ဗြဝတဳ၊ ဂျူလာၚ် ၃၀
ညးတာလျိုၚ်သ္ကိုပ်ဒပ် နွံသၟဝ်တဲဒပ်ပၞာန်သီအဝဵုမွဲတၠ ဂကောံဒပ်မၚ်ပယျဵု BGF ကု ဒုသ္ကိုပ်ပၞာန် သဝ်မုက်တုၚ်ဂှ် နူကဵုအလဵုအသဳသေံစောဲစပ်လဝ် ပရေၚ်ကူသာန်သွံမၞိဟ်နွံတုဲ ပတိတ်လိက်အမိၚ်ဝရန်ရပ်ရဂှ် ဂွံတီကေတ် အတိုၚ်လိက်အမိၚ် မံက်တိတ်တေံရ။
နကဵုအမှုပရေၚ်ကူသာန်သွံမၞိဟ်သွက်ဂွံရပ်အာ ဒုသ္ကိုပ်ပၞာန် သဝ်မုက်တုၚ် သ္ကိုပ်ဒပ်စၟတ် ၄ BGF ဂှ် ရုၚ်သၞောဝ်ဓရ်ရာဇဝတ်သေံ ပတိတ်လိက်အမိၚ် နကဵုစၟတ်တ္ၚဲ ဂိတုဂျူလာၚ် ၂၇ တေံ မဒှ်ရ။
အတိုၚ်လိက်စၟတ်သမ္တီပရေၚ်ဒုဟ်စရိုတ် နူကဵုသ္ကိုပ်ဌာန်စၟဳစၟတ်ဂၠိုက်ဂၠာဲတၟေၚ် DSI သေံမ္ဂး ဒုသ္ကိုပ်ပၞာန် သဝ်မုက်တုၚ်ဝွံ သွက်ဂွံကၠောန်ပရေၚ်ပကီုပရာတ် ကမၠောန်ကူသာန်သွံမၞိဟ်တံဂှ် ပံၚ်တောဲပတိတ်လဝ်ကသပ် ကုညးတၞဟ်ဟ်တံကီု၊ ဒက်ပ္တန်ဂိုဏ်ရာဇဝတ်တတ်ၜက်ရးနိဂီုဍုၚ်တုဲ ကော်ပၠုပ်နၚ်လဝ်အပ္ဍဲဍုၚ်သေံ (ဟွံသေၚ်မ္ဂး) ဗလးပတိတ်ဏာလပါ်ဍုၚ်သအာၚ် ဖန်ဖက်ကၠောန်လဝ် ညံၚ်မၞိဟ်တံဂွံဒးဒုၚ်ဂိဆောံလေၚ် ဂွံစိုပ်အာသၟဝ်တဲ သြဇာအဝဵုဟွံမွဲကဵုဗဗွဲဓရ်တံ ကေုာံ ပွမရီုဗၚ်ဖျေံစွံကဵုလဝ်ဒၞာဲဝါဲ သွက်ရဲကူသာန်သွံမၞိဟ်တံရောၚ် ဂွံတီကေတ်ရ။
နူကဵုသေံတံ ပတိတ်လဝ်ဝရာန်ရပ်ကု ဒုသ္ကိုပ်ပၞာန် သဝ်မုက်တုၚ်ကီုလေဝ် က္ဍိုပ်သ္ကိုပ်အဆံၚ်သၠုၚ် BGF တၞဟ် သ္ကိုပ်ပၞာန် သဝ်ချေတ်တူ မွဲဂှ်တှ်ေ ပရေၚ်ပတိတ်လဝ်အမိၚ်ဝရာန် သွက်ဂွံရပ်ဂှ်ဟၟဲဏီပုဟ်။
အပ္ဍဲကဵုဒေသ ပွိုၚ်ဍုၚ်ဗြဝတဳ တွဵုရးကရေၚ်မ္ဂး က္ဍိုပ်သ္ကိုပ်အဆံၚ်သၠုၚ် BGF သ္ကိုပ်ပၞာန် သဝ်ချေတ်တူ၊ ဒုသ္ကိုပ်ပၞာန် သဝ်မုက်တုၚ်တံဂှ်ပါလုပ်ဆက်စပ်မံၚ်ကဵု ကမၠောန်ဝေၚ်ဇျှၚ်လီဠာန်အန်လာၚ်တံတုဲ စဵုကဵုအခိၚ်လၟုဟ်ဏံလေဝ် ကမၠောန်လီသြန်အန်လာၚ်ကျာဖျတံဂှ် ညးတံဆက်ကၠောန်မံၚ်ဖိုဟ်ရ။
ဒၞာဲကျာဖျ BGF မၚ်မွဲစဵုဒၞာဲကဵုလဝ် ပရေၚ်ဂီုကၠီုတံမ္ဂး ဒပ်ပၞာန်သီအဝဵုလုပ်ရပ်သီကေတ်လဝ်ကီုလေဝ် ပရေၚ်ဒပ်ပၞာန်ဗမာတံကၠောန်မံၚ်တံဂှ်တှ်ေ ဒှ်မံၚ်ကမၠောန်ဆၜိုတ်ထ္ၜးစဗီုပြၚ်သၟးရတုဲ ပ္ဍဲအရာပ်လ္တူဍုၚ်ဗြဝတဳတံဂှ် ကမၠောန်ကျာဖျ ဒုသ္ကိုပ်ပၞာန် သဝ်မုက်တုၚ် ဆက်နွံမံၚ်ဖိုဟ်ရောၚ် ပရိုၚ်ရိုဟ်ကၞက်ဗြဝတဳတံ ဟီုရ။
ဒုသ္ကိုပ်ပၞာန် သဝ်မုက်တုၚ် ညးကဵုဒၟံၚ်အရီုဗၚ်ပၞာန်ကုဒပ်ပၞာန်ဗၟာတံ ဂၠိုၚ်ကဵုဝါနွံမံၚ်တုဲ အပ္ဍဲပရေၚ်ထပက်ပၞာန် ဗတိုက်မံၚ် ဒေသလပါ်သၠုၚ်ကျာ ဗြဝတဳတံဂှ် ပံၚ်တောဲလဝ်ကဵုဒပ်ပၞာန်တုဲ ဗက်အာဗတိုက်မံၚ် ဂကောံဒပ်ပၠန်ဂတးတံရောၚ် ဂွံတီရ။
ပရိုၚ် – သြၚ်လောန်တိုၚ်မ်
Photo – KHRG/ SAC Telegram