နေဗျဳဒဝ်၊ အဝ်ဂါတ် ၃၁
ဂကောံပၞာန် ကၠောန်ကၠုၚ်ပေါဲရုဲမာဲ နဒဒှ်ပၞော်တိတ်လက္ကရဴအိုတ်ဏောၚ်ဂှ်ရ နကဵုညးတံ ၜိုတ်သၠုၚ်ပ္တိုန်အသိၚ်ပၞာန်မာန် သၠုၚ်ပ္တိုန်တုဲ သွက်ဂွံပလေဝ်ပလေတ်လဝ် လ္ဂောံကဵုပရေၚ်ဍုၚ်ကွာန်တံဂှ် နွံပၟိက်ရောၚ် သ္ကိုပ်ဝန်ဇၞော်အလဵုအသဳညဳသၟဟ်ဂကူ NUG ဟီုရ။
ပ္ဍဲကဵုကောံဓရီုအလဵုအသဳ အလဵုအသဳညဳသၟဟ်ဂကူ မကၠောန်ဗဒှ်လဝ် ပ္ဍဲဂိတုအဝ်ဂါတ် ၂၇ ဂှ် သ္ကိုပ်ဝန်ဇၞော်ကၟိန်ဍုၚ် NUG မာန်ဝေန်ခိုၚ်တာန် ဟီုလဝ်ဂလာန်ရ။
ၜိုတ်သၞာံဂတဏံ ဂကောံပၞာန် ကၠောန်ကၠုၚ်ပေါဲရုဲမာဲပ္တောံဏံတွဵုဏောၚ်တုဲ ကၟိန်ဍုၚ်လ္ၚဵု မထံက်အာဂလာန် ဂၠံၚ်တရဴပေါဲရုဲမာဲဂှ်လေဝ် နွံဒၟံၚ်ဂှ်ရ ဂၠံၚ်ဂွံဂှ် ကၠောန်ကၠုၚ်ဏောၚ်ဂှ် သ္ဂးရ။
နကဵုညးတံ ချပ်ဗ္စာကိစ္စဏံ ချိုတ်တ်ပၠိုတ်တ်တုဲ မွဲလ္ပာ်ဂှ် ၜိုတ်သၠုၚ်ပ္တိုန်အသိၚ်ပၞာန်မာန် သွက်ဂွံသၠုၚ်ပ္တိုန် မဒှ်တုဲ မွဲလ္ပာ်ဂှ်ပၠန်လေဝ် သွက်ဂွံပလေဝ်လဝ် လ္ဂောံကဵုပရေၚ်ဍုၚ်ကွာန်ဂှ်လေဝ် နွံပၟိက်ရောၚ် သ္ကိုပ်ဝန်ဇၞော် ဟီုလဝ်ရ။
ကိုဝ်အေမေန်ထောန် ညးဒုၚ်တာလျိုၚ် ခရိုၚ်သဓီု ဒပ်ပၞာန်စဵုဒၞါညးဍုၚ်ကွာန် PDF ဖျေံသ္ဇိုၚ်သ္ကုတ်သၠုၚ်ကျာကၟိန်ဍုၚ်ဂှ် စပ်ကဵုပရေၚ်ပၞာန်တုဲ ၜိုတ်ဒးပလေဝ်ပလေတ်ထေက်ဂှ် ပလေဝ်ပလေတ်လဝ်တုဲယျဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“နကဵုဒပ် PDF ပိုယ်တံ စပ်ကဵုပေရၚ်ပၞာန်တုဲ ၜိုတ်ပလေဝ်ပလေတ်ထေက်ဂှ် ပလေဝ်ပလေတ်လဝ်ဖအိုတ်ရ။ ဗီုလဵုရောဟီုတှ်ေ ပိုယ်တံ သွက်ဂွံဗ္တိုက်အာ ဗွဲမသၟဟ်အစောံရဏောၚ်။ ဗီုဟီုလဝ်ဂှ်ရ ဂၠံၚ်သီုဖအိုတ်ဂှ် ပ္တဝ်အာနေဗျဳဒဝ်ရဏောၚ်” သာ်ဝွံ သ္ဂးရ။
