ပိုင်ကြုၚ်၊ ဖေဖဝ်ဝါရဳ ၂၇
ဒပ်ပၞာန်ဗမာ ထပက်ကၠုၚ်ကရောၚ်ပၞာန် ပ္ဍဲပွိုၚ်ဍုၚ်ပိုၚ်ကြုၚ် ဒၞာဲတိဍာ်ဌာန်ဂအုပ်ဗဟဵု KNU မဟာဒပ် ၇ ဂှ် ဒးလဝ်ဘဲဒဏ်ဂိဂၠိုၚ်မံၚ်ရောၚ် ရိုဟ်ကၞက်ပရိုၚ်ဒေသတံ ဟီုရ။
စနူဖေဖဝ်ဝါရဳ ၂၃ ကရောၚ်ပၞာန်ဗမာ ထပက်လုပ်အာဒၞာဲတိဍာ် ဌာန်ဂအုပ်ဗဟဵု KNU ပ္ဍဲပွိုၚ်ဍုၚ်ပိုၚ်ကြုၚ်ဂှ် ဒပ်လဝ်ပေါဲဗတိုက်ကဵု ဒပ် KNLA မဟာဒပ် ၇ ဗွဲမသ္ကာတ်မြဟ်ကွေံရောၚ်။
ပ္ဍဲပေါဲဗတိုက်ဏံ ရဲလပါ်ဒပ်ကဝ်မယှေန်ပၞာန် ချိုတ်ၜါတၠ၊ ဒစာံတၠဒးဝပ်ရောၚ် နူဌာန်ဂအုပ်ဗဟဵု KNU ပတိတ်လဝ်ပရိုၚ်ရ။
ပ္ဍဲကဵုဖေဖဝ်ဝါရဳ ၂၄ ကဵု ၂၅ ဂှ်လေဝ် နူကဵုဒပ်ကဝ်မယှေန်ပၞာန် ဂစာန်ထပက်ကရောၚ်ပၞာန် တိတ်ကၠုၚ်နူဍုၚ်ပိုၚ်ကြုၚ်ဂှ် ဆက်ဒှ်လဝ်ပေါဲဗတိုက်ကဵု မဟာဒပ် ၇ ဂှ်တှ်ေ လပါ်ဒပ်ကဝ်မယှေန်ပၞာန် ၃၀ ပြၚ် ချိုတ်အာသ္ဂးရ။
ပ္ဍဲကဵုပေါဲဗတိုက်ဏံ ကောန်ဒပ်ချိုတ်အာလဝ်တံဂှ် ရဲဒပ်ကဝ်မယှေန်ပၞာန်ပလံၚ်ဏာလဝ် ပ္ဍဲကဵုရုၚ်ဂဥုဲပၞာန် ဘာအၚ် နကဵုကွဳစက်ညးဍုၚ်ကွာန်ရောၚ် ညးဒေသတံ သ္ဂးရ။
ပြဟ်ဟ်ဏံ လပါ်ဒပ် KNLA မဟာဒပ် ၇ ဂှ် ကောန်ပၞာန် မွဲတၠ ပြဟ်လလုဲအာ၊ ပ္ဍဲဖေဖဝ်ဝါရဳ ၂၆ ဂှ် ပေါဲဗတိုက်ကလေၚ် ညိၚ်ဝတ်အာတုဲ နူကဵုဍုၚ်လိုၚ်ဗၠဲဂှ် ရဲဒပ်ကဝ်မယှေန်ပၞာန် ထပ်ပလံၚ်ကဵုနၚ် ဇြဟတ်ဒပ်ပၞာန်ရဂှ် ညးကြပ်ကဵု ဒပ် KNLA မွဲတၠ ဟီုရ။
အခိၚ်ပေါဲဗတိုက်ဒှ်မံၚ်ဂှ် ဒပ်ကဝ်မယှေန်ပၞာန် နူကဵုလ္တူဍုၚ် ပိုၚ်ကြုၚ် ပန်ပလံၚ်နၚ်လွဟ်ဇၞော် လပါ်ကွာန် တံၚ်လုၚ်ကျဝ်၊ လဝ်သဝ်ဒေဝ်၊ ဖာကာတ်၊ ဖာအိတုဲ ညးဍုၚ်ကွာန်တံ ဂြိပ်တိတ်အာ လပါ်ဒၞာဲဗၠးဘဲမာန်တံဂှ် ဂွံတီနူကဵုညးဒေသတံရ။
သွက်ဂွံအုပ်ဓလီုတိဍာ် KNU မဟာဒပ် ၇ ကဵု ဗ္ဒိုပ်ဒးဒုၚ်သီလဝ်တံ ညံၚ်ကလေၚ်သီဂွံမာန်ဂှ် ဒပ်ပၞာန်ဗမာ ထပက်ကရောၚ်ပၞာန် လုပ်စိုပ်ကၠုၚ်လဝ်ရောၚ် တမ်ရိုဟ်ကၞက်ပရေၚ်ပၞာန်တံ သ္ၚဳဂၠိပ်လဝ်ရ။
ပရိုၚ်-သြၚ်လောန်တိုၚ်မ်
Photo – PDF