ဒပ်ကံၚ်ဇြဳပၞာန် ရပ်ဒက်စၟဳတ်ဒၟံၚ် ဗၠာဲသၟိၚ်ထိၚ်ရးသဓီု ၜါတၠ

သဓီု၊ အဝ်ဂါတ် ၂၃

ကောန်ဒပ်ဗၠာဲသၟိၚ်ထိၚ်ရးၜါတၠ နူကဵုဗ္ဒိုပ်ဗၠာဲသၟိၚ်တိဍာ်သုဓမ္မဝတဳ ဍုၚ်သဓီု တွဵုရးဍုၚ်မန်ဂှ် ဒပ်ကံၚ်ဇြဳပၞာန် ရပ်ဒက်စၟဳတ်ဒၟံၚ်ရောၚ် ဂွံတီကေတ် အတိုၚ်ဂလာန် ညးမစုက်လုက်ကဵု ဒပ်ဗၠာဲသၟိၚ်တံရ။

ဗၠာဲသၟိၚ်ထိၚ်ရး ဌေလှိုၚ်ထောန်ကဵု အံၚ်ကိုဝ်မေန်ၜါတၠဂှ် တုဲကၠုၚ်အပ္ဍဲဂိတုအဝ်ဂါတ် သတ္တာဟဒုတိယတေံ ဒပ်ကံၚ်ဇြဳပၞာန် ကၠုၚ်စိုပ်ရပ်ဒက်ဏာလဝ် ပ္ဍဲဗ္ဒိုပ်ရ။

ဒပ်ကံၚ်ဇြဳပၞာန်ဂှ်တှ်ေ ဗၠာဲသၟိၚ်ထိၚ်ရး ဒးဒုၚ်ရပ်လဝ်ဏံ ၜါတၠဂှ်ဝွံ နကဵုတၚ်စောဲစပ် ထံက်ပၚ်လဝ်သြန် ဇရေၚ်ဒပ်စဵုဒၞါညးဍုၚ်ကွာန် PDF တံဂးတုဲ ရပ်ဒက်လဝ်ရ။

အခိၚ်လၟုဟ် စၟဳတ်သၟာန်သၟုက်ဒၟံၚ် ညးတံၜါတၠ ပ္ဍဲကဵုဒၞါဲစၟဳတ်ဒပ် ဘာတန်ဗ္တောန်ကွတ်ပၞာန်သ္ဇိုၚ် စၟတ် (၉) ဖျေံသ္ဇိုၚ်သဓီုတံဂှ် ဂွံတီကေတ်ရ။

လအာတုပ်သာ်ဂှ်ကီု တုဲကၠုၚ်ပ္ဍဲဂိတုအဝ်ဂါတ် ၁၆ တေံဂှ်လေဝ် နကဵုတၚ်စောဲစပ် ထံက်ပၚ်သြန်၊ ကဵုပရိုၚ် ဇရေၚ် PDF တံဂှ်ဂးတုဲ ဒပ်ကံၚ်ဇြဳပၞာန် ရပ်ဒက်စၟဳတ်ဒၟံၚ် သ္ကိုပ်ဒပ်ဗၠာဲသၟိၚ်ပွိုၚ်ဍုၚ်ကျာ်ထဝ် သ္ကိုပ်ဗၠာဲသၟိၚ် ဇြဝ်ဝ် မဒှ်ရ။

တုဲကၠုၚ် ပ္ဍဲဂိတုမေတေံ နကဵုတၚ်စောဲစပ် ကဵုဒၟံၚ်ပရိုၚ် ဇရေၚ် PDF တံဂှ်တုဲ ဒပ်ကံၚ်ဇြဳပၞာန် ရပ်ဒက်လဝ် ကောန်ဒပ်ဗၠာဲသၟိၚ်ပိတၠ နူကဵုဗ္ဒိုပ်ဗၠာဲသၟိၚ်ၝောံဍုၚ်ကျာ်ထဝ်ဂှ်တုဲ ဖျေံစၟတ်လဝ်ဒဏ်ထံၚ် ထပှ်သၞာံဂှ် ဂွံတီကေတ်ရ။

ပရိုၚ်−သြၚ်လောန်တိုၚ်(မ်)

ဗီု−Social Media