အပ္ဍဲပရေၚ်ပန်ပှော် ရေၚ်ကွဳစက်ပၞာန် ပ္ဍဲလံၚ်လုၚ်ဂှ် မၞိဟ်ဗြဴမွဲတၠ ချိုတ်အာ

လံၚ်လုၚ်၊ ဒဳဇြေမ်ဗာ ၁၄

ရးတၞၚ်သဳ ပွိုၚ်ဍုၚ်လံၚ်လုၚ် ကွာန်အေန်သံက် ဗ္ဒါဲကျာ်(ပြည်လုံးချမ်းသာ) ပ္ဍဲဂိတုဒဳဇြေမ်ဗာ ၁၃ ပယျာံနူဂယးဂှ် ရေၚ်ကွဳစက်ပၞာန် ဒးဒုၚ်ပန်ပှော်တုဲ လ္ပာ်ကံၚ်ဇြဳပၞာန်တံ အခိၚ်ကလေၚ်ပန်ကၠုၚ်ဂှ် ညးဗြဴ ၁ တၠ ချိုတ်အာလဝ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ပ္ဍဲဂိတုဒဳဇြေမ်ဗာ ၁၃ အခိၚ်နူဂယး ၜိုတ် ၆ နာဍဳဂှ် လ္ပာ်ဂကောံပၠန်ဂတးတံ ပန်ပှော်လဝ် ရေၚ်ကွဳစက်ပၞာန် နူကွာန်မေန်ယိတ် မတိုန်ကၠုၚ်လ္ပာ်လံၚ်လုၚ်ဂှ်တုဲ ကွဳစက်ကောန်ဒပ်ကံၚ်ဇြဳပၞာန်တံပါဗက်ကၠုၚ် ၃ ဖ္ဍိုက်ကဵု ကွဳစက်သီုဓာတ်ဂံက်ပါ ၉ ဖ္ဍိုက်တံ ပါလုပ်ဂှ် ဂွံတီကေတ်ရ။

အကြာဂၠံၚ် ကြတ်ဗ္တိုက်လဝ် ကုကွဳစက်လ္ပာ်ကံၚ်ဇြဳပၞာန် ကေတ်ဂီုကၠီု ကွဳစက်ဓာတ်ဂံက်ပါတံဂှ်တုဲ မပါဗက်ကၠုၚ်ဂှ်တုဲ နူကဵုဏံဂှ် ပရေၚ်ပန်ပှော်ဒဒှ်ရကလေၚ်ဒှ်လဝ်ဂှ်ကီု၊ လ္ပာ်ကံၚ်ဇြဳပၞာန်ဂှ်လေဝ် ပရေၚ်ဇီုကပိုက်တံ က္တဵုဒှ်လဝ် သ္ကာတ်တ်မြဟ်ဟ် နွံဂှ် ညးဒေသမွဲတၠ ဟီုဂးလဝ်ရ။

ဂကောံပၠန်ဂတးတံ ပန်ပှော်တုဲ လ္ပာ်ဂကောံကံၚ်ဇြဳပၞာန်တံ မၞိဟ်ဇီုကပိုက်ချိုတ်ဂၠိုၚ်မာန်တုဲ ကွဳစက်လ္ၚဵုတံဂှ်တှ်ေ ဆက်ဒဳဟွံမာန်ရတုဲ ဒေါအ်လဝ် ပ္ဍဲဂၠံၚ်စှ်ေကွာန်(စမ်းလှမ်း) ဗ္ဒါဲသၞေဟ်ကၚ်ကံၚ်ဇြဳပၞာန် တိုၚ်တာဝါဒဵုလက်ခတ်ဂှ်တုဲ ညးဒးဇီုကပိုက်ချိုတ်အာတံဂှ် ပြံၚ်ဖ္ဍိုက်ဏာလဝ် ကဵုကာတၞဟ်ဟ်ဂှ် ဂွံတီကေတ်ရ။

ဟိုတ်နူရေၚ်ကွဳစက်ကံၚ်ဇြဳပၞာန်တံ ကလေၚ်ပန်ပှော်ကၠုၚ်ဂှ်တုဲ မၞိဟ်ဗြဴမွဲတၠ မပါဗက်ကၠုၚ် နူကဵုသ္ၚောဲသ္ၚောဲ လက္ကရဴရေၚ်ကွဳစက်ဂှ် ဒးအာလဝ်မကမ်ရ။

မကမ်ကံၚ်ဇြဳပၞာန် ပန်ပှော်ဏာလဝ်ဂှ်ဝွံ ဒးအာလဝ် ဒဝ်ဏိတာန် အာယုက် ၄၀ သၞာံပြၚ် ကောန်ကွာန်အေန်သံက်ဂှ်တုဲ ဟိုတ်နူဝပ်ကလိဂွံအာ ပ္ဍဲသြိုဟ်၊ ပ္ဍဲက္ဍိုပ်တံဂှ်တုဲ မ္ဒးပြဟ်လလုဲအာလဝ် ပ္ဍဲဒၞါဲဒှ်ပရူဂှ်ရ။

ပရေၚ်ပန်ပှော် ကုရေၚ်ကွဳစက်ကံၚ်ဇြဳပၞာန်ဂှ်တှ်ေ ဂကောံလဵုကၠောန်လဝ်ရောဟီုဂှ် ပြဟ်ဟ်ဏံ ဟွံဂွံတီကေတ်ဏီတုဲ လလောၚ်ပ္တိတ်လဝ်ပရိုၚ် ဟွံမွဲဏီရ။

ဂကောံကံၚ်ဇြဳပၞာန် ဒးဒုၚ်ပန်ပှော်လဝ်လၟုဟ်ဂှ်ဝွံ ပ္ဍဲဂိတုဒဳဇြေမ်ဗာ ၁၂ ဂှ် ဒှ်ဂကောံထ္ပက်ကရောၚ်ပၞာန်လုပ်စိုပ်ကၠုၚ် လ္ပာ်ကွာန်မေန်ယိတ် ပွိုၚ်ဍုၚ်လံၚ်လုၚ်ဂှ်တုဲ ပ္ဍဲကဵုတ္ၚဲဂှ် လဒေါဝ်တ္ၚဲ ၜိုတ် ၁၂ နာဍဳဂှ်လေဝ် ဗ္ဒါဲဘာဗ္တောန်လိက်(စည်ပင်)ကွာန်ဂှ် ဒးဒုၚ်ဖံက်ခတိုဟ်မာၚ်တုဲ ၁ တၠ ချိုတ်တုဲ ၂ တၠ ကလိဂွံလဝ်ဝပ်ရောၚ် ဂွံတီကေတ်ရ။

ပရိုၚ်−သြၚ်လောန်တိုၚ်(မ်)

ဗီု−CJ

Leave a Reply

Your email address will not be published. Required fields are marked *