မတ်မလီု၊ ဒဳဇြေမ်ဗာ ၁၅
ဒေသကောန်ဍုၚ်အရၚ် မဗ္တိုက်သရိုဟ်ဒၟံၚ် သၞောတ်တၠအဝဵုပၞာန်တံ ဗွဲမဂၠိုၚ်ဂှ် အခိၚ်ဂွံဒၟံၚ်စေဝ်လ္တူ ပ္ဍဲပရေၚ်ပၞာန်တံဂှ် ပ္ဍဲတွဵုရးဍုၚ်မန်ဂှ်တှ်ေ ဝေၚ်ကၠုၚ်ပၞာန်ထ္ပက် ဗ္တိုက်သီကၠုၚ်ဗ္ဒိုပ်ဒပ်ကံၚ်ဇြဳပၞာန်တံဂှ် ဟွံဂွံဆဵုကေတ်ဏီရ။
အခိၚ်လၟုဟ် ပ္ဍဲတိဍာ်ကံၚ်ဇြဳပၞာန်အုပ်ဓလီုဂမၠိုၚ် ဍုၚ်ဗ္ဒါဲ ၉၀ ဂှ် ဂကောံပၠန်ဂတးရပ်လွဟ်ကောန်ဂကူ ဖျေံသ္ဇိုၚ်ဒေသ ကချေၚ်၊ ရးသေံသ္ကုတ်သၟဝ်ကျာ၊ ကရေၚ်ဍာဲ၊ ချေၚ် ကေုာံ ရခေၚ်တံ သီထိၚ်ဂွံလဝ် ဂၠိုၚ်အိုတ်ရ။
ဆ္ဂး ပ္ဍဲတွဵုရးဍုၚ်မန် ဂကောံဒစဵုဒစးပၞာန်သီအဝဵု နကဵုနဲကဲရပ်လွဟ် သ္ဂောံထပိုတ်ရိုဟ်ကၞက် သၞောတ်တၠအဝဵုပၞာန်တံ မၞုံဒၟံၚ်ဟွံအောန်နူကဵု ၃၀ ဂကောံဂှ်တှ်ေ တိဍာ်ကံၚ်ဇြဳပၞာန်အုပ်ဓလီုလဝ်တံ ဇြဟတ်ခိုဟ်ဒၟံၚ်ဖိုဟ်ရ။
နာဲနဂါ ညးမၞုံအခေါၚ်ဟီုဂး ဒပ်ပၠန်ဂတးဍုၚ်မန် MSRF ဂှ် နကဵုတွဵုရးဍုၚ်မန်သၠုၚ်ကျာဏံတှ်ေ ဂကောံက္ဍိုက်ပ်စှ်ေကဵုဗျူဟာတံ ဟွံမွဲတုဲ ဂကောံပၠန်ဂတးတၟိတံ ဂွံဝေၚ်ပေါဲဗ္တိုက် ဟွံလောဲပုဟ်ဂှ် ဟီုရ။
“ ဂကောံက္ဍိုက်ပ် စှ်ေကဵုဗျူဟာတံဂှ် ဂကောံလဵုမွဲမှ ဟွံမွဲပုဟ်။ ဂကောံနွံဒၟံၚ်တုဲတုဲတံဂှ်တှ်ေ ဟွံဗ္တိုက်ဒၟံၚ် ကံၚ်ဇြဳပၞာန်ဂှ်ပုဟ်။ စိုတ်လုပ်စဒၟံၚ် ပရေၚ်အုပ်ဓလီုတိဍာ် နူကဵုပရေၚ်ဗ္တိုက်ဂှ်ဏီဏောၚ်ဂှ် အဲညာတ်ကေတ်ရ။ စပ်ကဵုပရေၚ်ဏံတုဲ ဂကောံပၠန်ဂတးတၟိတၟိတံဂှ်တှ်ေ ဇကုဇကုပတှ်ေကေတ်တုဲ စကၠုၚ်လဝ် နကဵုလွဟ်ညးဍုၚ်ကွာန်တံ မထံက်ပၚ်လဝ်ဂှ်တုဲ လုပ်ကၠုၚ်လဝ်ပေါဲဗ္တိုက်တုဲ လွဟ်လုပ်ပေါဲဗ္တိုက် မစှ်ေကဵုဗျူဟာတံ ဟွံမွဲတုဲ ဂွံဝေၚ်ပေါဲဗ္တိုက်ဇၞော်ဇၞော်တံဂှ် အခက်အခုဲနွံဒၟံၚ်တၟာဂလိုၚ်ဂှ် အဲညာတ်ကေတ်ရ” သာ်ဝွံ သ္ဂးရ။
