တယိတ်ချံၚ်၊ ဂျူလာၚ် ၅
ပ္ဍဲရးတၞၚ်သဳ ပ္ဍဲပွိုၚ်ဍုၚ်တယိတ်ချံၚ်ဂှ် ဂကောံပျူသဝ်ထဳ ကေုာံ ဗၠာဲသၟိၚ် မကၠုၚ်ကဵုကွဳစက်သ္ၚိတံ ဒးဒုၚ်ကြတ်ဗ္တိုက်လဝ်တုဲ ပျူသဝ်ထဳမွဲတၠ ချိုတ်တုဲ ၜါတၠ ဇီုကပိုက်ကလိဂွံလဝ်ဝပ်ရောၚ် ဂွံတီကေတ် ဇရေၚ်ကရောၚ်ပၞာန်ဒံၚ်ညဳနံၚ်ရ။
တုဲကၠုၚ် ပ္ဍဲဂိတုဂျူလာၚ် ၂ အခိၚ်ဇိုၚ်သဝ်တ္ၚဲ ၜိုတ် ၄ နာဍဳဂှ် နူဍုၚ်ထဝါဲ ဗၠာဲသၟိၚ် ကေုာံ ပျူသဝ်ထဳ ဇြဟတ်ၜိုတ် ၁၀ ကၠုၚ်ကဵုကွဳစက်သ္ၚိၜါဖ္ဍိုက် လ္ပာ်ပွိုၚ်ဍုၚ်တယိတ်ချံၚ်ဂှ် ကရောၚ်ပၞာန်ဒံၚ်ညဳနံၚ် ပန်ပှော်ဗ္တိုက်လဝ် ပ္ဍဲကဵုဒၞါဲဂၠံၚ်ထဝါဲ−တယိတ်ချံၚ်မွဲဒၞါဲဂှ်ရ။
ဟိုတ်နူပရေၚ်ပန်ပှော်ဗ္တိုက်ဏံတုဲ ပျူသဝ်ထဳ ပါကၠုၚ်လ္တူကွဳစက်မွဲတၠ ဇီုကပိုက်ချိုတ်အာလဝ်တုဲ ၜါတၠပၠန်ဂှ်လေဝ် ဇီုကပိုက်ကလိဂွံလဝ်ဝပ်ရောၚ် ဂွံတီကေတ် အတိုၚ်တၚ်လလောၚ်တြး ကရောၚ်ပၞာန်ဒံၚ်ညဳနံၚ်ရ။
ဂကောံဗၠာဲသၟိၚ် ကေုာံ ပျူသဝ်ထဳတံ ကၠုၚ်ကဵုကွဳစက်သ္ၚိဏောၚ် ဂွံလဝ်ပရိုၚ်ချိုတ်တ်ပၠိုတ်တ်ဂှ်ရ ဒးဒုၚ်ကြတ်ဗ္တိုက်လဝ်ရောၚ် သ္ဂံၚ်ဗလာ ညးဒုၚ်တာလျိုၚ်လလောၚ်ပရိုၚ် ကရောၚ်ပၞာန်ဒံၚ်ညဳနံၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အတိုၚ်ဗဳဒဳယောသ္ကုတ် ကရောၚ်ပၞာန်ဒံၚ်ညဳနံၚ်တံ လလောၚ်ပ္တိတ်လဝ်ဂှ်မ္ဂး ကွဳစက်ဗၠာဲသၟိၚ် ကေုာံ ပျူသဝ်ထဳ ဒဳကၠုၚ် နကဵုကွဳစက်သ္ၚိ အဆက်က်ဂှ် ကြဴနူဒးဒုၚ်ပန်ဗ္တိုက်တုဲ ဒဳဏာလဝ်နကဵုအသိၚ်သ္ကာတ်တ်ရ။
သ္အာၚ်နူဂှ်ပၠန် နကဵုညးဍုၚ်ကွာန် နူပွိုၚ်ဍုၚ်တယိတ်ချံၚ်တံ အာစိုပ်ဒၞါဲမကြပ်ကဵု ပျူသဝ်ထဳ၊ ကံၚ်ဇြဳပၞာန်တံဂှ်မ္ဂး နကဵုသတိပရေၚ်ပၞာန်နွံနွံ သွက်ဂွံတတ်ကၠောံအာကၠုၚ်အိုတ်ဂှ် ဖ္တိုက်ဖ္အောဝ်လဝ်ရ။
တုဲကၠုၚ် ပ္ဍဲဂိတုဂျောန် ၁ တေံဂှ်လေဝ် ကွဳစက်သ္ၚိမွဲဖ္ဍိုက် တိတ်ကၠုၚ် နူတမ်ဒပ်ခမရ စၟတ် ၄၀၇ ဖျေံသ္ဇိုၚ်ဍာ်ဗုဂှ် ဒးဒုၚ်ကြတ်ဗ္တိုက်လဝ် ပ္ဍဲဗ္ဒါဲကွာန်မံၚ်မေဝ်ယှံၚ် ပွိုၚ်ဍုၚ်ထဝါဲတုဲ ဗိုလ်ဇၞော်ကံၚ်ဇြဳပၞာန် ဇြေန်ဝေတ်အံၚ် ချိုတ်အာလဝ် ဒၞါဲဂှ်ရ။
ပရိုၚ်−သြၚ်လောန်တိုၚ်(မ်)
ဗီု−ကရောၚ်ပၞာန်ဒံၚ်ညဳနံၚ်