ကျာ်ထဝ်၊ ဒဳဇြေမ်ဗာ ၂၁
ပ္ဍဲကွာန်(ဝင်းကလော့) ပွိုၚ်ဍုၚ်ကျာ်ထဝ် တွဵုရးဍုၚ်မန်ဂှ် ပေါဲဗ္တိုက်ဟွံမွဲမွဲသာ် ဒပ်ကံၚ်ဇြဳပၞာန် ဟိုတ်နူပန်ပှော်ကၠုၚ်လွဟ်ဇၞော်ဂှ်တုဲ ကောန်အရာပ်မွဲတၠ ချိုတ်တုဲ မွဲတၠ ဇီုကပိုက်ကလိဂွံလဝ်ဝပ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲဂိတုဒဳဇြေမ်ဗာ ၁၉ အခိၚ်ဗ္တံ ၜိုတ် ၈ နာဍဳဂှ် ဒပ်ကံၚ်ဇြဳပၞာန် ဖျေံလဝ်ဒပ် ပ္ဍဲကွာန်(ဝင်းကလော့)ဂှ် ပန်ကၠုၚ်ကဵုလွဟ်ဇၞော်တုဲ ပရေၚ်ဗ္တိုဟ်ထ္ကး က္တဵုဒှ်လဝ် အပ္ဍဲကွာန်ဂှ်ရ။
ဟိုတ်နူလွဟ်ဇၞော် ဒတုံဗ္တိုဟ်ထ္ကးအာလဝ်တုဲ ကိုဝ်မျဵုလှာၚ်ဝေန် အာယုက် ၃၂ တိက်ဒၟံၚ်ပ္ဍဲသ္ၚိ ဒးလွဟ်ချိုတ်အာလဝ်တုဲ သမ္ဘာညး ဒဝ်ကျူကျူဝေန် အာယုက် ၂၇ ဂှ်ဝွံ ဒးအာလဝ်မကမ်လွဟ် ပ္ဍဲကဵုတဲ၊ ပ္ဍဲဇကုဇကောဝ်ရ။
ဟိုတ်နူလွဟ်ဇၞော်တုဲ ညးဗြဴဇီုကပိုက်ကလိဂွံလဝ်ဝပ်ဂှ်ဝွံ နကဵုအရီုဗၚ်ဂကောံရီုဗၚ်ဟံၚ်ပြာ်တံဂှ် တိုန်စိုပ်လွဳဒၟံၚ် ပ္ဍဲရုၚ်ဂဥုဲကျာ်ထဝ်ဂှ် ညးဒေသတံ ဟီုရ။
ပ္ဍဲပွိုၚ်ဍုၚ်ကျာ်ထဝ်ဂှ် အပ္ဍဲကာလသီအဝဵုဏံ ဒပ်ကံၚ်ဇြဳပၞာန် ကလိလောန်ဒၟံၚ် ပရေၚ်ပန်ပှော်လွဟ်ဇၞော် ပ္ဍဲကဵုကွာန်ညးဍုၚ်ကွာန်ကောန်အရာပ်တံ မမံၚ်တန်တဴဒၟံၚ်တံဂှ် ကြပ်လၟေၚ်ဒဒှ်တ္ၚဲဂှ်ရ။
အတိုၚ်ဂလာန် ညးဒေသတံဂှ်မ္ဂး တမ်ဒပ်ကံၚ်ဇြဳပၞာန် ခမရ စၟတ် ၂၀၇၊ ဒပ်အမၠံက် စၟတ် ၃၁၀ ကေုာံ တမ်ဒပ်အမၠံက် စၟတ် ၆၀၂ ဖျေံသ္ဇိုၚ်ကျာ်ထဝ်တံ ပန်ပှော်ဒၟံၚ်လွဟ်ဇၞော်တံ ဗွဲအဓိကရ။
လအာတုပ်သာ်ဂှ်ကီု တုဲကၠုၚ်ပ္ဍဲဂိတုနဝ်ဝေမ်ဗာ ၂၂ တေံဂှ်လေဝ် ဟိုတ်နူဒပ်ကံၚ်ဇြဳပၞာန် ပန်ပှော်လဝ်လွဟ်ဇၞော် ပ္ဍဲကွာန်(သုံးခွ) ပွိုၚ်ဍုၚ်ကျာ်ထဝ်ဂှ်တုဲ ယာဲကဵုကောန်ၜါတၠ ဇီုကပိုက်ကလိဂွံအာလဝ်ဝပ်ရ။
ပရိုၚ်−သြၚ်လောန်တိုၚ်(မ်)
ဗီု−CJ