လိုၚ်ဗၠဲ၊ ဒဳဇြေမ်ဗာ ၁၈
ကုန်ဗ္ဒိုပ်နတ်ဒေ မဒှ်ဗ္ဒိုပ်ဒပ်ကံၚ်ဇြဳပၞာန်သၞာံလအ်မွဲ သှ်ေဒၟံၚ်လက္ကရဴအိုတ် ပ္ဍဲဒေသမာနေဝ်ပဠဝ် ဒၞါဲဌာန်ဂအုပ်တြေံ ဗော်သွးကောန်ဂကူကရေၚ် KNU ဂှ် ဒပ်ပံၚ်ကောံ KNLA တံ ဗ္တိုက်သီဂွံလဝ်ယျဂှ် ဂွံတီကေတ် အတိုၚ်ဂလာန် တမ်ရိုဟ်ပရိုၚ်ပရေၚ်ပၞာန်တံရ။
ပ္ဍဲဂိတုဒဳဇြေမ်ဗာ ၁၆ အခိၚ်ပယျာံဂယးဂှ် ဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA တံ လုပ်စိုပ်ဗ္တိုက်လဝ် ဗ္ဒိုပ်နတ်ဒေ မသှ်ေဒၟံၚ်လက္ကရဴအိုတ် ပ္ဍဲဒေသမာနေဝ်ပဠဝ်ဂှ်တုဲ အခိၚ်ဇိုၚ်သဝ်တ္ၚဲဂှ် သီဂွံလဝ် အလုံဗ္ဒိုပ်မွဲရ။
အပ္ဍဲပေါဲဗ္တိုက်သီဗ္ဒိုပ်နတ်ဒဂှ်ေ နူကဵုကံၚ်ဇြဳပၞာန်ဂှ် သီဂွံလဝ် ကပေါတ်အရပ်စပ်ပၞာန်ဂမၠိုၚ် ပါလုပ်သီုကဵုလွဟ်ဇၞော်၊ လွဟ်ဍောတ်တံဂှ်တုဲ ကောန်ဒပ်ကံၚ်ဇြဳပၞာန် ချိုတ်အာလဝ် ဗွဲမဂၠိုၚ်ဂၠေၚ်ဂှ် ပရိုၚ်တမ်ရိုဟ်ပရေၚ်ပၞာန်တံ ဟီုလဝ်ရ။
မာနေဝ်ပဠဝ် ကေၚ်ဒှ်လဝ်ဌာန်ဂအုပ်တြေံ KNU နွံပ္ဍဲပွိုၚ်ဍုၚ်လိုၚ်ဗၠဲ တွဵုရးကရေၚ်ဂှ် ပ္ဍဲဒေသဏံဂှ် ဗ္ဒိုပ်ဒပ်ကံၚ်ဇြဳပၞာန်ဂမၠိုၚ် မပ္တံကဵုဗ္ဒိုပ် (ကဆောဝါးလေး၊ ဖူးလေကုန်း၊ မြောက်ကုန်း၊ နို့ဒေး၊ သဒေါ့ဝါးလေး၊ ကယ်ဂေါ်ကျိုး) တံ ဖျေံလဝ်သ္ဇိုၚ်တုဲ ဗ္ဒိုပ်တံဏံသီုဖအိုတ်ဂှ် ဒပ်ပံၚ်ကောံ KNLA တံ စဗိုၚ်ဗ္တိုက်လဝ် နူဂိတုသေပ်တေမ်ဗာတုဲကၠုၚ်တေံရ။
ဟိုတ်နူဂကောံပံၚ်ကောံတံ ကၟာတ်လဒဵုဗ္တိုက်လဝ်ဂှ်တုဲ ကောန်ဒပ်ကံၚ်ဇြဳပၞာန်ဂမၠိုၚ် ဒုၚ်ဒဝ်ဟွံမာန် ထောံလသာကၠုၚ်ဗ္ဒိုပ် မွဲတုဲမွဲတုဲ ဒးဂြိပ်အာလဝ်တုဲ ကၞောတ်တဲ ဒးဆုတ်ကလေၚ်ကၠုၚ်လဝ် လ္ပာ်ဗ္ဒိုပ်နတ်ဒေ (ပွိုက်−၉၁၃) ဂှ်တုဲ လ္ပာ်ဒပ်ပံၚ်ကောံတံ ဆက်ကၟာတ်လဒဵုဗ္တိုက်လဝ်ဂှ်ရ အခိၚ်ဒပ်ကံၚ်ဇြဳပၞာန် ဟွံဂွံဇွောံမစၞစ ကေုာံ ပၞာန်အရီုဗလးတိတံဂှ် ဒးဒုၚ်ဗ္တိုက်သီလဝ်ရ။
ဒပ်ကံၚ်ဇြဳပၞာန် ဗ္တိုက်သီဂွံလဝ် ဌာန်ဂအုပ်မာနေဝ်ပဠဝ် KNU ပ္ဍဲသၞာံ ၁၉၉၅ ဂှ်တုဲ ပွိုၚ် ၃၀ သၞာံလအ်ကၠုၚ်တုဲဂှ် KNLA ကဵု ဒပ်ပံၚ်ကောံ ဂကောံဇြဟတ်ပၠန်ဂတးတံ ကလေၚ်သီဂွံလဝ်ရ။
ပ္ဍဲဒေသမာနေဝ်ပလဝ် တိဍာ်ဒပ်မဟာ ၇ KNU ဂှ် ဗ္ဒိုပ်ဒပ်ကံၚ်ဇြဳပၞာန် အိုတ်အးအာယျတုဲ သ္ကုတ်လ္တူဒေသမာနေဝ်ပဠဝ် မွဲဒမြိပ်ၜဳသၚ်လောန် တိဍာ်ဒပ်မဟာ ၅ ဂှ်လေဝ် ဗ္ဒိုပ်ဒပ်ကံၚ်ဇြဳပၞာန် အိုတ်အးအာယျဂှ် ဂွံတီကေတ် အတိုၚ်ဂလာန် တမ်ရိုဟ်ပရိုၚ်ပရေၚ်ပၞာန်တံရ။
ပရိုၚ်−သြၚ်လောန်တိုၚ်(မ်)
ဗီု−SAW KAW