ကိုဝ်ဇြေယျလွေန် ညးဒုၚ်တာလျိုၚ် 96 Soldiers PDF မဒှ်ဂကောံပၠန်ဂတးရပ်လွဟ် ဒေသအညာဂှ် သွက်ဂွံကလေၚ်ခၠေဝ် ကုပေါဲရုဲမာဲဂှ် စပ်ကဵုပရေၚ်ပလေဝ်ပလေတ် ပရေၚ်ဍုၚ်ကွာန်၊ ပရေၚ်ပၞာန်တုဲ ဂကောံပံၚ်ဇဳ သွက်ဂွံပါလုပ်ဂှ် နွံပၟိက်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ဆ္ဂး ကိစ္စပိုယ်တံ ပလေဝ်ပလေတ်ဟီုဂှ် စိုပ်ဗၞတ်ၜိုတ်လဵုရော။ ပရေၚ်ပၞာန်မ္ဂးလေဝ် အပြံၚ်အလှာဲပရေၚ်ပၞာန်၊ ပရေၚ်ဍုၚ်ကွာန်မ္ဂးလေဝ် အပြံၚ်အလှာဲပရေၚ်ဍုၚ်ကွာန်။ နတဲစှ်ေစှ်ေ ဂှ် စိုပ်ၜိုတ်လဵုရော လၟေၚ်ကမၠောန်တံဏံဂှ်လေဝ် ပိုယ်တံ ချပ်ညးသ္ကအ်ချိုတ်တ်ပၠိုတ်တ်ထေက်ဂှ် ထေၚ်ကေတ်ရ။ ဒၞါဲဏံ ဂကောံနာနာ ဒးပါလုပ်ဏောၚ်ဂှ် အဲညာတ်ကေတ်ရ” သာ်ဝွံ သ္ဂးရ။
ပြဟ်ဟ်ဏံ ပ္ဍဲကဵုတိဍာ် ကံၚ်ဇြဳပၞာန် ဒးဗလးလဝ်တဲတံဂှ် နွံကၠုၚ်ဗ္ဒါဲ ၈၀ ဍုၚ်ဂှ်ရ တိဍာ်ဗၠးၜးတံလေဝ် နွံဒၟံၚ်ဗွဲမဂၠိုၚ်ဂၠေၚ်တုဲ ဆက်စပ်ကဵုဒေသတံဏံတုဲ ဒးချပ်ထေက်ဂှ် ညးထံက်ထ္ၜးလဝ်ရ။
ကံၚ်ဇြဳပၞာန်ဂှ်တှ်ေ သၞာံဂတဏံ ပ္ဍဲဂိတုနဝ်ဝေမ်ဗာတေံ ကၠောန်ဗဒှ်အာ ပေါဲရုဲမာဲဏောၚ် ဟီုပ္တိတ်လဝ် ပ္ဍဲကဵုပေါဲဆဵုဂဗ ကမ္မယှေန်ပေါဲရုဲမာဲကၟိန်ဍုၚ် ကေုာံ ဗော်ပရေၚ်ဍုၚ်ကွာန် မဂွံလဝ်အခေါၚ်ပ္တိုန်စရၚ်တံဂှ်ရ။
ဟိုတ်ဂှ်ရ မၞိဟ်တြုံကောန်အရာပ် အာယုက်လ္တူ ၃၅ တံဂှ် သွက်ပရေၚ်ဂီုကၠီုညးဍုၚ်ကွာန်တံဂးတုဲ ကဵုတန်ဗ္တောန်တ္ၚဲဇမၠေံတုဲ ဗ္ဂပ်ကဵုလွဟ်တုဲ သွက်ဂွံကဵုမၚ်ကၚ် အပ္ဍဲကွာန်အရာပ်တံဂှ် ကံၚ်ဇြဳပၞာန် စဳဇန်ကၠုၚ်ရ။
က္ဍိုပ်သ္ကိုပ်ပၞာန်ဂှ်လေဝ် တန်တဴကဵုအကာဲအရာဂီုကၠီုတုဲ တိဍာ်ကၠောန်ဗဒှ်ပေါဲရုဲမာဲဂွံတံဂှ် ကၠောန်ဗဒှ်အာကၠာဏောၚ်တုဲ တိဍာ်သှ်ေတံဂှ်တှ်ေ သၠုၚ်ပ္တိုန်ပရေၚ်ဂီုကၠီုတုဲ ဆက်ကၠောန်ဗဒှ်အာဏောၚ်ဂှ် ဟီုပ္တိတ်လဝ် ပ္ဍဲကောံဓရီုဂီုကၠီုစဵုဒၞါတုဲကၠုၚ်တေံရ။