သ္အာၚ်နူဂှ်ပၠန် ဂကောံရပ်လွဟ်တြေံတြေံတံဂှ်တှ်ေ ကၟာတ်လဒဵုကၠုၚ် ပရေၚ်ချဳဒရာၚ် ဂကောံပၠန်ဂတးရပ်လွဟ်တၟိတၟိတံ နူကဵုသၟဝ်က္ဍိုပ်လိက် မဒှ်တိဍာ်ဗၠးၜးဂှ် ညးသ္ဂးရ။
ညးဍုၚ်ကွာန်တံ မထံက်ပၚ်ကဵုဂှ်လေဝ် ဂွံဝေၚ်ပေါဲဗ္တိုက်ဇၞော်ဇၞော် ပ္ဍဲတွဵုရးဍုၚ်မန် စဵုကဵုကဆံၚ်ဏံဂှ်လေဝ် ဟွံရုမ်ဂပ်တုဲ ဂတမတ်ဂှ်လေဝ် ဒပ်ဂမၠိုၚ် ပြးထ္ကးဒှ်ဒၟံၚ်ဂှ်ရ ဒှ်ဟိုတ်ထ္ပက်ပၞာန် ပ္ဍဲတွဵုရးဍုၚ်မန် သ္ကုတ်သၠုၚ်ကျာဏံ ဟွံမာန်ဂှ်ရောၚ် နာဲနဂါ သ္ဂးရ။
ပ္ဍဲဒေသသ္ကုတ်သၠုၚ်ကျာဂှ်တှ်ေ ပွိုၚ်ဍုၚ်ဇြပ်ဗုကဵု ပွိုၚ်ဍုၚ်ရေဝ်ဂှ်ဝွံ ဒှ်ဒေသပရေၚ်ချဳဒရာၚ်ဒစဵုဒစးတၠအဝဵုပၞာန် ဇြဟတ်ခိုဟ်တံတုဲ ဂကောံပၠန်ဂတးရပ်လွဟ် မမံက်ဂတဝ်ကၠုၚ် အဖဝ်ပၠန်ဂတးက္ညၚ်ဂှ် နွံဒၟံၚ် ဗွဲမဂၠိုၚ်ဂၠေၚ်ရ။
ဂကောံရပ်လွဟ်ဝှ်ကြံၚ် ဗော်ဍုၚ်မန်တၟိဂှ်လေဝ် ဌာန်ဂအုပ်ဗဟဵုဂှ် ဖျေံလဝ်သ္ဇိုၚ် ပ္ဍဲဒေသကၞောတ်ၜဳရေဝ်ဂှ်တုဲ နကဵုဗော်ဂှ်တှ်ေ သွက်ဂွံသောၚ်ကလးပြသၞာပရေၚ်ဍုၚ်ကွာန်ဂှ် ဒတူလိုၚ်ဒၟံၚ် အတိုၚ်လိက်ကသုက် Bilateral Agreement ရ။
ဂကောံပၠန်ဂတးရပ်လွဟ် ဖျေံသ္ဇိုၚ် ပ္ဍဲဒေသသ္ကုတ်သၟဝ်ကျာ ပ္ဍဲပွိုၚ်ဍုၚ်ကျာ်ထဝ်၊ ပွိုၚ်ဍုၚ်ၜဳကလေၚ် ကေုာံ ပွိုၚ်ဍုၚ်သဓီုတံဂှ်တှ်ေ အာဒၟံၚ်သၟဝ်က္ဍိုက်ပ် ဗော်သွးကောန်ဂကူကရေၚ် KNU မဒှ်ရ။
