ပ္ဍဲပေါဲဗ္တိုက်ပလဂှ် ကောန်ဒပ်ကံၚ်ဇြဳပၞာန် ၃ တၠ ချိုတ်အာ

ပဠဝ်၊ အဝ်ဂါတ် ၇

အပ္ဍဲပေါဲဗ္တိုက်ၜါလ္ပာ် မက္တဵုဒှ်လဝ် ဗ္ဒါဲဗ္ဒိုပ်ဍုၚ်ပလ ပွိုၚ်ဍုၚ်ပဠဝ် ရးတၞၚ်သဳဂှ် ကောန်ဒပ်ကံၚ်ဇြဳပၞာန် ၃ တၠ ချိုတ်တုဲ ၂ တၠ ကလိဂွံလဝ်ဝပ်ရောၚ် ဂွံတီကေတ် ဇရေၚ်တမ်ဒပ် စၟတ် (၁) ခရိုၚ်ဗိက်ရ။

တုဲကၠုၚ်ပ္ဍဲဂိတုအဝ်ဂါတ် ၅ အခိၚ်ဇိုၚ်သဝ်တ္ၚဲ ၜိုတ် ၄ နာဍဳဂှ် ဒပ်ပံၚ်ကောံပၠန်ဂတးတံ လုပ်စိုပ်ဗ္တိုက်လဝ် ဗ္ဒိုပ်ဗၠာဲသၟိၚ်ဍုၚ်ပလကဵု သၞေဟ်ကၚ်စၟဳတ်ကံၚ်ဇြဳပၞာန် နွံဂတမုက်ဂှ်ရ။

ဟိုတ်နူပရေၚ်ဗ္တိုက်ဏံတုဲ ပရေၚ်ပန်ပှော်ၜါလ္ပာ် က္တဵုဒှ်လဝ် ပွိုၚ်ဘာ်နာဍဳပြၚ်တုဲ ဟိုတ်နူဒပ်ပၠန်ဂတးတံ ဂွံလဝ်ကၠာတဲတုဲ လ္ပာ်ကံၚ်ဇြဳပၞာန် ဒးဂိလဝ်ရ။

အပ္ဍဲပရေၚ်ပန်ပှော် ၜါလ္ပာ်ဂှ် ကောန်ကၟိန်က္ဍိုပ်သ္ကိုပ်ပၞာန်မၚ်ကွာန် ပွိုၚ်ဍုၚ်ပဠဝ် လုပ်တိတ်အာကၠုၚ်ဒၟံၚ် ဗ္ဒိုပ်ဗၠာဲသၟိၚ်နွံ မၞုံယၟုဒေန်ဂါ အာယုက် ၂၀ သၞာံဂှ်လေဝ် ဒးအာမကမ် ချိုတ်အာလဝ်ရောၚ် သ္ဂးရ။

ပရေၚ်ဗ္တိုက်ဏံဂှ် တမ်ဒပ်စၟတ် (၁) ခရိုၚ်ဗိက်ကဵု ဒပ်ပံၚ်ကောံ ဒပ်စြေက် (၂) တမ်ဒပ် (၇) ဒပ်စဵုဒၞါကောန်ဂကူကရေၚ် KNDO တံ လုပ်စိုပ်ဗ္တိုက်လဝ်တုဲ လ္ပာ်ဒပ်ပၠန်ဂတးတံ ဇီုကပိုက်ကလိဂွံလဝ်ဝပ် ဟွံမွဲပုဟ်ဂှ် ဂွံတီကေတ်ရ။

ပ္ဍဲကဵုဍုၚ်ပလ လလောၚ်တြးလဝ် ပရေၚ်အုပ်ဓုပ်ပၞာန်ဂှ် စနူဂိတုဂျူလာၚ်တုဲကၠုၚ်တေံတုဲ ဗ္ဒိုပ်ဒပ်ကံၚ်ဇြဳပၞာန်တံ ဒးဒုၚ်ဗ္တိုက်ဒၟံၚ် မွဲဏှမွဲဏှတုဲ လ္ပာ်ကံၚ်ဇြဳပၞာန် ဇီုကပိုက်ချိုတ်တံ နွံဒၟံၚ်တုဲ ပရေၚ်ပၞာန်ၜါလ္ပာ် ဆက်ကြံၚ်မ္ၚိုဟ်ဒၟံၚ်ရ။

ပရိုၚ်−သြၚ်လောန်တိုၚ်(မ်)

ဗီု−CJ