မတ်မလီု၊ ဖေဖဝ်ဝါရဳ ၂၇
ပ္ဍဲတွဵုရးမန် ဇၟာပ်ပွိုၚ်ဍုၚ်တံမ္ဂး နကဵုအမိၚ်ဝန်ဇၞော် ပရေၚ်ဂီုကၠီုကေုာံဒေသပယျဵု ထပဵုမံၚ်ဇြဟတ်ဒပ်မင်ကွာန် အဆက်က်ရောၚ် ညးကြပ်ကဵုဒပ်ပၞာန်ဗမာတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
စနူသၞာံတၟိမံက်တိုန်လဝ်ဂှ် ပ္ဍဲဇၟာပ်အရာပ်/ကွာန်တံ ညံၚ်ဂွံပံက်လဝ်ဂကောံဒပ်မင်ကွာန် သီုကဵုစရင်ယၟု ညးပါလုပ်တံမွဲအခိၚ်ဓဝ် သွက်ဂွံပလံၚ်နင်ဂှ် ဒပ်ပၞာန်ဗမာကဵုလဝ်စၞောန်ပ္ညုၚ်ရောၚ်။
သွက်ဂွံရေၚ်တၠုၚ်အာ ပရေၚ်ဖောအ်ဗြဳဒေသဂးတုဲ ပံက်လဝ်ဒပ်မၚ်ကွာန်ရောၚ် နူကဵုကဝ်မယှေန် ထ္ၜးလဝ်ဟိုတ်ရ။
အတိုၚ်ညးကြပ်ကဵု ရဲဒပ်ပၞာန်ဗမာတံဟီုမ္ဂး ဒပ်မၚ်ကွာန်တံဏံ ရန်တၟံပရေၚ်ဂီုကၠီုဒေသသၟးဟွံက ယဝ်ရပၟိက်ဒှ်ကၠုၚ်မ္ဂး ညံၚ်ဂွံပံၚ်တောဲဗက်အာ ကရောံကရောၚ်ပၞာန်တံမာန် ရန်တၟံလဝ်ရောၚ် ဂွံတီရ။
ဒပ်မင်ကွာန် ကဝ်မယှေန်ပၞာန်ပံက်လဝ်တံ ကေတ်ပရေၚ်ဂီုကၠီု၊ ဗက်စၟဳစၟတ်၊ ဗက်မာတ်ဆိုအ်ရပ်မၞိဟ်တံကီု ဗွဲကြဴဏံထ္ၜးလွဟ်တုဲ သ္ပမာန်ကဵုညးဍုၚ်ကွာန်တံဒှ်ကၠုၚ်မံၚ် ညးဒေသတံ ဟီုရ။
ဂကောံဒပ်မၚ်ကွာန်ကဵု ဒပ်ဗၠာဲသၟိၚ်တံပံၚ်တောဲတုဲ ဂေတ်ကၚ်လ္တူဍုၚ်ကီု၊ ထ္ၜးဟိုတ်ပရေၚ်ဂီုကၠီုနာနာတုဲ ဒၞာဲမၞိဟ်ဂၠိုၚ် အာကၠုၚ်မံၚ်ဂှ် ဗက်မာတ်ဆိုအ်ဂၠိုက်ဂၠာဲ၊ အခိၚ်ဗတမ် ဗက်စၟဳစၟတ်ပရေၚ်တေၚ်ကၟုဲတုဲ အာတ်မံၚ်သြန် လ္တူညးဍုၚ်ကွာန်တံရောၚ်။
တုဲပၠန် လ္တူဂၠံၚ်ဍာန်တံ ဗက်စၟဳစၟတ်ကွဳစက်ကဵု ကဠာဗံက်ကွဳလိုန်ဓါတ်တံသၟးဟွံက ဗက်ပံက်ဖုၚ် ဂၠိုက်ဂၠာဲပရူပရာ ပရေၚ်ဍုၚ်ကွာန်တုဲ ၜုၚ်တက်ရပ်ကၠေၚ်မၞိဟ်လေဝ် နွံမံၚ် မဒှ်ရ။
မွဲလပါ်ပၠန် သွက်ပရေၚ်စဵုဒၞာကၟိန်ဍုၚ်ကဵု ပရေၚ်ဂီုကၠီုဂှ် ထမံက်အာသၞောတ်ဂတာပ်ခေတ် ပရေၚ်စဵုဒၞာ ညးဍုၚ်ကွာန်ရောၚ် ပ္ဍဲကဵုလိက်သဝဏ် က္ဍိုပ်သ္ကိုပ်ပၞာန်ပလံၚ်ဗစိုပ်လဝ် အသေအဟာန် တ္ၚဲကၟိန်ဍုၚ် မရနုက်ကဵု ၇၉ ဝါဂှ် ချူစုတ်လဝ်ရောၚ်။
ပရိုၚ်-သြၚ်လောန်တိုၚ်မ်
Photo – MOI