မတ်မလီု၊ ဒဳဇြေမ်ဗာ ၁၅
သၞာံ ၂၀၂၅ ကၠုၚ်စိုပ်ဏံ လၟိဟ်မၞိဟ်ဍုၚ်ဗၟာ ၁၅ ပြကောဋိကိုဋ်ပြၚ်ဝွံ ဒးဆေၚ်မုက်ကဵု ပြဒ္ဒညာဇွောံမစၞစဟွံရုမ်ဂပ်တံမာန်ဂှ် ရုၚ်ပ္ညဳပ္ညပ်စပ်ကဵုပရေၚ်ဗ္စာရဏာမၞိဟ် ကုလသမဂ္ဂ UNOCHA လလောၚ်ပ္တိတ်လဝ် ပ္ဍဲဂိတုဒဳဇြေမ်ဗာ ၁၃ တေံရ။
အတိုၚ်ဂလာန် UNOCHA ဂှ်မ္ဂး ပ္ဍဲဍုၚ်ဗၟာ တၚ်နွံပၟိက်စပ်ကဵုပရေၚ်ဗ္စာရဏာမၞိဟ်တံဂှ်ဝွံ စိုပ်ကၠုၚ်ဒၟံၚ်ကဆံၚ်ဟွံကေၚ်ဂဗမွဲလှ်ေဂှ်တုဲ သၞာံဂတဏံမ္ဂး မၞိဟ်နွံပၟိက်ကၠုၚ်ကဵုအရီုဗၚ် နွံကၠုၚ် ဗ္ဒါဲ ၂၀ ပြကောဋိကိုဋ်ဏောၚ်ဂှ် ချိၚ်ခယျလဝ်ရ။
ပ္ဍဲကဵုဏံ သွက်ဂွံကဵုအရီုဗၚ် ကုလၟိဟ်မၞိဟ် ၅ ပြကောဋိကိုဋ်ဘာ်ပြၚ်ဂှ် အာတ်မိက်လဝ် ဒဝ်ဠာအမေရိကာန် မွဲလ္ၚီပြကောဋိကိုဋ်ပြၚ်ရောၚ် ထ္မံက်ထ္ၜးလဝ်ရ။
အကြေပ်အဂြတ် စပ်ကဵုပရေၚ်ဗ္စာရဏာမၞိဟ်တံဂှ်ဝွံ ကြဴနူဒပ်ပၞာန်သီအဝဵု သၞာံ ၂၀၂၁ တုဲဂှ် ဟိုတ်နူပေါဲဗ္တိုက်သ္ကာတ်မြဟ်ကၠုၚ်ဂှ်ကီု၊ ဟိုတ်နူကဵုပရေၚ်ဗ္တိုက်ထောံမခတိုဟ်တံကီု သီုကဵုဘဲအန္တရာယ်သဘာဝ ကေုာံ သီုကဵုပရေၚ်ပိုန်ဒြပ် စှ်ေကၠုၚ်ဒၟံၚ်တံဂှ်တုဲ အကြေပ်အဂြတ်ပရေၚ်ဗ္စာရဏာမၞိဟ်တံ သာဂၠိုၚ်ကၠုၚ်ဂှ် သ္ဂးရ။
အကြေပ်အဂြတ်တံဏံဂှ်တှ်ေ အလုံဍုၚ်မွဲ ညးဗြဴ ကေုာံ ကောန်ၚာ်သၟတ်တံ မပါလုပ် ကောန်အရာပ်တံဂှ်ဝွံ ဒးဆေၚ်ဒၟံၚ်မုက်ကဵု ဖဵုအဆက်ပရေံပရေံတံဂှ်တုဲ ဟိုတ်နူပဋိပက္ခဂမၠိုၚ်တုဲ လၟိဟ်မၞိဟ် ၃ ဒဿမ ၅ ပြကောဋိကိုဋ်ပြၚ်ဝွံ ဒးဂြိပ်ဒဴပါဲဒလေတ်ဒၟံၚ်အပ္ဍဲဍုၚ်ရ။
မွဲလ္ပာ်ဂှ်ပၠန်လေဝ် ဟိုတ်နူအကြေပ်အဂြတ်တံဏံတုဲ လၟိဟ်မၞိဟ် ၁ ဒဿမ ၃ ပြကောဋိကိုဋ်ပြၚ်ဝွံ အာတ်မိက်လဝ်အခေါၚ်စ္ၜုဲစ္ၜော် ပ္ဍဲဍုၚ်ဇိုၚ်ဝုတ်ဒိုဟ်တံရောၚ် သ္ဂးရ။
ပ္ဍဲကဵုတၚ်နွံပၟိက်သြန်ဗွဝ် စပ်ကဵုပရေၚ်ဗ္စာရဏာမၞိဟ်ဂမၠိုၚ် သွက်သၞာံ ၂၀၂၄ ဂှ် ဂွံဒုၚ်လဝ်တဲ ၃၄ တၟံကၠံတုဲ ညးမနွံပၟိက်ဒၟံၚ်ကဵုအရီုဗၚ် ဂၠိုၚ်ကဵုပြကောဋိကိုဋ်တံဂှ် ကဵုအရီုဗၚ်ပေၚ်ၚ်ဟွံမာန်တုဲ ၜိုတ်အရီုဗၚ်ကာတၟေၚ် သွက်ဘဲအန္တရာယ်လမျီုတံဂှ်ရဟေၚ် ရီုဗၚ်ကဵုလဝ်မာန်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
ပရိုၚ်−သြၚ်လောန်တိုၚ်(မ်)
ဗီု−Simsa Kasa