ထဝါဲ၊ ဒဳဇြေမ်ဗာ ၁၈
ကောန်ဒပ်ကံၚ်ဇြဳပၞာန်မွဲတၠ နူတမ်ဒပ်ကံၚ်ဇြဳပၞာန် ခမရ စၟတ် ၂၅ ဖျေံသ္ဇိုၚ်ပွိုၚ်ဍုၚ်ထဝါဲ ရးတၞၚ်သဳဂှ် လုပ်စိုပ်ဖျေံကၠုၚ်လွဟ် သီုလွဟ်လက်နက်ဂှ် ဂွံတီကေတ် ဇရေၚ်ဒပ်ပၞာန်ဗၠးၜးကောန်ဂကူထဝါဲ DNLA ရ။
ကောန်ဒပ်ကံၚ်ဇြဳပၞာန် နူတမ်ဒပ် ခမရ ၂၅ မၞုံယၟုဖိုဝ်ထိုဲဂှ်ဝွံ တုဲကၠုၚ်ပ္ဍဲဂိတုဒဳဇြေမ်ဗာ ၈ တေံ ကေတ်အဆက်ကဵုညးတာလျိုၚ် ဗ္ဒိုပ်ဒပ်မုက်ပၞာန် ဒပ်ပၞာန်ဗၠးၜးကောန်ဂကူထဝါဲ DNLA တုဲ လုပ်စိုပ်ဖျေံကၠုၚ်လဝ်လွဟ်ရ။
ကောန်ဒပ်ကံၚ်ဇြဳပၞာန် လုပ်စိုပ်ဖျေံကၠုၚ်လွဟ်ဏံ ဖိုဝ်ထိုဲဂှ်ဝွံ သၞာတ် MA1 မွဲဇကိုအ်၊ ဖျေဲလွဟ် ၃၊ မကမ် ၁၂၀ ဒကောၚ်၊ ၜုန်ဂၠေံမွဲတၞုၚ် ပါလုပ်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြး DNLA ရ။
ကောန်ဒပ်ဖိုဝ်ထိုဲ လုပ်စိုပ်ကၠုၚ်လ္ပာ်ညးဍုၚ်ကွာန်တံဂှ် နူဒပ်ပၞာန်ဗၠးၜးကောန်ဂကူထဝါဲ ဖျေံလာပ်ပ္တိုန်လဝ်စရာဲ သြန်မသုန်ကိုဋ်ဒ္ကေဝ်တုဲ အတိုၚ်ပၟိက်ဆန္ဒညး ပလံၚ်ဗစိုပ်ကဵုလဝ် တိဍာ်ဗၠးၜးရောၚ် သ္ဂးရ။
ယြဴပူဂဵုလဵုမွဲဟွံဟီု မလုပ်စိုပ်ကၠုၚ် ဇရေၚ်ညးဍုၚ်ကွာန်တံဂှ် ဒပ်ပၞာန်ဗၠးၜးကောန်ဂကူထဝါဲ DNLA ဒုၚ်ဒၟံၚ်တၠုၚ်လၟိုန်ဂှ် ကဵုလဝ်သမ္တီရ။
တုဲကၠုၚ် ပ္ဍဲဂိတုနဝ်ဝေမ်ဗာ ၂၂ တေံဂှ်လေဝ် ကောန်ဒပ်ကံၚ်ဇြဳပၞာန်မွဲတၠ နူကုန်ဗ္ဒိုပ်ကျံက်နဳမဝ် ပွိုၚ်ဍုၚ်လံၚ်လုၚ်ဂှ် ကေတ်အဆက် ဇရေၚ်ဒပ်ဒမၠုက်နွေဥူတုဲ လုပ်စိုပ်ဖျေံလဝ်လွဟ်ဂှ် ဂွံတီကေတ်ရ။
အတိုၚ်တၚ်လလောၚ်တြး အလဵုအသဳညဳသၟဟ်ဂကူ NUG ဂှ်မ္ဂး အပ္ဍဲဂိတုနဝ်ဝေမ်ဗာတုဲကၠုၚ်တေံ လ္ပာ်ကံၚ်ဇြဳပၞာန် သ္ကိုပ်ဗိုလ်မွဲတၠ မပါလုပ်ဂှ် ကောန်ဒပ်ဗၠာဲသၟိၚ် ကေုာံ ကောန်ဒပ် ၃၃ တၠ လုပ်စိုပ်ဖျေံလဝ်လွဟ် ဇရေၚ် PDF တံရ။
ပရိုၚ်−သြၚ်လောန်တိုၚ်(မ်)
ဗီု−DNLA