နေဗျဳဒဝ်၊ ဒဳဇြေမ်ဗာ ၁၇
ဒပ်ကံၚ်ဇြဳပၞာန် ဒှ်ဒၟံၚ်သၞဒတန်ကဝ် ညးဒစဵုဒစးသၞောတ်တၠအဝဵုပၞာန်တံဂှ်ဝွံ အခိၚ်ပရေၚ်ပၞာန်ကြေပ်ဂြတ်ကၠုၚ်ဏံ ပွမဂၠါဲသွဟ်ဆဵုဂဗသဳကၠဳ နကဵုနဲကဲပရေၚ်ဍုၚ်ကွာန်ဂှ်ဟေၚ် အံၚ်ဇၞးမာန်ဏောၚ်ဂှ် လေပ်တြးကၠုၚ်ဒၟံၚ်ဝါဒလၟိုန်ရ။
ပ္ဍဲမုက်ပၞာန်ရခေၚ်တေံ အခိၚ်ကံၚ်ဇြဳပၞာန် ဒးဆောံလေၚ်ဒၟံၚ် တိဍာ်အုပ်ဓလီု မွဲတုဲမွဲဂှ် ပ္ဍဲကဵုလိက်သဝဏ် စၟတ်သမ္တီ တ္ၚဲတွဵုရးရခေၚ် ပေၚ် ၅၀ သၞာံ ပ္ဍဲဂိတုဒဳဇြေမ်ဗာ ၁၅ ဂှ် က္ဍိုပ်သ္ကိုပ်ပၞာန် ဟီုချိုန်ကၠုၚ် ဂလာန်ဝွံပၠန်ရ။
နကဵုနဲကဲရပ်လွဟ်ဂှ် အာတ်မိက်အရာမၞုံပၟိက်တံ ဟွံဂွံတုဲ နကဵုနဲကဲသောၚ်ကလး ပ္ဍဲဝိုၚ်တက်ကျာပရေၚ်ဍုၚ်ကွာန် ဗွဲမၜိုဟ်လလမ်ဂှ်ဟေၚ် ပဋိပက္ခဂမၠိုၚ် ပြေလာဲအာဏောၚ်ဂှ်ရ သွက်ဂွံသၠးကၠေံ ဂၠံၚ်တရဴရပ်လွဟ်ဂှ် ဟီုကၠုၚ်ပၠန်ရ။
ဥူတာန်သဵုနာၚ် ညးလ္ၚတ်သ္ၚဳဂၠိပ်ပရေၚ်ဍုၚ်ကွာန်ဂှ် ဒပ်ပၞာန်ရပ်လဝ်လွဟ် အာတ်မိက်ဒၟံၚ် ပရေၚ်ၜိုဟ်လလမ်လွဟ်ဟွံပါဂှ်တုဲ ကောန်ဍုၚ်အရၚ်လဵုမွဲမှ ဒုၚ်တဲဟွံသေၚ်ပုဟ်ဂှ် သ္ၚဳဂၠိပ်လဝ်ရ။
“ ဂကောံရပ်လွဟ်ဂမၠိုၚ် လ္ပရပ်လွဟ်ဟီုဂှ် ဟီုကဵုလ္ပာ်ကောန်ဍုၚ်အရၚ်တံသၟးဟွံဂွံပုဟ်။ လ္ပာ်ဒပ်ပၞာန်ဂှ်လေဝ် လ္ပရပ်လွဟ် လ္ပပါလုပ်ပ္ဍဲပရေၚ်ဍုၚ်ကွာန်ညိ။ ကောန်ဍုၚ်အရၚ်တံဂှ်လေဝ် လ္ပရပ်လွဟ်ညိ၊ သောၚ်ကလး ဂတမုက်အလဵုအသဳဒဳမဝ်ကရေဇြဳမွဲတုဲမှ ၜါလ္ပာ်ဂှ် ညဳသၟဟ်အာဏောၚ်။ လၟုဟ်ဂှ် ပရေၚ်ၜိုဟ်လလမ် လွဟ်ဟွံပါဟီုဂှ် ဒပ်ပၞာန်ရပ်လဝ်လွဟ်ဂှ် အာတ်မိက်ဒၟံၚ်တုဲ ကောန်ဍုၚ်အရၚ်လဵုမွဲမှ ဒုၚ်တဲဟွံသေၚ်ပုဟ်ဂှ် ပိုယ်တံ ကၠိုဟ်ကေတ်ရ” သာ်ဝွံ သ္ဂးရ။
