မတ်မလီု၊ အဝ်ဂါတ် ၃၁
ဟိုတ်နူၚုဟ်ဗၞိက်ဖျာက္ဍၚ်တုဲ အခိၚ်ညးဍုၚ်ကွာန်တံ ကြေပ်ဂြတ်ဒၟံၚ်ဂှ် ကံက်ဂလိုၚ်ပ္တိုန်အာ ၚုဟ်မဳတာ ၜါဆပြၚ်ဏောၚ် ဌာနဝန်ဇၞော်ဇြဟတ်ဓာတ်လလဳကံၚ်ဇြဳပၞာန် လလောၚ်တြးလဝ် နကဵုစၟတ်တ္ၚဲ ဂိတုအဝ်ဂါတ် ၃၀ တေံရ။
ခရိတ်မဳတာအရပ်စပ်သ္ၚိဂှ် နူ ၁ ယူနေတ် စဵုကဵု ၅၀ ယူနေတ်ဂှ် ၅၀ ဒ္ကေဝ်၊ နူ ၅၀ ယူနေတ် စဵုကဵု ၁၀၀ ယူနေတ်ဂှ် ၁၀၀ ဒ္ကေဝ်၊ နူ ၁၀၀ ယူနေတ်စဵုကဵု ၂၀၀ ယူနေတ်ဂှ် ၁၅၀ ဒ္ကေဝ်၊ ယဝ်ဒှ်လ္တူ ၂၀၀ ယူနေတ်မ္ဂး ကံက်ဂလိုၚ်ပ္တိုန်အာ ၃၀၀ ဒ္ကေဝ်ဏောၚ် မဒှ်ရ။
ခရိတ်မဳတာအရပ်စပ်သ္ၚိတံဂှ် ကၠာတေံ ဒှ်လ္တူ ၂၀၀ ဒ္ကေဝ်မ္ဂး ကံက်လဝ် ၁၂၅ ဒ္ကေဝ်ပြၚ်ကီုလေဝ် အခါလၟုဟ်ဂှ်တှ်ေ ကံက်ဂလိုၚ်ပ္တိုန်အာ စဵုကဵု ၃၀၀ ဒ္ကေဝ်ဏောၚ်တုဲ ၚုဟ်သၠုၚ်တိုန်ကၠုၚ် ၜါဆပြၚ်ရ။
လအာတုပ်သာ်ဂှ်ကီု ခရိတ်မဳတာအရပ်စပ်ကမၠောန်တံဂှ်လေဝ် နူ ၁ ယူနေတ် စဵုကဵု ၅၀၀၀ ယူနေတ်ဂှ် ၂၅၀ ဒ္ကေဝ်၊ နူ ၅၀၀၀ ယူနေတ် စဵုကဵု ၂၀၀၀၀ ယူနေတ်ဂှ် ၄၀၀ ဒ္ကေဝ်၊ လ္တူ ၂၀၀၀၀ ယူနေတ်မ္ဂး ကံက်ဂလိုၚ်ပ္တိုန်အာ ၅၀၀ ဒ္ကေဝ်ဏောၚ်ဂှ် ကဵုကၠုၚ်သမ္တီရ။
ညးဍုၚ်ကွာန်မွဲတၠဂှ်တှ်ေ ကံက်ဂလိုၚ်ပ္တိုန်အာ ခရိတ်မဳတာဓာတ်လလဳဂှ်ဝွံ ကၠောန်ဒၟံၚ်ညံၚ်ညးဍုၚ်ကွာန်တံ ဂွံကြေပ်ဂြတ်ဏောၚ်ဂှ် ပါ်ပါဲလဝ်ရ။
“ညအ်ဂှ်တှ်ေ ညံၚ်ညးဍုၚ်ကွာန်တံ ဂွံကြေပ်ဂြတ် ဟွံဒှ်ညံၚ်ဂွံဒှ် ကၠောန်လဝ်ရ။ လၟုဟ်ဂှ် ကံက်ဒၟံၚ်ခရိတ်မဳတာ ၜါဆပြၚ်ကီုလေဝ် ပၟတ်ဂှ် ဟွံမှာန်ပုဟ်။ ပြဟ်ဟ်ဏံ ပ္ဍဲကဵုပိုယ်တံဂှ်လေဝ် ပၟတ်ဂှ် လီုဒၟံၚ်။ အကြာပၟတ် ကၠုၚ်ဟွံမှာန်ဒၟံၚ်ဂှ် ကံက်ဂလိုၚ်ပ္တိုန် အကံက်ဓာတ်လလဳ ၜါဆဟီုဂှ် ကၠောန်ဒၟံၚ်ညံၚ်ညးဍုၚ်ကွာန်တံ ဂွံဒှ်ဒဒိုက် နကဵုတၚ်ရန်တၟံနွံနွံဂှ် တုပ်ပ်ရ” သာ်ဝွံ သ္ဂးရ။
