မတ်မလီု၊ ဒဳဇြေမ်ဗာ ၂၀
ပ္ဍဲတွဵုရးဍုၚ်မန် တိဍာ်အုပ်ဓလီုကံၚ်ဇြဳပၞာန်တံ ဇြဟတ်ခိုဟ်ဒၟံၚ်ဂှ် ဒပ်ပၠန်ဂတးရပ်လွဟ် ပသ္ဇိုၚ်ကဵုဂကူမန်တံ သွက်ဂွံပံၚ်တောဲရေၚ်တၠုၚ်အာပရေၚ်ပၞာန်ဂှ် တုပ်လဝ်စိုတ်ရောၚ် ပ္ဍဲဂိတုဒဳဇြေမ်ဗာ ၁၉ ဂှ် ဒပ်ဂမၠိုၚ် ပံၚ်တောဲလလောၚ်တြးလဝ်ရ။
ဒပ်ပၠန်ဂတးရပ်လွဟ်မန်ဂမၠိုၚ် မပ္တံကဵုဒပ်ပၞာန်ဗၠးၜးဍုၚ်မန် MLA ၊ ဒပ်ပၞာန်ဗၠးၜးကောန်ဂကူမန် MNLA AD ၊ ဒပ်စဵုဒၞါဍုၚ်မန် MSDF ကေုာံ ဒပ်ပၠန်ဂတးဍုၚ်မန် MSRF တံ ဆဵုဂဗလဝ်ညးသ္ကအ် ပ္ဍဲဂိတုဒဳဇြေမ်ဗာ ၁၈ တေံရ။
အပ္ဍဲပရေၚ်ဆဵုဂဗဏံဂှ် သဳကၠဳလဝ် ကိစ္စပရေၚ်ပံၚ်တောဲရေၚ်တၠုၚ် စပ်ကဵုပရေၚ်ပၞာန်တံတုဲ ဒပ်ပၠန်ဂတးမန်ဖအိုတ်ပါလုပ်တုဲ ညံၚ်ဒပ်မန်မွဲ ဂွံမံက်ဂတဝ်ကၠုၚ်ဂှ် တုပ်လဝ်စိုတ်ရ။
သ္ကိုပ်ဒပ် ဒပ်စဵုဒၞါဍုၚ်မန် MSDF ဒံက်တာသဳရိမန်ဆာန်ဂှ်တှ်ေ တုပ်ကၠုၚ်စိုတ်သာ်ဏံဂှ်ဝွံ ပါဲနူကဵုအကာဲအရာပရေၚ်ပၞာန်ဂှ် ဟိုတ်နူကောန်ဂကူမန် အပ္ဍဲဍုၚ်၊ မ္ၚးဍုၚ်တံ အာတ်မိက်ကၠုၚ်ဏောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ဟိုတ်နူကဵုအကာဲအရာပရေၚ်ပၞာန် ပရေၚ်ဍုၚ်ကွာန် မက္တဵုဒှ်ဒၟံၚ်လၟုဟ်ဂှ်ကီု တုဲပၠန် ဆန္ဒညးဍုၚ်ကွာန်ကောန်ဂကူမန် အပ္ဍဲဍုၚ်မ္ၚးဍုၚ်တံ အာတ်မိက်ကၠုၚ်တံလေဝ် ပါကီု။ ညးဍုၚ်ကွာန်မန်တံဂှ်တှ်ေ ဒပ်ရပ်လွဟ်မန်သီုဖအိုတ် ပံၚ်ကောံဒှ်မွဲတုဲ သွက်ဂွံချဳဒရာၚ် နဒဒှ်ဒပ်ရပ်လွဟ်မန်မွဲဂှ် အာတ်မိက်ကၠုၚ်လဝ် အဆက်က်ရ” သာ်ဝွံ သ္ဂးရ။
အပ္ဍဲပရေၚ်ပၞာန်သီအဝဵုဏံ ပ္ဍဲဒေသကောန်ဍုၚ်အရၚ်တၞဟ်ဟ် ဗွဲမဂၠိုၚ်ဂှ် သီဂွံလဝ် တိဍာ်ထိၚ်ဒက်မဂၠိုၚ်ဂၠေၚ်ကီုလေဝ် ပ္ဍဲတွဵုရးဍုၚ်မန်ဏံဂှ်တှ်ေ ပရေၚ်ပၞာန်ဗ္တိုက်သီအာ ဌာန်ဂအုပ်ပၞာန် ဗ္ဒိုပ်ဒပ်ကံၚ်ဇြဳပၞာန်တံဂှ် ဟွံဂွံဆဵုကေတ်ဏီရ။