ကိုဝ်ဇြေယျာလွေန်ဂှ်တှ်ေ နကဵုဂကောံဇြဟတ် နူကဵုဒေသတိဗလး ဟွံဗၠးၜးဏီတံ သွက်ဂွံကလေၚ်ခၠေဝ် ကုပေါဲရုဲမာဲကံၚ်ဇြဳပၞာန် နကဵုပရေၚ်ပၞာန်၊ ပရေၚ်ဍုၚ်ကွာန်မာန်ဂှ် ထေက်ကဵုဒးသဳကၠဳသ္ဂုတ်သွာတ် ကုဂကောံဇြဟတ်ၜိုတ်နွံတံ ချိုတ်တ်ပၠိုတ်တ်ဏောၚ်ဂှ် သ္ဂးရ။
“အကာဲအရာဒေသတိဗလး ပိုယ်တံ ဟွံဗၠးၜးဏီတံဂှ်တှ်ေ ဂကောံဇြဟတ်နွံဒေသတိဗလးတံ မွဲကုမွဲ ဒးပတှ်ေညးသ္ကအ်ဂှ် နွံပၟိက်ဂၠိုၚ်ဏောၚ် အဲထေၚ်ရ။ မူဟိုတ်ရောတှ်ေ ဟွံဗၠးၜးဏီပုဟ်၊ ဂ္စါန်ဒၟံၚ် သွက်ဂွံဗၠးၜးအိုတ်ရ။ အေ ဂှ်တှ်ေ ဒေသသ္ဂောံဗၠးၜးတံဂှ်တှ်ေ ဂကောံဇြဟတ်ၜိုတ်နွံတံ သဳကၠဳချပ်ဂၞန်ညးသ္ကအ်တုဲ ညံၚ်ဂွံဓလီုပေါဲရုဲမာဲဏံဂှ် ခၠေဝ်ပလန်အာ ကုပရေၚ်ဍုၚ်ကွာန်၊ ပရေၚ်ပၞာန် သာ်လဵုရော။ အရာတံဏံဂှ် ချပ်ဂၞန်ညးသ္ကအ်ချိုတ်တ်ပၠိုတ်တ်တုဲ ထေက်ကဵုဒးသ္ဂုတ်သွာတ်ဂှ် အဲထေၚ်ကေတ်ရ” သာ်ဝွံ သ္ဂးရ။
ပ္ဍဲအကာဲအရာပရေၚ်ဍုၚ်ကွာန်ဂှ် ပရေၚ်ဍုၚ်သ္အာၚ်၊ ပရေၚ်ကလုတ်တမာန်တံဒှ်တမ် ပါလုပ်သီုကဵုအကာဲအရာပံၚ်ပလေဝ်ပလေတ် ကုဇြဟတ်ပၠန်ဂတးနာနာတံ သီုသွာၚ်အုပ်ဓုပ်တံဂှ် ပါလုပ်ဒၟံၚ်သီုဖအိုတ်ရ။
နကဵုညးမအာက္ဍိုပ် ပၠန်ဂတးတံ ပ္ဍဲကဏ္ဍပရေၚ်ဍုၚ်ကွာန်ဂှ် အရာမဒှ်မာန်အခိၚ်ကာလလၟုဟ်ဂှ် ချပ်ဗ္စာ နူကဵုဒိုဟ်ဇဳတုဲ သ္ဒးပံၚ်ပလေဝ်ပလေတ်အာတံ နွံဂှ် သ္ကိုပ်ဝန်ဇၞော် NUG ထံက်ထ္ၜးလဝ် ပ္ဍဲကောံဓရီုရ။
မွဲလ္ပာ်ဂှ်ပၠန် ကံၚ်ဇြဳပၞာန်ဝွံ သွက်ဂွံကလေၚ်ထိၚ်ဒက် တိဍာ်ညးတံ ဒးဆောံလေၚ်လဝ်တံဂှ် မ္ၚးနူကဵုပရေၚ်ပၞာန်တိုက်၊ ဍာ်၊ ကျာဂှ် ပ္တိတ်ကၠုၚ်ဇြဟတ် သီုနကဵုကောန်ဒပ် ပကောံပ္ကေဝ်လဝ် ဟွံလအ်တံဂှ်ရ။
ဆ္ဂး အကာဲအရာဒပ်ကံၚ်ဇြဳပၞာန်ဂှ်ဝွံ ထိၚ်ဒက်လဝ် ကၟိန်ဍုၚ် ၜိုတ် ၂၈ တၟံကၠံရမာန်ဂှ် လ္ပာ်အလဵုအသဳညဳသၟဟ်ဂကူ NUG ဟီုလဝ်ရ။
ပရိုၚ်−သြၚ်လောန်တိုၚ်(မ်)
ဗီု−NUG