တၞၚ်သဳ၊ အဝ်ဂါတ် ၂၃
ပ္ဍဲရးတၞၚ်သဳ ပ္ဍဲပွိုၚ်ဍုၚ်တၞၚ်သဳဂှ် ပေါဲဗ္တိုက်က္တဵုဒှ်ဟွံမွဲမွဲသာ် ဒပ်ကျာကံၚ်ဇြဳပၞာန် ထောံဒၟံၚ်မခတိုဟ် ကုကွာန်ဂမၠိုၚ် နကဵုက္ၜၚ်ကျာ အဆက်က်ဂှ် ဂွံတီကေတ် ဇရေၚ်ညးဒေသတံကဵု ဂကောံဇြဟတ်ပၠန်ဂတးတံရ။
စနူဂိတုအဝ်ဂါတ် သတ္တာဟပထမတုဲ က္တဵုဒှ်လဝ်ပေါဲဗ္တိုက်ဟွံမွဲမွဲသာ် လ္ပာ်ဒပ်ကံၚ်ဇြဳပၞာန် ထောံလဝ်မခတိုဟ် ပ္ဍဲကဵုကွာန် (သကျက်၊ ဆင်းခေါင်၊ ကျောက်မိကျောင်း၊ ဂဏန်းကွင်း၊ ကွင်းသစ်၊ ညောင်ပင်းကွင်း၊ ထုံမခါ ) တံ ကဵုက္ၜၚ်ကျာဂျက် ပါလုပ်သီုကဵု Mi-2 ကဵု K8W တံ ဟွံအောန်နူကဵု ၅ ဝါရ။
သ္အာၚ်နူဂှ်ပၠန် ပ္ဍဲဂိတုအဝ်ဂါတ် ၂၀ အခိၚ်လဒေါဝ်တ္ၚဲဂှ်လေဝ် ပ္ဍဲပွိုၚ်ဍုၚ်တၞၚ်သဳ ကွာန်ထုံမခါဂှ် က္တဵုဒှ်ပေါဲဗ္တိုက်ဟွံမွဲမွဲသာ် ကံၚ်ဇြဳပၞာန် ထောံဏာလဝ်မခတိုဟ် နကဵုက္ၜၚ်ကျာဗ္တိုက် ဂျက်ဖိုက်တာ K8W ရ။
ဟိုတ်နူကံၚ်ဇြဳပၞာန် ထောံမခတိုဟ် ဗ္တိုက်ကဵုပၞာန်ကျာတံတုဲ ညးဒေသ နူကဵုကွာန်လ္ၚဵုတံဂှ်ဝွံ ဟွံဂံၚ်မံၚ်အပ္ဍဲကွာန်ရတုဲ ဒးပါဲမံၚ်ဒၟံၚ် ပ္ဍဲကဵုကွာန်ကြပ်ပ်တံကဵု ပ္ဍဲဒဵုဂြိုပ်တံဂှ် ဂွံတီကေတ် အတိုၚ်ဂလာန် ညးမရီုဗၚ်ကဵုဒၟံၚ် ပရေၚ်ပါဲဒဴဘဲပၞာန်တံရ။
မၞိဟ်တြုံဒေသ ဟွံမိက်ထ္မံက်ယၟုမွဲတၠဂှ် ဟိုတ်နူကံၚ်ဇြဳပၞာန် ထောံမခတိုဟ်ဗ္တိုက်ကဵုပၞာန်ကျာတံဂှ်တုဲ ဒးထောံသ္ၚိထောံကၠအ် ဒးဂြိပ်ဒဴပါဲဒလေတ်ဒၟံၚ်သၟးဟွံက အခိၚ်လဵုက္ၜၚ်ကျာကၠုၚ်ဂှ် ဒးဂွိၚ်ဒှ်ဒၟံၚ်ဓဝိၚ်ရောၚ် ဟီုရ။