ပ္ဍဲဍုၚ်ဗၟာ ကြဴနူကလိဂွံပရေၚ်ဗၠးၜးတုဲဂှ် သွက်အခေါၚ်တုပ်သၟဟ် ကေုာံ သွက်အခေါၚ်စၞောန်ပျးအပိုၚ်တံဂှ် ပၞာန်အပ္ဍဲဍုၚ်မံက်ဂတဝ်ကၠုၚ်တုဲ က္ဍိုပ်သ္ကိုပ်ဒပ်ပၞာန်တံဂှ်တှ်ေ နကဵုဟိုတ် ညံၚ်ကၟိန်ဍုၚ်ဟွံဂွံဒတုံဗြံၚ် ဒးရီုဗၚ်ဏောၚ်ဂှ်တုဲ သီကၠုၚ်လဝ်အဝဵု ခေတ်အဆက်က်ရ။
နကဵုသီုပရေၚ်ပၞာန်သီအဝဵု သီုသၞောဝ်သ္ဇိုၚ်ဒက်ပ္တန် ၂၀၀၈ ဂှ် ဒပ်ပၞာန်ဗၟာ အုပ်ဓလီုကၠုၚ်ဒၟံၚ် ပ္ဍဲအခန်ကဏ္ဍပရေၚ်က္ဍိုက်ပ် ပရေၚ်ဍုၚ်ကွာန်ဍုၚ်ဗၟာ ဂၠိုၚ်ကဵုစှော်သၞာံရ။ ဟိုတ်ဂှ်ရ သွက်ဂွံသောၚ်ကလး ပြသၞာဍုၚ်ဗၟာ နကဵုနဲကဲပရေၚ်ဍုၚ်ကွာန်ဟီုဂှ် ဖအိုတ်ကၠေံပရေၚ်ပၞာန်သီအဝဵုတုဲ ဒဒှ်မဒပ်ပၞာန်ပါလုပ်ဒၟံၚ် ပ္ဍဲပရေၚ်ဍုၚ်ကွာန်ဂှ် ဒးနုက်တိတ်ကဵုဏောၚ် မဒှ်ရ။
စိုပ်ကၠုၚ်ကဆံၚ်ဏံ ဟွံမာန်ပုဟ်ဟီုမ္ဂး သၟဝ်အကာဲအရာပရေၚ်ဍုၚ်ကွာန် ဒပ်ပၞာန်မဆက်ပါလုပ်ဒၟံၚ်ဏံဂှ် ပေါဲသဳကၠဳဆဵုဂဗလေဝ် သ္ဇက်ဂွံဂွံကၠုၚ်ပရေၚ်ၜိုဟ်လလမ်မာန် ဟွံမွဲပုဟ်ဂှ် ညးခါတ်အကာဲပရေၚ်ဍုၚ်ကွာန်ဂမၠိုၚ် ထံက်ထ္ၜးလဝ်ရ။
က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ်ဂှ်တှ်ေ သွက်ဂွံသဳကၠဳပရေၚ်ၜိုဟ်လလမ်ဂှ် ဟီုဒၟံၚ်ကီုလေဝ် ဒဵုကဵုအခိၚ်လၟုဟ် ကုဂကောံရပ်လွဟ်ကောန်ဍုၚ်အရၚ်တံဂှ် ရပ်စပ်စကာဒၟံၚ်ဝေါဟာမ္ဂး ညးပကီုပရာပ်က္တဵုသပုန်တံဖိုဟ်ရ။