ကံၚ်ဇြဳပၞာန်ဂှ်တှ်ေ မ္ဒးကံက်ဂလိုၚ်ပ္တိုန် ခရိတ်မဳတာတံဂှ်ဝွံ ပ္ဍဲအရာရေၚ်တၠုၚ် သၠုၚ်ပ္တိုန်ကဆံၚ် ရုၚ်စက်ကဵုဇြဟတ်ဓာတ်လလဳ ကေုာံ လာၚ်ဇြဟတ်ဓာတ်တံကီု၊ သၠဲပ္တိုန်ဒက်ပ္တန်ကီု၊ ကလေၚ်ပလေဝ်ပလေတ်ထိၚ်ဒဝ်တံ နကဵုပရေၚ်ဓလိုက်တမ်ရိုဟ် အပ္ဍဲဍုၚ်၊ မ္ၚးဍုၚ်တံဂှ် ဗက်ကဵုသၞာံဘဏ္ဍာတုဲ ခရိတ်ကၠောန်ပ္တိတ်တံ သၠုၚ်တိုန်လဝ်ရောၚ် ထ္ၜးလဝ်ဟိုတ်ရ။
အပ္ဍဲကောံဓရီုဂကောံအလဵုအသဳကၟိန်ဍုၚ် ကံၚ်ဇြဳပၞာန် မကၠောန်ဗဒှ်လဝ် ပ္ဍဲဂိတုဂျူလာၚ် ၅ တုဲကၠုၚ်တေံ သွက်ဂွံကံက်ဂလိုၚ်ပ္တိုန်ၚုဟ်မဳတာဂှ် ကလိဂွံလဝ် တၚ်တုပ်စိုတ်တုဲယျဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
ညးဍုၚ်ကွာန်မွဲတၠပၠန်ဂှ်လေဝ် ဟွံဂွံပၟတ်ဓာတ်လလဳမှာန်န်မွဲသာ် ကံက်ဂလိုၚ်ပ္တိုန်ၚုဟ်မဳတာတံဂှ်ရ သီုညးဖအိုတ် ဒှ်ဒဒိုက်တုဲ အကြာအကြေပ်အဂြတ်တံဂှ် သြန်လုပ်ကဵုသြန်တိတ် ဟွံသၟဟ်တ:တံလေဝ် ဒးဂဗကၠုၚ်မာန်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ပၟတ်လေဝ် ဟွံမှာန် ၚုဟ်မဳတာလေဝ် ကံက်ဂလိုၚ်ပ္တိုန်လဝ်တုဲ ဒှ်ဒဒိုက်သီုညးဖအိုတ်ရ။ ကံက်ဂလိုၚ်ပ္တိုန်တှ်ေ ကံက်ရ။ ညအ်ဂှ် နွံဒၟံၚ်ပ္ဍဲတဲဍေံတံတှ်ေ မူဟိုတ်ဂွံကံက်ဂလိုၚ်ပ္တိုန်ရောဟီုဂှ် ပိုယ်တံလေဝ် ဟွံတီပုဟ်။ သှ်ေ ဂှ် ဗီုလဵုဂွံဟီုရောဟီုတှ်ေ သာတုဲဒှ်ဒဒိုက်ရ။ သြန်လုပ်ဂှ်လေဝ် နွံကွေံကွေံဟွံသေၚ်ပုဟ်လေဝ်။ ဗီုကၠာတေံလေဝ် ကၠောန်ၜိုတ်စ ဟွံပြေပြံၚ်ပုဟ်။ အကြာဟွံပြေပြံၚ်ဂှ် ၚုဟ်မဳတာတိုန်တုဲ သြန်တိတ်ဂှ် ဂၠိုၚ်အာ နူကဵုသြန်လုပ်ရ” သာ်ဝွံ သ္ဂးရ။
ကံက်ဂလိုၚ်ပ္တိုန် ၚုဟ်မဳတာအရပ်စပ်ပ္ဍဲကမၠောန် သီုကဵုၚုဟ်မဳတာသ္ၚိတံဂှ်တုဲ ညးဍုၚ်ကွာန်တံ ထပ်တုဲဒးဒုၚ်စသိုၚ် ၚုဟ်ကပေါတ်ဗၞိက်က္ဍၚ်တိုန်ကၠုၚ်တံ ပါလုပ်သီုကဵုၚုဟ်ဗၞိက်စသုၚ်တံဏီဏောၚ်ဂှ် ထံက်ထ္ၜးလဝ်တံ နွံဒၟံၚ်ရ။
ကံၚ်ဇြဳပၞာန်ဂှ်တှ်ေ သၠုၚ်ပ္တိုန်ၚုဟ်မဳတာတုဲ ခုတ်ပ္တန်လဝ်ဂှ် စနူဂိတုသေပ်တေမ်ဗာ ၁ တုဲ ကံက်အာဏောၚ်ဂှ် ကဵုလဝ်သမ္တီရ။
ပရိုၚ်−သြၚ်လောန်တိုၚ်(မ်)
ဗီု−Social Media