သဓီု၊ ဂျူလာၚ် ၃၀
အပ္ဍဲအကြာအရာပ် လတူဍုၚ်သဓီုတံဂှ် ဒပ်မၚ်ကွာန် ပျူသဝ်ထဳကဵု ဒပ်ပၞာန်သီအဝဵုတံ အပ္ဍဲအကြာပွိုၚ် ၂ တ္ၚဲဏံဂှ် ရပ်ဏာပဝ်တာသၟတ် ၁၀ တၠတံနွံတုဲ ချုက်စွံစုတ်လဝ်ထုက်တုၚ်ရောၚ် ဂွံတီကေတ် နူကဵု ရဲလ္တူဍုၚ်တံရ။
အပ္ဍဲဂိတုဂျူလာၚ် ၂၆ -၂၇ တံဂှ် ဂကောံပျူသဝ်ထဳ ဖိုဝ်ထူ က္ဍိုက်ပ်တံ ပံၚ်တောဲကဵုဂကောံဒပ်ပၞာန်တံတုဲ ပ္ဍဲအကြာအရာပ် လတူဍုၚ်တံဂှ် စိုပ်ကၠုၚ်အခိၚ်သဝ်တ္ၚဲအခိၚ်ဗ္တံမ္ဂး ညးတြုံၜါတၠ ဍိုက်ကၠုၚ် ကွဳလိုန်ဓါတ်တံကီု သၟတ်ရဲစဴနူကမၠောန် အခိၚ်ဗ္တံတံကီု ဂေတ်မံၚ်ကဵု ကွဳစက်ဍောတ်တ်တံတုဲ ဗက်ဂၠာဲရပ်မံၚ်ရောၚ် သ္ဂးရ။
အတိုၚ်အမိၚ်ကၠုၚ်နူ သ္ကိုပ်ပရေၚ်အုပ်ဓုပ်ပွိုၚ်ဍုၚ်ဂးတုဲ ဂကောံဖိုဝ်ထူတံဂှ်တှ်ေ ညံၚ်ရဴဂွံလဝ်အခေါၚ်အဝဵုပေၚ်ၚ် ဗက်ဂၠာဲရပ်မံၚ်ကီု ရပ်ချုက်လဝ်သၟတ်တံစုတ်လဝ်ကဵုထုက်တုၚ် ခြိုၚ်စွံလဝ် ပ္ဍဲဒၞာဲရုၚ်ဌာနဗြဲကျာတြေံ နွံကရပ်ဗ္ဒာဲ ရုၚ်ဗဂဵုလဟဵုဂှ်တုဲ စၞလေဝ်ဟွံဗစ၊ ဍာ်လေဝ် ဟွံကဵုသုၚ်ပုဟ် ရဲဍုၚ်သဓီုမွဲတၠ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
သၟတ်ဒးဒုၚ်ရပ်တံဏံဂှ်တှ်ေ နွံမံၚ်အာယုက်အကြာ ၂၀ ကဵု ၃၀ သၞာံတုဲ မံၚ်ဒၟံၚ်အရာပ်နန်ခေဝ်၊ ကၟာကရုတ် တံရောၚ် သ္ဂးရ။
ပရေၚ်ရပ်မံၚ်ပဝ်တာ သွက်ယိုက်ဝန်ပၞာန် ပ္ဍဲသဓီုတံဂှ် ရဲသၟဝ်တဲဒပ်ပၞာန် ဂကောံဒပ်မၚ်ကွာန် က္ဍိုပ်ဖိုဝ်ထူတံ ကၠောန်မံၚ်တုဲ ဟိုတ်နူပရိုၚ်ပရေအ်ပရေအ်ဍေံ ပြာကတ်ဂၠိုၚ်မံၚ်တုဲ ဂွိၚ်ဖေက် PDF တံ ကၠုၚ်ဂစိုတ်ဍေံဂှ်ရ ဒးပါဲပြံၚ်မံၚ် ဒၞာဲဝါဲတံရောၚ် ဂွံတီရ။
သၟတ်ဒးဒုၚ်ရပ်လဝ်တံဏံ ယဝ်ရမိက်ဂွံကဵုဗၠးစဴမ္ဂး အာတ်လဝ်သြန် မွဲတၠ ၂၀၀ ကိုတ်ဒကေဝ်နွံတုဲ ရဲကဵုသြန်ဟွံမာန်တံဂှ် ဒးဒုၚ်ပလံၚ်ဏာဒၞာဲဌာန်ပကောံကောန်ပၞာန် အရာပ်မုဟ်ပန် ဍုၚ်မတ်မလီုရောၚ် သ္ဂးရ။
ညးတံၚ်ရပ်မံၚ်ပဝ်တာ ဓရတ်အာတ်ကေတ်မံၚ်သြန် ပ္ဍဲကဵုသဓီုဏံဂှ်တှ်ေ ပျူသဝ်ထဳ ဖိုဝ်ထူ၊ ဒုသ္ကိုပ်ဗၠာဲသၟိၚ်ဇၞော် မျေအ်နိုၚ်၊ သ္ကိုပ်ပရေၚ်အုပ်ဓုပ်ပွိုၚ်ဍုၚ် သိုဝ်မေန်တံဂှ် ဂကောံပၠန်ဂတးတံညံၚ်ဂွံကေတ်ကဵုအရေဝ် သ္အးဇ္ၚးကဵုပြဟ်ဟ်ညိဂှ် ညးဍုၚ်ကွာန်တံ နွံမံၚ်ပၟိက်ကွေံကွေံရောၚ်။
အပ္ဍဲဂိတုဂျောန် ၂၃ တေံလေဝ် ပ္ဍဲကွာန်ဝင်စိၚ် ပွိုၚ်ဍုၚ်သဓီုဂှ် နူကဵုဒပ်ပၞာန် လုပ်ကၠုၚ်အပ္ဍဲကွာန်တုဲ ကၠေၚ်ရပ်ဏာ ကောန်ကွာန် ၈ တၠတံဏီရောၚ် ဂွံတီကေတ်ရ။
ပရိုၚ် – သြၚ်လောန်တိုၚ်မ်
Photo – Social Media