ပရေၚ်ဗ္တိုက်ရပ်လွဟ် ခေတ်အဆက်က်တံဂှ်ဝွံ ထ္ၜးဟိုတ်ကဵုပရေၚ်ဍုၚ်ကွာန်တုဲ နကဵုလညာတ်မဗၠေတ်မှာဂှ် ကၠောန်ကၠုၚ်ဒၟံၚ်ပြဝပကီုပရာပ်တံဂှ်ရောၚ်ဂးတုဲ ကၟာတ်လဒဵုကၠေံ ပြဝဒပ်ပၞာန်တုဲ ပ္တိုန်ကၠုၚ်ဒုဟ် ကုကောန်ဍုၚ်အရၚ်ဂမၠိုၚ်ရ။
သ္အာၚ်နူဂှ်ပၠန် ကွာ်ဗက်အာ လ္တူဂၠံၚ်တရဴဒဳမဝ်ကရေဇြဳဗော်ဇဳတုဲ စၞးသ္ဂောံဒက်ပ္တန်ကၟိန်ဍုၚ်ပံၚ်ကောံမွဲစွံဂှ် စွံကၠုၚ်စိုတ်မိက်ဂွံဒတူလိုၚ် ဗွဲတၞဟ်ခြာတံဂှ်ဟေၚ် ဂွံဆဵုကေတ်ဂှ် စောဲစပ်လဝ်ရ။
သွက်ပရေၚ်ၜိုဟ်လလမ်ဂှ် ပွမကွာ်အတိုၚ်ဂၠံၚ်တရဴ NCA ဂှ်ဟေၚ် ဒက်ပ္တန်ကၟိန်ဍုၚ် မၜိုဟ်သြိုဟ်သာယာ ညးဂမၠိုၚ်မစၟဳစလဝ်ဂှ်မာန်ဏောၚ်ဂှ် က္ဍိုပ်သ္ကိုပ်ပၞာန် သ္ဂးရ။
ဟိုတ်နူပရေၚ်ဒပ်ပၞာန်သီအဝဵု ကလေၚ်မွဲဝါပၠန်ဂှ်တုဲ ဗော်သွးကောန်ဂကူကရေၚ် KNU မတရဴစး လသာအာလိက်ကသုက် NCA ဂှ် ညးမၞုံအခေါၚ်ဟီုဂးဗော် ပဒိုဝ်သဝ်တဝ်နဳဂှ်တှ်ေ အရာရာအိုဿီု အခိၚ်လောန်ၜက်အာယျဂှ် ဟီုတဴရ။
ပၠန်ဂတးလၟုဟ်ဂှ်ဝွံ ဒှ်ပရေၚ်ပၞာန်သၟးဟွံသေၚ် သွက်ဂွံဒက်ပ္တန်သၞောတ်တၟိ ကေုာံ ကၟိန်ဍုၚ်ဂှ် သၞောတ်တၠအဝဵုလဵုမွဲဟွံဟီု သွက်ဂွံအုပ်ကၠေံနိဂီုအိုတ်အးအာဂှ် ဆက်ဖ္တိုက်ဖ္အောဝ်အာဏောၚ် သ္ဂးရ။
“ပၠန်ဂတး ပိုယ်တံဝေၚ်ဒၟံၚ်လၟုဟ်ဂှ် ပရေၚ်ပၞာန်သၟးဟွံသေၚ်ပုဟ်။ ပရေၚ်ဍုၚ်ကွာန်ကီု၊ ပရေၚ်ကလုတ်တမာန်ကီု ပရေၚ်ချဳဒရာၚ်ညးဍုၚ်ကွာန် နူဗွိုၚ်ဇဳတံ ပါလုပ်ဒၟံၚ်သီုဖအိုတ်ဏောၚ်။ ညံၚ်သၞောတ်တၠအဝဵုပၞာန် ဂွံအုပ်ကၠေံနိဂီုဂှ် ပိုယ်တံဆက်ဓရိုဟ်အာဏောၚ်တုဲ အရေဝ်ညးမဟီုဒၟံၚ်ဂှ်လေဝ် ဖအိုတ်အခိၚ်တုဲ ဟွံဒးကလၚ်ဒၟံၚ်ရပုဟ်။ အရာပိုယ်မ္ဒးကၠောန်နွံဂှ် ကၠောန်အာဏောၚ်။ တၚ်ပၟိက်ဇၞော်အိုတ်ဂှ်တှ်ေ သွက်ဂွံကလေၚ်ဒက်ပ္တန်ကၟိန်ဍုၚ် နကဵုသၞောတ်တၟိမာန်ဂှ် သၞောတ်တၠအဝဵုပၞာန် မဟွံဒှ်ဖဵုသွက်ဍုၚ်ကွာန်ဂှ်ကဵု သၞောတ်တၠအဝဵုလဵုမွဲဟွံဟီုဂှ် ပိုယ်တံဆက်လုပ်အာပေါဲဗ္တိုက်ဏောၚ်” သာ်ဝွံ သ္ဂးရ။
သ္ဇိုၚ်မူ အခန် ၁ ပါလုပ် ပ္ဍဲလိက်ကသုက်ဒေါအ်ပန်ပှော်အလုံဍုၚ်မွဲ NCA ဂှ်ဝွံ ဟိုတ်နူပရေၚ်ပၞာန်သီအဝဵုတုဲ တုဲဒှ်အာတုဲဂှ်ရ လိက်ကသုက်လီုအာယျဂှ် ဗော်သွးကောန်ဂကူကရေၚ် KNU လလောၚ်ပ္တိတ်လဝ်ရ။
ပ္ဍဲသ္ဇိုၚ်မူဂှ် ၜိုန်ရစုတ်စၞောန်ပျးလဝ် ကြက်ရှ်သာမတွံဂး ပြသၞာပရေၚ်ဍုၚ်ကွာန်ဂှ် ဟွံသောၚ်ကလး နကဵုပရေၚ်ပၞာန်မွဲသာ် သွက်ဂွံသောၚ်ကလး နကဵုနဲကဲပရေၚ်ဍုၚ်ကွာန်တံဂှ်ကီုလေဝ် ဒပ်ပၞာန်ဂှ်တှ်ေ ထ္ၜးဟိုတ်ကဵုမမာဲဟွံဗဗွဲဓဝ်တုဲ ပတှ်ေလွဟ်တုဲ သီကေတ်လဝ်အဝဵုကၟိန်ဍုၚ်ရ။
နကဵုကံၚ်ဇြဳပၞာန် အခိၚ်လၟုဟ် ဒးဗလးလဝ်ဍုၚ် မဖျေံလဝ်သ္ဇိုၚ်စက်ယန်ပၞာန်တံဂှ် နွံကၠုၚ်ကြပ် ၉၀ ဍုၚ်တုဲ ဗ္ဒိုပ်ဒပ်ဂမၠိုၚ် ဒးဆောံလေၚ်လဝ် ဂၠိုၚ်ကဵုကၠံတုဲ ပရေၚ်ဇြဟတ်ဒပ်လေၚ်ဒိုက်တံဂှ်လေဝ် ဆက်ဒးဆေၚ်ဒၟံၚ်မုက်ရ။
ဆ္ဂးကီုလေဝ် က္ဍိုပ်သ္ကိုပ်ပၞာန်ဂှ်တှ်ေ စပ်ကဵုပရေၚ်ရပ်လွဟ်အာတ်မိက်ကၠုၚ်တံဂှ် ဖ္ဍိုက်ဗပေၚ်ကဵုအာဟွံသေၚ်တုဲ အာအတိုၚ်ဂၠံၚ်တရဴ NCA ဏောၚ်ဂှ် ပ္ဍဲတ္ၚဲစၟတ်သမ္တီတံဂှ်တှ်ေ ဟီုကြီုကၠုၚ်ဒၟံၚ်လၟိုန်ရ။
ပရိုၚ်−သြၚ်လောန်တိုၚ်(မ်)
ဗီု−SAC