ဝါယှေန်တန်၊ ဖေဖဝ်ဝါရဳ ၂၆
ပ္ဍဲရာဇဝၚ်စၠတ်ဓဝ်မ္ဂး သမ္မတအမေရိကာန် ဒဝ်နေဝ် ထရဟီုလဝ် ဂလာန်ကၟိန်ဍုၚ် လံဂၠိၚ်အိုတ်ဂှ် ပတိုန်လဝ်စရာဲ ကမၠောန်သ္ၚိစၠတ်ဗ္တာၚ်တုဲ ဘပဠလဝ် ဍုၚ်အဳရာန်ရ။
ပ္ဍဲအခိၚ်ဂလာန် ၁ နာဍဳ ၄၇ မိနေတ်ဂှ် စပ်ကဵုပရေၚ်ပိုန်ဒြပ်ဍုၚ်အမေရိကာန်တုဲ သွက်အပြံၚ်အလှာဲခေတ်ဗွဲမဂၠိုၚ် ညးတေံထိၚ်ကြာပ်ဖန်ဇန်ကဵုလဝ်ရောၚ် ထရ ဟီုလဝ်ရ။
စပ်ကဵုအဳရာန် သောၚ်ကလးအာနဲကဲအမာတ်ကလုတ်ဂှ် ပဵုဒးစိုတ်ကီုလေဝ် တဳဟဳရာန် ညံၚ်ဟွံဂစာန်ပတိတ်အာ လွဟ်နျူကလဳယာဂှ် ညးတေံ ကဵုလဝ်သတိရောၚ်။
နာဲဗ္စာရုၚ်သၞောဝ်ဓဝ်ကၟိန်ဍုၚ်တံ တိုန်စိုပ်ကၠုၚ် အခိၚ်တံၚ်တဲဆက်မိတ်တုဲဂှ် စပ်ကဵုအခေါန်တုဲ နာဲဗ္စာတံ ပတိတ်လလောၚ်တြးလဝ်အမိၚ်ဂှ် ဟွံခိုဟ်ကွေံကွေံပုဟ် ထရ ဟီုရ။
ကောန်ဍုၚ်အမေရိကာန်ဗွဲမဂၠိုၚ်တံ ဗီုထရ ကၠောန်မံၚ်လၟုဟ်ဂှ် ဟွံပေၚ်စိုတ်ကီုပုဟ် တင်နၚ်ဂမၠိုၚ်ထမံက်ထ္ၜးမံၚ်ကီုလေဝ် တၠုၚ်လအာ သမ္မတ သွက်ဂွံပြံၚ်လှာဲကဵု မုလေဝ်ဟွံဆဵုလဝ်ဏီပုဟ်။
အခိၚ်ရတ်ယှာ လုပ်ဗတိုက်ယူခရုၚ် ပန်သၞာံပြၚ်အာမွဲတ္ၚဲ ထရဟီုလဝ်ဂလာန်ဏံ အကြာပရေၚ်ဂစိုတ်ဂမျိုၚ်မံၚ် ရတ်ယှာကဵုယူခရုၚ်တံ ညံၚ်ဂွံဒေါအ်အာမာန် အလဵုအသဳ အမေရိကာန် ဆၜိုတ်ဂစာန်မံၚ် ဟီုလဝ်ရ။
စပ်ကဵုရဲဆုဲပြံၚ်တံ လုပ်စိုပ်ကၠုၚ်လဝ် အမေရိကာန်တုဲ ထရ တင်စုတ်ဒုဟ်ကဵု အလဵုအသဳ ဗိုၚ်ဒင်တုဲ ကဵုလဝ်အခေါၚ်ကဵု ညးဂစိုတ်မၞိဟ်တံ သွက်ဂွံလုပ်ကၠုၚ်ဍုၚ် သ္ဂးရ။
စပ်ကဵုပရေၚ်ပိုန်ဒြပ် ပွိုၚ် ၅ သၞာံဏံ ပရေၚ်သြန်ဖောဝ် အောန်အိုတ်ဒှ်မံၚ်တုဲ ပရေၚ်ပိုန်ဒြပ်အမေရိကာန်ဂှ် ဟွံတုပ်ကဵုအခိၚ်ကၠာတေံ တောတက်မံၚ်ရောၚ် ဟီုဂးလဝ်ရ။
ပရေၚ်ရပ်ဂွံလဝ် သမ္မတဗၚ်နဳဇြဲလာ မာဒူရိုဂှ် ဟီုဂးပတိုန်ကေတ်မံၚ်စရာဲတုဲ သွက်အဳရာန် ညိလေဝ် ကဵုအခေါၚ်ပိုၚ်ပြဳ လွဟ်နျူကလဳယာဟွံသေၚ်ပုဟ် ညးဟီုရ။
ပ္ဍဲလက်ထက်ညးတေံ ဍုၚ်အမေရိကာန် စိုပ်ကၠုၚ်မံၚ်အခေတ်ထဝ်မွဲရောၚ် ထရ ဟီုလဝ်ရောၚ်။
Ref:BBC