ပရေၚ်ဗ္တိုက်ပၞာန်ကျာ ကံၚ်ဇြဳပၞာန်ဂှ်ဝွံ ဟိုတ်နူမိက်ဂွံပါ်ထ္ကးဆီ အကြာညးဍုၚ်ကွာန်ဒေသတံကဵု ဂကောံဇြဟတ်ပၠန်ဂတးတံတုဲ ကၠောန်လဝ်တုဲ ဟွံတီကေတ် ဒၞါဲပွန်ဂကောံဇြဟတ်ပၠန်ဂတးတံ ချိုတ်တ်ပၠိုတ်တ်မွဲသာ် ဒၟါနူပရိုၚ်သၟဝ်တိဏံတုဲ ထောံလဝ်မခတိုဟ် ဒှ်ဒၟံၚ်သာ်ဏံဏောၚ်ဂှ် ညးဒုၚ်တာလျိုၚ် လလောၚ်ပရိုၚ် ဂကောံဒပ်နဂါနဳ ကိုဝ်နဂါ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
မွဲလ္ပာ်ဂှ်ပၠန် အပ္ဍဲပရေၚ်ဗ္တိုက်ထောံမခတိုဟ်ဂှ် ညးဍုၚ်ကွာန်ကောန်အရာပ် ချိုတ်အာတံ ဟွံမွဲကီုလေဝ် ညးဒေသမွဲတၠ ဇီုကပိုက်ကလိဂွံလဝ်ဝပ်သၟးဟွံက ဘာလကျာ်၊ သ္ၚိဒၟံၚ်လ္ၚဵု ဇီုကပိုက်လီုလာ်အာတံ နွံလဝ်ရောၚ် ဂွံတီကေတ် အတိုၚ်ဂလာန် ဂကောံဇြဟတ်ပၠန်ဂတးတံကဵု ညးဒေသတံရ။
ကွာန်ဂမၠိုၚ် နူကဵုပွိုၚ်ဍုၚ်တၞၚ်သဳတံဂှ်ဝွံ ပ္ဍဲဂိတုတုဲကၠုၚ်တေံ ဟိုတ်နူဍာ်ဇၞော်တုဲ ကြပ်အလုံပွိုၚ်ဍုၚ်မွဲ ဒးလဝ်ဘဲဍာ်တုဲ အခိၚ်လၟုဟ်လေဝ် ဟိုတ်နူကံၚ်ဇြဳပၞာန် ထောံမခတိုဟ်ဗ္တိုက်လဝ် နကဵုတရဴကျာတံဂှ်တုဲ ညးဒေသဂမၠိုၚ်ဝွံ ဗီုပြၚ်ညးကုညး ဒးပါဲဒလေတ်ဒၟံၚ် ပ္ဍဲကဵုဒဵုဂြိုပ်တံဂှ် ညးတာလျိုၚ် ဂကောံရီုဗၚ်ပါဲဒဴဘဲပၞာန် နွေဥူမေတ္တာ ဟီုရ။
ပ္ဍဲရးတၞၚ်သဳဂှ် တုဲကၠုၚ်အပ္ဍဲဂိတုဂျူလာၚ်တေံ မ္ၚးနူကဵု ကံၚ်ဇြဳပၞာန် ထ္ပက်ပၞာန်လုပ်စိုပ်တံကဵု ပေါဲဗ္တိုက်ဇမၠိၚ်တံဂှ် ဟိုတ်နူပရေၚ်ဗ္တိုက်ပၞာန်ကျာတံတုဲ ညးဒေသ စဵုကဵု ၆၃၆၀၀ ပြၚ် ဒးဂြိပ်ဒဴပါဲဒလေတ်ဒၟံၚ်ရောၚ် ဂွံတီကေတ် အတိုၚ်လိက်ဒုၚ်စဳရေၚ် ဂကောံသုတေသန FE5 Thanintharyi ရ။
ပရိုၚ်−သြၚ်လောန်တိုၚ်(မ်)
ဗီု−ကရောၚ်ပၞာန်ပံၚ်ကောံစဵုဒၞါညးဍုၚ်ကွာန်