မတ်မလီု၊ အဝ်ဂါတ် ၆
ကံၚ်ဇြဳပၞာန်သီအဝဵုဝွံ သွက်ကောန်ပၞာန် ကေုာံ ကောန်ဒပ်ဂီုကၠီု စိုပ်မံၚ်မုက်ပၞာန်တံဂှ်ဂးတုဲ သွက်ဂွံကဵုဒါန် စၞစသုၚ်အိုတ်ဂှ် ကဵုဒၟံၚ်ဇြဟတ်ဂရိုဟ် ကုဌာနမဆေၚ်စပ် နွံသၟဝ်တဲတံ ဗွဲအနိၚ်အပိုၚ်ရောၚ် ညးမစုက်လုက်ကဵု ဌာနအလဵုသဳဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဟိုတ်နူပၞာန်ပၠန်ဂတး အလုံဍုၚ်မွဲတုဲ ကံၚ်ဇြဳပၞာန် ကျဒၟံၚ်ပၞာန်ဂှ်ဝွံ သွက်ဂွံကဵုဒါန် ကုကောန်ပၞာန်စိုပ်မုက်ပၞာန်တံဂှ်ဂးတုဲ မ္ၚးနူကဵုဗၞိက်တိတ်နူဒေသဇကုတံဂှ် ကဵုဇြဟတ်ဂရိုဟ် ကုဌာနဂမၠိုၚ်တုဲ အာတ်မိက်ဒၟံၚ်ရ။
ပြဝကံၚ်ဇြဳပၞာန်ဏံဂှ်ဝွံ ဇၟာပ်ပ်ပေါဲဗ္တိုက် ကောန်ဒပ်ဍေံတံ ဇီုကပိုက်ချိုတ်ဂၠိုၚ်ကၠုၚ်ဂှ်ကီု၊ ဖျေံကၠုၚ်လွဟ်တံ နွံဒၟံၚ်ကီုဂှ်တုဲ ဌာနမဆေၚ်စပ်ဂမၠိုၚ် နကဵုဗီုပြၚ်ထံက်ဂလာန်ကဵုဇြဟတ် ညးတံတုဲ သွက်ဂွံသၠုၚ်ပ္တိုန်စိုတ်ဓာတ်မာန်ဂှ် ပ္တိတ်ကၠုၚ်ဇြဟတ်ရ။
ဗိုလ်ဇၞော် လေန်ထက်အံၚ် သ္ပလဝ် CDM ဂှ် ပြဝကံၚ်ဇြဳပၞာန်ဏံဂှ်ဝွံ စပ်ကဵုကျဒၟံၚ်ပၞာန်ဂှ်တုဲ ဒှ်ပွဆသ္ဂောံတြးဝါဒမွဲရတုဲ ဒၟါနူဟွံဂွံထံက်ဂလာန် ညးဍုၚ်ကွာန်တံဂှ်တုဲ ဌာန်ဂအုပ်ပၞာန်ရးဨသာန် ဒးကျအာဂှ် ထ္ၜးဒၟံၚ်သက်သဳရောၚ် ပါ်ပါဲလဝ်ရ။
“အဓိကဂှ်တှ်ေ စပ်ကဵုကျဒၟံၚ်ပၞာန်လၟုဟ်တုဲ တြးလဝ်ဝါဒဏောၚ်ဂှ် အဲညာတ်ရ။ ဒှ်သာ်လဵုရောဟီုတှ်ေ လၟုဟ် ပ္ဍဲမုက်ပၞာန်တေံ ဒပ်ပၞာန်ဍေံတံ ဟွံဂွံထံက်ဂလာန်ညးဍုၚ်ကွာန်တံတုဲ ဒှ်ဒၟံၚ်စဵုကဵုဒးဆောံလေၚ်အာ ဌာန်ဂအုပ်ပၞာန်ရးတံဂှ်ရ ညအ်ဂှ်ဒှ်ဒၟံၚ်အဓိကရ။ အေ ဂှ်တှ်ေ ပ္ဍဲကဵုဟိုတ်ဒးကျပၞာန်ဂမၠိုၚ် ဒၟါနူဟွံဂွံထံက်ဂလာန်ညးဍုၚ်ကွာန်ဏံမွဲဂှ် ဒှ်တၚ်နၚ်အဓိကရ။ ဟိုတ်ဂှ်ရ နူကဵုညးဍုၚ်ကွာန်တံ ကၠောန်ကဵုဒၟံၚ်ဗီုဏံဏောၚ် နကဵုညးတံ ဒှ်သဘဴတြးဝါဒရ။ ဆ္ဂး ပွမတြးဝါဒဏံဂှ် ဒှ်ပွအံၚ်ဇၞးဟွံသေၚ်ပုဟ်” သာ်ဝွံ သ္ဂးရ။
သ္အာၚ်နူဂှ်ပၠန် နကဵုကံၚ်ဇြဳပၞာန် ဌာနမဆေၚ်စပ်တံ မပါလုပ် သီုကဵုညးဍုၚ်ကွာန်ဂမၠိုၚ် ကဵုဒၟံၚ်ဒါန် ဗၞိက်စၞစသုၚ် ညံၚ်ကောန်ပၞာန်ညးတံ စိုတ်ဓါတ်ဂွံၚုဟ်က္တဵုဂးတုဲ တြးဒၟံၚ်ဝါဒကီုလေဝ် ဒၟါနူဟွံကလိဂွံထံက်ဂလာန်ညးဍုၚ်ကွာန်တံဂှ်ရ နတဲဏံ ဒှ်ဟွံမာန်ပုဟ်ဂှ် ညးဆက်ဟီုရ။
