ကျာ်ထဝ်၊ ဂျူလာၚ် ၂၅
ပ္ဍဲတွဵုရးဍုၚ်မန် ပွိုၚ်ဍုၚ်ကျာ်ထဝ် ပ္ဍဲကဵုကွာန် (ပျဉ်းကတိုးကုန်း) ဂှ် ဟိုတ်နူမကမ်လွဟ်ဇၞော် ဒပ်ကံၚ်ဇြဳပၞာန်တံ ဒတုံဗ္တိုဟ်ထ္ကးအာလဝ်တုဲ ညးဍုၚ်ကွာန်ဒေသ တြဴတၠ ချိုတ်တုဲ ၁၂ တၠ ဇီုကပိုက်ကလိဂွံလဝ်ဝပ်ရောၚ် ညးမၞုံအခေါၚ်ဟီုဂး ခရိုၚ်သဓီု KNU ပဒိုဝ်သဝ်အေနာၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲဂိတုဂျူလာၚ် ၂၃ အခိၚ်နူဂယး ၜိုတ် ၉ နာဍဳဂှ် နူဒပ်အမၠံက်ကံၚ်ဇြဳပၞာန် စၟတ် ၃၁၀ ဖျေံသ္ဇိုၚ်ကျာ်ထဝ်ဂှ် ဘိုၚ်ပန်ပှော်လဝ် လွဟ်ဇၞော် လ္ပာ်ကွာန်(ကျောက်တန်းလေး) ဒၞါဲပေါဲဗ္တိုက်က္တဵုဒှ်ဂှ်တုဲ ဒတုံဗ္တိုဟ်ထ္ကးအာလဝ် ပ္ဍဲကဵုကွာန် (ပျဉ်းကတိုးကုန်း) ရ။
ဟိုတ်နူမကမ်လွဟ်ဇၞော် ဒတုံဗ္တိုဟ်ထ္ကးအာလဝ်တုဲ ညးဒေသကွာန်(ပျဉ်းကတိုးကုန်း) မာၚ်သဵုထပိုၚ် အာယုက် ၁၈ သၞာံမွဲတၠ မပါလုပ် မၞိဟ်တြုံတြဴတၠ ချိုတ်အာလဝ်တုဲ ညးဒေသ ၁၂ တၠ ပါလုပ်သီုကဵုညးဗြဴမသုန်တၠဂှ် ကလိဂွံအာလဝ်ဝပ်ရ။
ပဒိုဝ်သဝ်အေနာၚ် ညးမၞုံအခေါၚ်ဟီုဂး ခရိုၚ်သဓီု ဗော်သွးကောန်ဂကူကရေၚ် KNU ဂှ် ပရေၚ်ပန်ပှော်ဒပ်ကံၚ်ဇြဳပၞာန်ဂှ်ဝွံ ပ္တဝ်က္ဍိုပ်ဗ္တိုက်ဒၟံၚ် ညးဍုၚ်ကွာန်ဒၟံၚ်ကွာန် ဟွံဆက်စပ်ကဵုပေါဲဗ္တိုက်တံရောၚ်ဂှ် ပါ်ပါဲလဝ်ရ။
ပ္ဍဲကဵုတ္ၚဲဂှ် အခိၚ်နူဂယး ပ္ဍဲကဵုကွာန်(ကျောက်တန်းလေး) ပွိုၚ်ဍုၚ်ကျာ်ထဝ် မၞုံခြာဇမ္ၚောဲ ကုကွာန်(ပျဉ်းကတိုးကုန်း) ဟွံအောန်နူကဵု ၅ မိုၚ်ဂှ် ဒပ်ကံၚ်ဇြဳပၞာန်ကဵု ဒပ်ပၞာန်ဗၠးၜးကောန်ဂကူကရေၚ် KNLA တံ က္တဵုဒှ်လဝ်ပေါဲဗ္တိုက်ရ။
လအာတုပ်သာ်ဂှ်ကီု ပ္ဍဲဂိတုဂျူလာၚ် ၂၂ တေံဂှ်လေဝ် ဒပ်ပံၚ်ကောံ ဂကောံဇြဟတ်ပၠန်ဂတးတံ အာစိုပ်ဗ္တိုက်လဝ် ဗ္ဒိုပ်ဗၠာဲသၟိၚ်ဒုၚ်သယိတ်ဂှ်တုဲ ဟိုတ်နူဒပ်ကံၚ်ဇြဳပၞာန် ပန်ပှော်လွဟ်ဇၞော်တုဲ မၞိဟ်တြုံဒေသကွာန်ဒုၚ်သယိတ်မွဲတၠ ချိုတ်တုဲ ၜါတၠ ကလိဂွံလဝ်ဝပ်ရ။
ပ္ဍဲကဵုပွိုၚ်ဍုၚ်ကျာ်ထဝ် ပရေၚ်ပၞာန်ၜါလ္ပာ် ကလေၚ်ကြံၚ်မ္ၚိုဟ်ဒၟံၚ်ဂှ် ဟိုတ်နူဒပ်ကံၚ်ဇြဳပၞာန် ထ္ပက်ကရောၚ်ပၞာန်ကီု၊ ဟိုတ်နူပန်ပှော်လွဟ်ဇၞော်တံကီုဂှ်တုဲ ညးဍုၚ်ကွာန်ဒေသ ၁၂၀၀၀ ပြၚ် ဒးဂြိပ်ဒဴပါဲဒလေတ်ဒၟံၚ်ရောၚ် ဂွံတီကေတ် အတိုၚ်တၚ်လလောၚ်တြး ခရိုၚ်သဓီု KNU ရ။
ပရိုၚ်−သြၚ်လောန်တိုၚ်(မ်)
ဗီု−CJ