သဓီု၊ သေပ်တေမ်ဗာ ၃
တွဵုရးဍုၚ်မန် ပွိုၚ်ဍုၚ်သဓီု ကွာန်ကမာဇြိုၚ် လ္တူဂၠံၚ်ကွဳစက် မတ်မလီု−လ္ဂုၚ်ဂှ် ယာန်ကွဳစက်ညးအာတရဴမွဲဖ္ဍိုက် ဒးဒုၚ်ဗ္တိုက်ဗ္တိုဟ်မာၚ်တုဲ မၞိဟ်တြုံၜါတၠ ချိုတ်တုဲ မသုန်တၠ ဇီုကပိုက်ကလိဂွံလဝ်ဝပ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲဂိတုသေပ်တေမ်ဗာ ၁ အခိၚ်ဗ္တံ ၜိုတ် ၈ နာဍဳ ယာန်ဖ္ဍိုက်ညးအာတရဴ (အန်စာတုံး) မွဲဖ္ဍိုက် နူဍုၚ်ဗြဝတဳ တွဵုရးကရေၚ် ဒဳကၠုၚ်လ္ပာ်ဍုၚ်ဗဂေါဂှ်ဝွံ အခိၚ်စိုပ်ကွာန်ကမာဇြိုၚ်ဂှ် ဒးဒုၚ်ဗ္တိုဟ်မာၚ် ဗ္တိုက်လဝ်ရ။
ဟိုတ်နူဒးဒုၚ်ဗ္တိုက်လဝ်တုဲ ညးဒဳယာန် ကိုဝ်ဖျဵုဝေကျဝ် ကေုာံ ညးအာတရဴ ကိုဝ်ကျဝ်မျဵုသူတံ ၜါတၠ ချိုတ်အာလဝ် ဒၞါဲဒှ်ပရူဂှ်တုဲ သီုကောန်ၚာ်သၟတ်မွဲတၠ မပါလုပ် ညးဗြဴမသုန်တၠ ဇီုကပိုက်ကလိဂွံလဝ်ဝပ်ရ။
ပ္ဍဲကဵုညးဇီုကပိုက်ကလိဂွံလဝ်ဝပ်တံဂှ် ညးအာတရဴဒးဂွိၚ်ပန်တၠဂှ်ဝွံ တိုန်စိုပ်လွဳဒၟံၚ် ရုၚ်ဂဥုဲညးဍုၚ်ကွာန်ခရိုၚ်သဓီုတုဲ သှ်ေမွဲတၠဂှ် ပလံၚ်ဗစိုပ်လဝ် ဇရေၚ်ရုၚ်ဂဥုဲကျာ်ကဝ်ဂှ် ဂွံတီကေတ်ရ။
ညးတံဝွံ ဒှ်ညးဍုၚ်ကွာန်အာတရဴ နူဗြဝတဳ စဴကၠုၚ်ဍုၚ်ဗဂေါတံဂှ် ဂွံတီကေတ် အတိုၚ်ဂလာန်ညးဒေသတံရ။
ကွာန်ကမာဇြိုၚ် ယာန်ကွဳစက်ညးအာတရဴ ဒးဒုၚ်ဖံက်ဗ္တိုက်မာၚ်ဂှ်ဝွံ မ္ၚးနူကဵုဒပ်ကံၚ်ဇြဳပၞာန်ဂှ် ဒှ်ဒေသသီုဗော်သွးကောန်ဂကူကရေၚ် KNU ကဵု ဒပ်စဵုဒၞါညးဍုၚ်ကွာန် PDF ချဳဒရာၚ်ဒၟံၚ်ပရေၚ်ပၞာန်ကီုရ။
ဆ္ဂး စပ်ကဵုလၟေၚ်ဒဒှ်ဏံတုဲ ကံၚ်ဇြဳပၞာန်ကီု လ္ပာ်ဒပ်ပၠန်ဂတးရပ်လွဟ်တံကီုဂှ် ဒဵုကဵုအခိၚ်လၟုဟ် လလောၚ်ပ္တိတ်လဝ်ပရိုၚ်ဂှ် ဟွံဂွံဆဵုကေတ်ဏီရ။
တုဲကၠုၚ် ပ္ဍဲဂိတုဨပရဴတေံဂှ်လေဝ် ပ္ဍဲကဵုဂၠံၚ်ကွဳစက် လ္ဂုၚ်−မတ်မလီု ကွာန်ယှိုဲယံၚ်ပျ ပွိုၚ်ဍုၚ်ၜဳကလေၚ်ဂှ် ယာန်ကွဳစက်အာတရဴ “အောၚ်ကျော်မိုး” ဒးဒုၚ်ဗ္တိုက် ဗ္တိုဟ်မာၚ်တုဲ ညးဗက်လက္ကရဴယာန် ချိုတ်အာတုဲ ညးအာတရဴပန်တၠ ကလိဂွံလဝ်ဝပ်ရ။
ပရိုၚ်−သြၚ်လောန်တိုၚ်(မ်)
ဗီု−SAC Telegram