ညးယိုက်ဝန် CDM မွဲတၠဂှ်လေဝ် ကံၚ်ဇြဳပၞာန်ဝွံ ကဵုဇြဟတ်ဂရိုဟ် ကုညးယိုက်ဝန်တံ ဂၠိုၚ်တုဲ အခိၚ်ကာလကြေပ်ဂြတ်ဒၟံၚ်ဏံ ကဵုညးယိုက်ဝန်ဂမၠိုၚ် ကဵုဒါန်သွက်ကောန်ပၞာန်ညးတံဟီုဂှ် ဒှ်ဒၟံၚ်သဘဴ ဒးကဵုဒၟံၚ်နကဵုသဒ္ဓါဟွံအးတံရောၚ် ပါ်ပါဲလဝ်ရ။
“ညးယိုက်ဝန် Non CDM တံဂှ်တှ်ေ လၟုဟ်ဂှ်ဇြဟတ်ဂရိုဟ်ဂၠိုၚ်ကွေံကွေံဏောၚ်။ ကဵုဒးကၠောန်ကဵု သြန်ဂိတုဂှ်လေဝ် ဟွံရုမ်ဂပ်ပုဟ်။ လှုဲဂလိုၚ်ပ္တိုန်ကဵုလဝ်တံဂှ်လေဝ် ၜိုတ်လဵုကဵုကဵု ဟွံရုမ်ပုဟ်။ အကြာဏံဂှ် ကဵုပရၚ်တဲ ကဵုဒါန်သြန် ကုကောန်ပၞာန် စိုပ်ဒၟံၚ်မုက်ပၞာန်တံဂှ် ကၠာတေံဂှ်တှ်ေ စေတနာနွံတုဲ ကဵုလဝ်အိုတ်ရ။ လၟုဟ်ဂှ် အကြာပရေၚ်စသုၚ်မံၚ်စံၚ်ကြေပ်ဂြတ်ဒၟံၚ် အကြာဟွံမွဲ ဒးဖာဲကဵုမံၚ်ဂှ်တှ်ေ အခိၚ်ဓဝ်ပတှ်ေဟွံမွဲ ဒးကဵုဂှ်ဝွံ ဒှ်ဒၟံၚ်သဘဴ ဒးကဵုဒၟံၚ်သဒ္ဓါအးအးဟွံသေၚ်ရ” သာ်ဝွံ ဟီုတဴရ။
သ္အာၚ်နူဂှ်ပၠန် ညးယိုက်ဝန် နူဌာနမဆေၚ်စပ်ကၠာတေံဂှ်ဝွံ ကမၠောန်ဌာနမဆက်စပ်ကဵုညးတံသၟးရ ကၠောန်ကၠုၚ်လဝ်တုဲ လၟုဟ်ဂှ်တှ်ေ ကမၠောန်ဟွံဆက်စပ်ကဵုဌာန ဒးကၠောန်ကဵုဒၟံၚ် သီုအရၚ်ဒပ်ပၞာန်ဂှ်ဝွံ ဒှ်ဟွံထေက်ပုဟ်ဂှ် ညးဆက်ဟီုရ။
အခိၚ်လၟုဟ် ကံၚ်ဇြဳပၞာန်ဝွံ ကဵုကၠုၚ်ဇြဟတ်ဂရိုဟ် ကုဌာနမဆေၚ်စပ်ဂမၠိုၚ် သွက်ဂွံကဵုဒါန် သွက်ကောန်ပၞာန်ညးတံဂှ်ရ နူဌာနမဆေၚ်စပ်တံဂှ်တှ်ေ အလဵုညးတံ ဟွံကဵုဒါန်ရတုဲ ကော်ကေတ်တၠကမၠောန်ဂမၠိုၚ်တုဲ ဒုၚ်ဒၟံၚ်ဒါန်တံ နွံဒၟံၚ်ရောၚ် သြၚ်လောန်တိုၚ်(မ်) ဂၠိုက်ဂၠါဲဂွံတီကေတ်ရ။
ဟိုတ်နူပၞာန်ပၠန်ဂတးတုဲ ဒပ်ကံၚ်ဇြဳပၞာန် ဇၟာပ်ဗ္တိုက်ကျဒၟံၚ်ဂှ်ဝွံ နူကဵုလိက်ပရိုၚ်တြးဝါဒ ညးတံထိၚ်ဒက်လဝ်ဂှ် ညးဍုၚ်ကွာန် ကေုာံဌာနမဆေၚ်စပ်ဂမၠိုၚ် ကဵုဒၟံၚ်ဒါန် ကုကောန်ပၞာန်စိုပ်မုက်ပၞာန်တံ စၞစသုၚ်ဂမၠိုၚ် ကြပ်အရိုဟ်ဒဒှ်တ္ၚဲရောၚ်ဂးတုဲ တြးဒၟံၚ်ဝါဒတံ နွံဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီု−MOI