ကျာ်ထဝ်၊ ဂျူလာၚ် ၃၁
တွဵုရးဍုၚ်မန် အပ္ဍဲပွိုၚ်ဍုၚ်ကျာ်ထဝ်ဂှ် အပ္ဍဲပွိုၚ်ၜါတ္ၚဲဏံ ဟိုတ်နူဒပ်ကံၚ်ဇြဳပၞာန် ပန်ပှော်လွဟ်ဇၞော်တုဲ ကောန်အရာပ်ဒ္စိတ်တၠ ချိုတ်တုဲ ဒ္စါံတၠကလိဂွံလဝ်ဝပ်ရောၚ် ခရိုၚ်သဓီု ဗော်သွးကောန်ဂကူကရေၚ် KNU လလောၚ်ပ္တိတ်လဝ် ပ္ဍဲဂိတုဂျူလာၚ် ၃၀ တေံရ။
တုဲကၠုၚ် ပ္ဍဲဂိတုဂျူလာၚ် ၂၂ တေံ ကြဴနူဒပ်ပၠန်ဂတး သၟဝ်သ္ကိုပ်သ္က KNLA တံ အာစိုပ်ဗ္တိုက်လဝ် ဗ္ဒိုပ်ဗၠာဲသၟိၚ်ဒုၚ်သယိတ်တုဲဂှ် နူဒပ်အမၠံက် စၟတ် ၃၁၀ ဖျေံသ္ဇိုၚ်ဒုၚ်သယိတ်ဂှ် ပန်ပှော်လဝ် လွဟ်ဇၞော်ကြာန်န် ဟွံအောန်နူကဵု ၁၀ မရ။
ဟိုတ်နူပရေၚ်ပန်ပှော်လွဟ်ဇၞော် ဒပ်အမၠံက်ဂှ်တုဲ ဒတုံဗ္တိုဟ်ထ္ကးအာလဝ် ပ္ဍဲအရာပ်( ရွာလေး) ဍုၚ်ဒုၚ်သယိတ်ဂှ်တုဲ ညးဗြဴမၞုံကဵုဒၟုၚ်ဒၠေၚ် ဒဝ်ကျဳကျဳလေန် အာယုက် ၄၅ သၞာံ ကေုာံ တၠသ္ၚိညး ကိုဝ်လေဝ်သေတ်တူတံ ဒးမကမ်ချိုတ်အာလဝ်တုဲ ဒဝ်ယေန်ဝေလွေန် သ္ၚိရေၚ်ကၟေၚ်ဆက်ဂှ်လေဝ် ကလိဂွံလဝ်ဝပ်ရ။
သ္အာၚ်နူဂှ်ပၠန် တုဲကၠုၚ်ပ္ဍဲဂိတုဂျူလာၚ် ၂၃ တေံဂှ်လေဝ် ပ္ဍဲပွိုၚ်ဍုၚ်ကျာ်ထဝ် ဗ္ဒါဲကွာန်ကျံက်တာန်လေဝ်ဂှ် ဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန်ဂှ်ကဵု ဒပ်ပံၚ်ကောံ PDF, ဒပ်ပၞာန်ဗၠးၜးကောန်ဂကူကရေၚ် KNLA တံ ပေါဲဗ္တိုက်ၜါလ္ပာ် သ္ကာတ်မြဟ်လဝ်ရ။
အပ္ဍဲပေါဲဗ္တိုက်ဏံဂှ် နူတမ်ဒပ်ကမ်လှောဝ် စၟတ် ၆၀၂ ဖျေံသ္ဇိုၚ်ကျာ်ထဝ်ဂှ် ဘိုၚ်ပန်ပှော်လဝ်လွဟ်ဇၞော်တုဲ လွဟ်ဇၞော်ဟံၚ်ဝှေသ်ဇြာ ဒတုံဗ္တိုဟ်ထ္ကးအာလဝ် အပ္ဍဲဂကောံကွာန်ပျေန်ကတိုဝ် ဟွံအောန်နူကဵုပန်မရောၚ်ဂှ် သ္ဂးရ။
ဟိုတ်နူလွဟ်ဇၞော်ဒတုံဗ္တိုဟ်ထ္ကးအာလဝ်တုဲ ညးဒေသဂမၠိုၚ် ကိုဝ်သဵုထက်ပိုၚ်၊ ကိုဝ်ချေတ်ကိုဝ်၊ မချေတ်တေဝ်တံ မပါလုပ် ညးဒေသ ထပှ်တၠ ချိုတ်အာလဝ်တုဲ ထပှ်တၠ ဇီုကပိုက်ကလိဂွံလဝ်ဝပ်ရောၚ် ဂွံတီကေတ် အတိုၚ်တၚ်လလောၚ်တြး ခရိုၚ်သဓီု KNU ရ။
ညးဒေသ ဇီုကပိုက်ကလိဂွံလဝ်ဝပ်တံဂှ်ဝွံ ဒှ်ကောန်ကလောန်နူကတိုၚ်ထဝ်တံတုဲ ဟိုတ်နူပေါဲဗ္တိုက်တုဲ အခိၚ်ဂ္စါန်ဂြိပ်တိတ် လ္ပာ်ဍုၚ်ကျာ်ထဝ် ပ္ဍဲကဵုစိုပ်ကွာန်ပျေန်ကတိုဝ်ဂှ် ဒးအာလဝ်ဘဲလွဟ်ဇၞော်ရ။
အတိုၚ်တၚ်နၚ် နူသြၚ်လောန်တိုၚ်(မ်) ပ္ကောံပ္ကေဝ်လဝ်ဂှ်မ္ဂး ပ္ဍဲပွိုၚ်ဍုၚ်ကျာ်ထဝ်ဂှ် သၞာံဏံ နူဂိတုဂျာန္နဝါရဳ စဵုကဵုဂိတုဂျူလာၚ် ၃၀ အပ္ဍဲပွိုၚ်ပိဂိတု ဟိုတ်နူပရေၚ်ပန်ပှော်လွဟ်ဇၞော် နူဒပ်ကံၚ်ဇြဳပၞာန်တံတုဲ ကောန်အရာပ် ဗ္ဒါဲ ၃၀ တၠ ချိုတ်တုဲ ၄၀ ပြၚ် ဇီုကပိုက်ကလိဂွံလဝ်ဝပ်ရ။
ပရိုၚ်−သြၚ်လောန်တိုၚ်(မ်)
ဗီု−KNU