စပ်ကဵုပရေၚ်ဏံတုဲ ဒပ်ရပ်လွဟ်မန်တံသီုဖအိုတ် ဂွံဒှ်မွဲ ပံၚ်ကောံအာ သၟဝ်ပရေၚ်က္ဍိုက်ပ် ပရေၚ်ပၞာန်ပရေၚ်ဍုၚ်ကွာန်မွဲဂှ်တုဲ ဂွံလုပ်ပေါဲဗ္တိုက် သွက်ပရေၚ်ဗၠးၜးကောန်ဂကူမန် မွဲစွံဂှ် ညးဍုၚ်ကွာန်မန်တံ ဆန္ဒနွံကၠုၚ်ရ။
ဒပ်ပၠန်ဂတးမန်တံသီုဖအိုတ်ပါလုပ်တုဲ ညံၚ်ဒပ်မန်မွဲ ဂွံမံက်ဂတဝ်ကၠုၚ် ပ္ဍဲအရာထ္မံက်ရုပ်ရဴဂှ် နဒဒှ်ကဆံၚ်ပထမဂှ်တှ်ေ ဒပ်ရပ်လွဟ်မန် ၄ ဂကောံ ပံၚ်တောဲတုဲ သွက်ဂွံကၠောန်အာ ပရေၚ်ချဳဒရာၚ်ပရေၚ်ပၞာန်တံဂှ် တုပ်လဝ်စိုတ်ရ။
ဟိုတ်ဂှ်ရ ပ္ဍဲကဵုဒေသ ဂကောံဒပ်ရပ်လွဟ်မန် ၄ ဂကောံ မပံၚ်တောဲလဝ် သွက်ဂွံချဳဒရာၚ်ပရေၚ်ပၞာန်တံဂှ်သၟးဟွံက ပ္ဍဲကဵုဒေသ မဆက်စပ်ကဵုတွဵုရးဍုၚ်မန်တံဂှ်လေဝ် ဒှ်သဘဴပံၚ်တောဲကၠောန်အာ ပရေၚ်ပၞာန်တံဏောၚ်ဂှ် ညးတာလျိုၚ်ဂကောံဂမၠိုၚ် သ္ဂးရ။
ကံၚ်ဇြဳဖေဝ်ဒရာဍုၚ်မန် MSFC မသ္ကိုပ်သ္ကဒၟံၚ် ပရေၚ်ပၞာန်၊ ပရေၚ်ဍုၚ်ကွာန် ပ္ဍဲပၠန်ဂတးမန်ဂှ် သ္ကိုပ်ဌာနကာစဵုဒၞါ နာဲဍေန်ပၠဟံသာဂှ်တှ်ေ ပြဟ်ဟ်ဏံ ဒေသလဵုမွဲ ဂွံဝေၚ်အာပရေၚ်ပၞာန်ရောဟီုဂှ် ဟွံဂွံသ္ဂုတ်သွာတ်ဏီကီုလေဝ် ပံၚ်တောဲဗ္တိုက်အာဏောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ပံၚ်တောဲချဳဒရာၚ်အာပရေၚ်ပၞာန်ဏောၚ်ဟီုမ္ဂး ကၠောံၜက်နူတိဍာ်မဆေၚ်စပ်တံဂှ်တုဲ ဒှ်သဘဴပံၚ်ဗ္တိုက်အာဏောၚ်။ ဆ္ဂး ဒၞါဲလဵုရော အာဗီုလဵုရော အာဒေသလဵုရောဟီုဂှ် ပိုယ်တံ ဟွံဂွံဖျေံသ္ဂုတ်သွာတ်ဏီပုဟ်။ ဆ္ဂး ပံၚ်ဗ္တိုက်အာဏောၚ် ကၠောံဒေသတုဲလေဝ် ဂွံအာကၠုၚ်ဂှ် နွံ” သာ်ဝွံ သ္ဂးရ။
