ဗြဝတဳ၊ ဂျူလာၚ် ၃၀
အပ္ဍဲကဵုတွဵုရးကရေၚ် ဂၠံၚ်ကွဳစက် ဗြဝတဳ-ဝဝ်လေ လပါ်သၠုၚ်ကျာ ဍုၚ်ဗြဝတဳ ဒၞာဲကုန်ကျာ်ပိပ္ၚံက်ဂှ် ဟိုတ်နူဒးဒုၚ်ကြဳဗုမ် နူၜၚ်ကျာတုဲ ကျာ်ဇၞော်ဂဇအ်ဘာ ပဝ်စဴအာသွဝ်ဂှ် ရိုဟ်ကၞက်ပရိုၚ်ဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ဒပ်ပၞာန်ထပက်ပၞာန်ဗတိုက်မံၚ် ပ္ဍဲဒေသမေန်လက်ပါန်-ဖလူ လပါ်သၠုၚ်ကျာဗြဝတဳတံဂှ် ပရေၚ်ၜၚ်ကျာကြဳဗုမ်တံ ကၠောန်မံၚ်အရိုဟ်ဟ်တ္ၚဲနွံကီု၊ ဂိတုဂျူလာၚ် ၂၈ တုဲကၠုၚ်တေံလေဝ် ပ္ဍဲဂၠံၚ်ဗြဝတဳ-ဝဝ်လေဂှ် စွံပွန် ပတဝ်လဝ်ဒၞာဲကုန်ကျာ် ပိပ္ၚံက်တဝ်ဝ်တုဲ ကြဳဖျေံလဝ်ဗုမ်နွံရ။
ဟိုတ်နူဒပ်ပၞာန်သီအဝဵု ကြဳဖျေံဗုမ် ပံၚ် ၅၀၀ ဂှ်ရ စမြိုၚ်ဒၞာဲဘာလကျာ်တံလီုလာ်အာတုဲ ကျာ်ဇၞော်ဂဇအ်ဘာမွဲဇကု ပဝ်စဴအာသွဝ်ကီု ညးဍုၚ်ကွာန် ၂ တၠလေဝ် ဒးလဝ်ဝပ်ကီု ရိုဟ်ကၞက်ပရိုၚ်ဒေသတံ သ္ဂးရ။
အပ္ဍဲကဵုဂၠံၚ်တိုန် ဒဵုပိပ္ၚံက် ဗ္ဒာဲကွာန်ဖလူဂှ် အကြာပွိုၚ်တ္ၚဲတံဏံမ္ဂး ဒပ်ပၞာန်ဗၟာသွက်ဂွံကြဳဖျေံဗုမ် ဇၞော်ကဵုဇြဟတ်ဒှ်မာန်တုဲ ပ္ဍဲဗလးတိလေဝ် ပေါဲဗတိုက်အကြာၜါလပါ်ဆက်ဇီုကပိုက်အာမံၚ်နွံကီု ဟိုတ်နူပေါဲဗတိုက်ဒှ်ဂှ်ရ ညးဂြိပ်ဒဴပၞာန်တံလေဝ် ဒးဆက်ဆုဲပြံၚ်အာဒၞာဲဒၟံၚ်တံရောၚ် ညးကွာန်ဖလူမွဲတၠ ဟီုရ။
အပ္ဍဲဂိတုဂျူလာၚ် ၂၅ တေံ အကြာဒဵု လပါ်ပလိုတ်ကွာန်ဖလူ ဒၞာဲဗွိုၚ်ကမၠောန်ကျာဖျ DKBA တံဂှ် ကရောၚ်ပၞာန်ဒပ်ပၞာန်ဗၟာ ထပက်ဗတိုက်လုပ်ပန်သလိပ်တုဲ ရပ်ဂွံဏာ မၞိဟ်ကၠောန်ကမၠောန် ကျာဖျ ၇၀၀ ပြၚ်တံကဵု ကပေါတ်ဆက်စပ်တံရောၚ်။
ပရိုၚ် – သြၚ်လောန်တိုၚ်မ်
Photo – CJ