပါလုပ်ကၠုၚ်လဝ် ပ္ဍဲကဵုပရေၚ်ချဳဒရာၚ် ဒစဵုဒစးအဝဵု နနဲဟွံပကီုပရာပ် CDM တံဂှ်ရ။
ပ္ဍဲကဵုညးပါလုပ်ကၠုၚ်လဝ်ဂမၠိုၚ် လုပ်စိုပ်စ္ၜုဲစ္ၜော်ကၠုၚ် ဇရေၚ်ဂၠံသြိုဟ်ညးဍုၚ်ကွာန်တံ သီုကဵုလွဟ်လက်နက်တံဂှ်လေဝ် နွံတုဲ ညးမကေတ်နၚ်လွဟ်လက်နက်တံဂှ် အတိုၚ်ၚုဟ်မးလွဟ်လက်နက် နူကဵုဌာနဝန်ဇၞော်ကာစဵုဒၞါ အလဵုအသဳညဳသၟဟ်ဂကူ မခုတ်ပ္တန်လဝ်ဂှ် ပ္တိုန်စရာဲဖျေံလဝ်လာဘ်ရောၚ် သ္ဂးရ။
အပ္ဍဲဂိတုဂျောန်ဏံ လွဟ်လက်နက် ညးလုပ်စိုပ်ဖျေံလွဟ်ဂမၠိုၚ် ကေတ်နၚ်တံ ၁၈ ဇကိုအ်ကဵု မကမ်ဂမၠိုၚ်လေဝ် ကလိဂွံလဝ်ရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြး NUG ဂှ်ရ။
တုဲကၠုၚ် ပ္ဍဲဂိတုမေတေံဂှ်လေဝ် ပ္ဍဲကဵုတမ်ဒပ် ကေုာံ ပကဖ သၟဝ်တဲဌာနဝန်ဇၞော်ကာစဵုဒၞါ အလဵုအသဳညဳသၟဟ်ဂကူဂှ် သ္ကိုပ်ဗိုလ်ပိတၠ မပါလုပ် ကောန်ဒပ် ကေုာံ ဗၠာဲသၟိၚ် ၄၅ တၠ ဖျေံလဝ်လွဟ်တုဲ ကလိဂွံလဝ်လွဟ် ၂၄ ဇကိုအ်ရောၚ် ဂွံတီကေတ်ရ။
အလုံဍုၚ်မွဲ အပ္ဍဲကာလသီအဝဵုဏံ ဒပ်ကံၚ်ဇြဳပၞာန်ကဵု ကောန်ဒပ်ဗၠာဲသၟိၚ် ၁၅၀၀၀ ပြၚ်ဝွံ ပါလုပ်လဝ် ပ္ဍဲကဵုပရေၚ်ချဳဒရာၚ် ဒစဵုဒစးတၠအဝဵု နနဲဟွံပကီုပရာပ် CDM တံရောၚ် ဂွံတီကေတ် အတိုၚ်တၚ်လလောၚ်တြးပရိုၚ် NUG ရ။
ပရိုၚ်−သြၚ်လောန်တိုၚ်(မ်)
ဗီု−NUG