ပ္ဍဲပေါဲဗ္တိုက်ရေဝ်ဂှ် ကောန်သ္ဂံၚ်ပၠန်ဂတးၜါတၠ ပြဟ်လလုဲ

ရေဝ်၊ ဒဳဇြေမ်ဗာ ၂၀

အပ္ဍဲပေါဲဗ္တိုက်သီဗ္ဒိုပ် ဒပ်ကံၚ်ဇြဳပၞာန် မဖျေံလဝ်ဒပ် ပ္ဍဲကွာန်ကျာ် ပွိုၚ်ဍုၚ်ရေဝ် တွဵုရးဍုၚ်မန်ဂှ် ကောန်သ္ဂံၚ်ပၠန်ဂတးၜါတၠ ပြဟ်လလုဲအာလဝ််တုဲ ပိတၠ ဇီုကပိုက်ကလိဂွံလဝ်ဝပ်ရောၚ် သ္ကိုပ်ကရောၚ်ပၞာန်ဒဝ်ဏ သဝ်ဒါကိုဝ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

တုဲကၠုၚ် ပ္ဍဲဂိတုဒဳဇြေမ်ဗာ ၁၇ တေံ ဒပ်ပံၚ်ကောံဂကောံဇြဟတ်ပၠန်ဂတးတံ လုပ်စိုပ်ဍိုက်ဗ္တိုက်လဝ် ဗ္ဒိုပ်ဒပ်ကံၚ်ဇြဳပၞာန် မဖျေံလဝ်ဒပ် ဗ္ဒါဲဒဒန်ကွာန်ကျာ်ဂှ်ရ။

ဟိုတ်နူပရေၚ်ဗ္တိုက်ဏံတုဲ ပေါဲဗ္တိုက်ၜါလ္ပာ် က္တဵုဒှ်လဝ် လလအ်ပွိုၚ်မွဲနာဍဳပြၚ်တုဲ ဒပ်ပၠန်ဂတးတံ သီဂွံလဝ် ဗ္ဒိုပ်ဒပ်ကံၚ်ဇြဳပၞာန်ဂှ်ရ။

အပ္ဍဲပေါဲဗ္တိုက်သီဗ္ဒိုပ်ဂှ် နူကရောၚ်ပၞာန်ဒဝ်ဏ ဒပ်ပၞာန်စဵုဒၞါညးဍုၚ်ကွာန် PDF ဂှ် ကောန်သ္ဂံၚ်မွဲတၠ၊ နူဗော်ဍုၚ်မန်တၟိ ဗ္တိုက်သရိုဟ်တၠအဝဵုပၞာန် NMSP AD ဂှ် ကောန်သ္ဂံၚ်မွဲတၠ ဒးပြဟ်လလုဲအာလဝ်ရ။

လ္ပာ်ကံၚ်ဇြဳပၞာန်ဂှ်လေဝ် ပါလုပ်သီုကဵုသၞာဲဒဴမွဲတၠဂှ် ပန်တၠချိုတ်အာလဝ်တုဲ ထပှ်တၠ ဇီုကပိုက်ကလိဂွံလဝ်ဝပ်တုဲ ဗ္ဒိုပ်ဒပ်ကံၚ်ဇြဳပၞာန်ဂှ်တှ်ေ ဒပ်ပံၚ်ကောံ ဂကောံဇြဟတ်ပၠန်ဂတးတံ စံၚ်ပလီုပလာ်လဝ်ရောၚ် သ္ဂးရ။

ပေါဲဗ္တိုက်တုဲဂှ် ဒပ်ကံၚ်ဇြဳပၞာန် ဖျေံသ္ဇိုၚ်ရေဝ်ဂှ် နကဵုဇြဟတ်ဒပ် ဗၞတ် ၆၀  ကၠုၚ်စိုပ်ဖျေံလဝ်ဒပ် ပ္ဍဲပွဳပွူ ဗ္ဒါဲဒဒန်ကွာန်ကျာ်ဂှ်ရောၚ် ဂွံတီကေတ် အတိုၚ်ဂလာန်ညးဒေသတံရ။

သ္ကုတ်ဂၠံၚ်ရေဝ်−ဇြပ်ဗု ဒပ်ပံၚ်ကောံပၠန်ဂတးတံ မထိၚ်ဒက်လဝ်ဂှ် လ္ပာ်ကံၚ်ဇြဳပၞာန်တံ ဂ္စါန်ကၠုၚ်သ္ဂောံကလေၚ်ထိၚ်ဒက်ဂှ်တုဲ ပေါဲဗ္တိုက်တံ ကလေၚ်က္တဵုဒှ်ဒၟံၚ် မွဲဏှမွဲဏှရ။

ပရိုၚ်−သြၚ်လောန်တိုၚ်(မ်)

ဗီု−CJ