ဇြပ်ဗု၊ ဒဳဇြေမ်ဗာ ၂၀
သွက်ဂွံကၠောန်ဗဒှ် သ္ဘၚ်စၟတ်သမ္တီ တ္ၚဲပ္တန်ဍုၚ်ဇြပ်ဗု တွဵုရးဍုၚ်မန် ပေၚ် ၁၅၀ သၞာံဂှ် ကံၚ်ဇြဳပၞာန် အာတ်မိက်ဒၟံၚ်သြန် ဇရေၚ်တၠကမၠောန်ပရေၚ်ပိုန်ဒြပ်တံ ဂၠိုၚ်ကဵုစှော်ကိုဋ်ဂှ် တၠကမၠောန်ဟွံမိက်ထ္မံက်ယၟုဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
သွက်ဂွံကၠောန်ဗဒှ် သ္ဘၚ်စၟတ်သမ္တီဒက်ပ္တန်ဍုၚ်ဇြပ်ဗုဂှ် ပ္ဍဲဂိတုနဝ်ဝေမ်ဗာကြပ်အိုတ်တေံ ဂကောံအုပ်ဓုပ်ကာနာနာ ဍုၚ်ဇြပ်ဗု လ္ပာ်ကံၚ်ဇြဳပၞာန် ကော်ဆဵုဂဗလဝ် တၠကမၠောန်ပရေၚ်ပိုန်ဒြပ် မၞုံအပ္ဍဲပွိုၚ်ဍုၚ်တံဂှ်ရ။
ပ္ဍဲပေါဲဆဵုဂဗဏံဂှ် ညံၚ်သ္ဘၚ်ဂွံဒှ် နကဵုတၠကမၠောန်ပရေၚ်ပိုန်ဒြပ်ဂမၠိုၚ် တန်တဴကဵုဂကူအဇာကမၠောန်တံဂှ်တုဲ သွက်ဂွံစုတ်ကဵုသြန်လှုဲတံအိုတ်ဂှ် ဂကောံအုပ်ဓုပ်ကံၚ်ဇြဳပၞာန် အာတ်မိက်ကၠုၚ်ရ။
တၠကမၠောန်ပရေၚ်ပိုန်ဒြပ် ဟွံမိက်ထ္မံက်ယၟုမွဲတၠဂှ်တှ်ေ တန်တဴကဵုဂကူကမၠောန်တုဲ အာတ်မိက်လဝ် တၠကမၠောန်ပရေၚ်ပိုန်ဒြပ်ဂမၠိုၚ် အကြာပိကိုဋ်ကဵု ၅၀ ကိုဋ်ဒ္ကေဝ်ရောၚ် ဟီုရ။
ကံၚ်ဇြဳပၞာန်ဂှ်တှ်ေ သွက်ဂွံကၠောန်ဗဒှ်သ္ဘၚ်စၟတ်သမ္တီ ဒက်ပ္တန်ဍုၚ်ဇြပ်ဗုဂှ် ရန်လဝ် ဖအိုတ်အာ ၁၀၀၀ ကိုဋ်ဒ္ကေဝ်ပြၚ်ဏောၚ် မဒှ်ရ။
အပ္ဍဲပွိုၚ်ဍုၚ်ဇြပ်ဗုဂှ် ကမၠောန်နွံဒၟံၚ် ဟွံအောန်နူကဵု ၅၀၀ ပြၚ်တုဲ ၜိုတ် ၂၅၀၀ ကိုဋ် ဗက်ဂွံမာန်ဏောၚ်ဂှ် တၠကမၠောန်ဂမၠိုၚ် ဟီုလဝ်ရ။
သ္ဘၚ်စၟတ်သမ္တီဏံဂှ် ကၠောန်ဗဒှ်အာ ပ္ဍဲကၠအ်ပ္ကဴလဒေါဝ်ဍုၚ်ဇြပ်ဗု နူဂိတုဒဳဇြေမ်ဗာ ၂၇ စဵုကဵု ၃၀ ဂှ်ဏောၚ်ဂှ် စဳဇန်လဝ်ရ။
အပ္ဍဲသ္ဘၚ်ဂှ် ညးဍုၚ်ကွာန်ဂမၠိုၚ် ပံၚ်ကောံတုဲ ကဵုဒါန်ဖါပ်သၚ်၊ ကဵုဒါန်လံၚ်ဗဗေၚ်သ္ၚုကၠေၚ် ကပေါတ်နာနာ ကုသၚ် ၁၅၀ ဇကု၊ ပစူလိက်တၟအ်တိုၚ်၊ ပ္တိတ်မဂ္ဂဇြေန်၊ ပ္တိတ်ကြက္ကဒိန်၊ ပေါဲဝေၚ်ဒြဟတ်၊ သ္ဘၚ်လဟိၚ်စိုတ် ကေုာံ သီုသ္ဂောံကၠောန်ဗဒှ်အာ ပေါဲပြိုၚ်လိက်ပတ်တံဂှ် ရန်လဝ်ရ။
ဍုၚ်ဇြပ်ဗုဂှ် စဒက်ပ္တန်လဝ် ပ္ဍဲသၞာံ ၁၈၇၄ တေံတုဲ စိုပ်သၞာံ ၁၉၆၄ ဂှ် ခုန်ပ္တန်ကၠုၚ် နဒဒှ်ကဆံၚ်ပွိုၚ်ဍုၚ်ရ။
ပရိုၚ်−သြၚ်လောန်တိုၚ်(မ်)
ဗီု−CJ