ပရေၚ်ပံၚ်တောဲပရေၚ်ပၞာန်ဏံဂှ် ယဝ်ကၠောန်ၜိုတ် ဗွဲမအံၚ်ဇၞးမာန်မ္ဂး တမ်ရိုဟ်မ္ဒးဆေၚ်ဒၟံၚ်မုက်တံဂှ် တတ်ကၠောံမာန်တုဲ အစောံစရာဲကောန်ဒပ်တံဂှ်လေဝ် သၠုၚ်ပ္တိုန်ကဵုအာမာန်ဏောၚ်ဂှ် ညးဆက်ဟီုရ။
သ္အာၚ်နူဂှ်ပၠန် မဟာဗျူဟာပရေၚ်ပၞာန်တံ မံက်ဂတဝ်ကၠုၚ်ဏောၚ်ဂှ်ရ ပ္ဍဲတွဵုရးဍုၚ်မန် ပေါဲဗ္တိုက်တံ သာသ္ကာတ်မြဟ်ကၠုၚ်ဏောၚ်ဂှ် ညးချိၚ်ခယျကေတ်ရ။
ဒံက်တာသဳရိမန်ဆာန်ဂှ်တှ်ေ အတိုၚ်တၚ်တုပ်စိုတ် မဖျေံစၟတ်လဝ်ဂှ် ပြဟ်ဟ်ဏံ ပရေၚ်ပၞာန်ပံၚ်တောဲတံ နွံကၠုၚ်ဏောၚ်တုဲ ဖျေံတၚ်သ္ဂုတ်သွာတ်သ္ပဒတန်တုဲဗက် ပရေၚ်ထ္မံက်ရုပ်ရဴတံ စကၠုၚ်ဏောၚ်ဂှ် သ္ဂးရ။
ဟိုတ်နူပရေၚ်ပၞာန်သီအဝဵုတုဲ ပ္ဍဲတွဵုရးဍုၚ်မန်ဂှ် ဂကောံပၠန်ဂတးရပ်လွဟ် ပ္ဍဲကဵုမံက်ဂတဝ်ကၠုၚ် ဟွံအောန်နူကဵု ၃၀ ဂှ် ဂကောံရပ်လွဟ်မန်ပန်ဝွံ အခိၚ်ကာလညးကဵုညးဂှ် ဒက်ပ္တန်ကၠုၚ်လဝ်ဒပ် ဗီုညးကဵုညးအိုတ်ရ။
ပ္ဍဲကဵုဏံ ဒပ်စဵုဒၞါဍုၚ်မန် MSDF ၊ ဒပ်ပၠန်ဂတးဍုၚ်မန် MSRF ကေုာံ ဒပ်ပၞာန်ဗၠးၜးဍုၚ်မန် MLA တံဝွံ ဒပ်ပၞာန်သီအဝဵုတုဲ ဟွံလအ်ဂှ်ကဵု သီအဝဵုတုဲ ကာလဗွဲကြဴဏံဂှ် ဒက်ပ္တန်လဝ်အိုတ်ရ။
ဗော်ဍုၚ်မန်တၟိ ဗ္တိုက်သရိုဟ်တၠအဝဵုပၞာန် NMSP AD မပါ်တိတ်နူဗော်မိဂှ် ပ္ဍဲသၞာံ ၂၀၂၄ ဂိတုဖေဖဝ်ဝါရဳဂှ်မှ သွက်ဂွံဗ္တိုက်ကံၚ်ဇြဳပၞာန်ဂှ် ပါလုပ်ကၠုၚ်လဝ် ပ္ဍဲပၠန်ဂတးရပ်လွဟ်ရ။
အခိၚ်လၟုဟ် ဂကောံရပ်လွဟ်မန် ၄ ဂကောံဏံဝွံ လောန်ၜက်နူတိဍာ်ချဳဒရာၚ်ညးတံဂှ်တုဲ သွက်ဂွံပံၚ်တောဲလုပ်အာပေါဲဗ္တိုက် မွဲကရောံမွဲစွံ သၟဝ်မွဲအမိၚ်မွဲအသံဂှ် ဂွံကၠုၚ်လဝ်တၚ်တုပ်စိုတ်ရ။
ပရိုၚ်−သြၚ်လောန်တိုၚ်(မ်)
ဗီု−Social Media