ဗော်သွးကောန်ဂကူကရေၚ် KNU ဝွံ ပ္ဍဲတွဵုရးဍုၚ်မန် သ္ကုတ်သၟဝ်ကျာဂှ်ကီု သီုပ္ဍဲပွိုၚ်ဍုၚ်တၞဟ်ဟ် ပ္ဍဲကွာန်ရးလ္ၚဵုတံဂှ်လေဝ် ဗ္ဒိုပ်ဖျေံသ္ဇိုၚ်တံ နွံဒၟံၚ်တုဲ ပရေၚ်အုပ်ဓုပ် ကေုာံ ပရေၚ်အုပ်ဓလီုတိဍာ်တံဂှ်လေဝ် ကလိဂွံလဝ် ၜိုတ်ဒးရးရ။
ဆ္ဂး သ္ကုတ်သၟဝ်ကျာဝွံလေဝ် ညံၚ်ရဴသ္ကုတ်သၠုၚ်ကျာဂှ်ကီု ၜိုတ်လုပ်စိုပ်ဗ္တိုက်၊ ၜိုတ်ကြတ်ဗ္တိုက် ဗ္ဒိုပ်ဗၠာဲသၟိၚ်တိဍာ် ဒပ်ကံၚ်ဇြဳပၞာန် မဖျေံလဝ်သ္ဇိုၚ်တံ၊ သၞေဟ်ကၚ်ကံက်အခေါန်ဖလှာ မကေတ်လဝ်ဂီုကၠီုတံ၊ သၞေဟ်ကၚ်စၟဳတ်တံ ၜိုတ်ဏံဓဝ်ရ မဒှ်ရ။
အကာဲအရာကဵုကၠုၚ်မ္ဂး ကုတမ်ဒပ်ကံၚ်ဇြဳပၞာန်လ္ၚဵုတံကဵု ဒပ်အမၠံက်တံဂှ် ထောံမခတိုဟ်ဗ္တိုက်ကဵု ဒရုၚ်၊ ၜိုတ်ပန်ကဵုလံၚ်ချာတံရ နွံတုဲ ထ္ပက်ကၠုၚ်ကရောၚ်ပၞာန်မ္ဂး က္တဵုဒှ်ပေါဲဗ္တိုက်ၜါလ္ပာ်တံ နွံလဝ်ရ။
ညးဒုၚ်တာလျိုၚ် PDF ခရိုၚ်သဓီုဂှ်တှ်ေ သွက်ဂွံထ္မံက်ရုပ်ရဴ ပရေၚ်ပၞာန်မစှ်ေကဵုမဟာဗျူဟာဂှ် ပလေဝ်ပလေတ်ဒၟံၚ်ဖိုဟ်ဂှ်တုဲ ဗွဲကြဴဏံ ပရေၚ်ပၞာန်သာသ္ကာတ်မြဟ်ကၠုၚ်မာန်ရောၚ် ဟီုလဝ်ရ။
ညးလ္ၚတ်အကာဲအရာပရေၚ်ပၞာန်အပ္ဍဲဒေသမွဲတၠဂှ်တှ်ေ မန်ကဵုကရေၚ်ဂှ်တှ်ေ ဝေၚ်ဒၟံၚ်ဒွန်ပရေၚ်ဍုၚ်ကွာန် ဂၠိုၚ်နူကဵုပရေၚ်ပၞာန်ဂှ်တုဲ ညံၚ်ပရေၚ်ပၞာန် ပ္ဍဲသ္ကုတ်သၟဝ်ကျာတေံ သၞကဵုမိတ် ပိုတ်တ်သ္ကုတ်တ်ဂွံဒှ်ဂှ် လ္ပာ်သ္ကုတ်သၠုၚ်ကျာဏံ မံက်ကၠုၚ်ဏောၚ်ဂှ် ဟွံထေၚ်ပုဟ်ဂှ် သ္ၚဳဂၠိပ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−CJ