ကျာ်ထဝ်၊ ဒဳဇြေမ်ဗာ ၂၂
ပ္ဍဲဒေသဒုၚ်သယိတ် ပွိုၚ်ဍုၚ်ကျာ်ထဝ် တွဵုရးဍုၚ်မန် ဒၞါဲပရေၚ်ပၞာန်ၜါလ္ပာ် မကြံၚ်မ္ၚိုဟ်ဒၟံၚ်ဂှ် လ္ပာ်ကံၚ်ဇြဳပၞာန် ထပ်ဗပေၚ်ကၠုၚ်လဝ် ဇြဟတ်ဒပ်တံဂှ်ရောၚ် ဂွံတီကေတ် အတိုၚ်ဂလာန် ညးဒေသတံကဵု ဒပ်ပံၚ်ကောံပၠန်ဂတးတံရ။
ကံၚ်ဇြဳပၞာန်ဝွံ စနူဂိတုဒဳဇြေမ်ဗာ ၁၉ တုဲ ထပ်ဗပေၚ်ကၠုၚ်လဝ် ဇြဟတ်ဒပ် ပ္ဍဲကဵုတမ်ဒပ်ဖျေံသ္ဇိုၚ်ဒုၚ်သယိတ်ဂမၠိုၚ် မပ္တံကဵု တမ်ဒပ်ခမရ စၟတ် ၂၀၇ ကဵု တမ်ဒပ်အမၠံက် စၟတ် ၃၁၀ တံဂှ်ရ။
အတိုၚ်ဂလာန် ညးဒေသတံဂှ်မ္ဂး အပ္ဍဲအကြာတ္ၚဲတံဏံ ကောန်ဒပ်ကံၚ်ဇြဳပၞာန် ဇြဟတ်ဂၠိုၚ်ကဵုကၠံ စိုပ်ကၠုၚ်ဇရေၚ်တမ်ဒပ်ကံၚ်ဇြဳပၞာန်ၜါတံဂှ်ရောၚ် သ္ဂးရ။
လ္ပာ်ကံၚ်ဇြဳပၞာန် ဟိုတ်နူဗပေၚ်ကၠုၚ်ဇြဟတ်ဒပ်တံဂှ်တုဲ ပေါဲဗ္တိုက်ၜါလ္ပာ် က္တဵုဒှ်ကၠုၚ်ဂှ် အကြာညးဍုၚ်ကွာန်ဒေသတံ ဒှ်ဒၟံၚ်ဓဝိၚ်တံ နွံဒၟံၚ်ရ။
ကိုဝ်အေမေန်ထောန် ညးဒုၚ်တာလျိုၚ် PDF ခရိုၚ်သဓီုဂှ်တှ်ေ ပ္ဍဲအရာကံၚ်ဇြဳပၞာန်တံ ဗပေၚ်ဇြဟတ်ဒပ်ဂှ် ညးစှ်ေနူတန်ဗ္တောန်ကွတ်ပၞာန်တံ ပါလုပ်ဂၠိုၚ်အိုတ်တုဲ ယဝ်ထ္ပက်ကၠုၚ်ကရောၚ်ပၞာန်မ္ဂး ပေါဲဗ္တိုက်တံ က္တဵုဒှ်ကၠုၚ်မာန်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲဒေသဒုၚ်သယိတ် ပရေၚ်ပၞာန်ၜါလ္ပာ် ကြံၚ်မ္ၚိုဟ်ဒၟံၚ်ဂှ် လ္ပာ်ကံၚ်ဇြဳပၞာန် ကၟာတ်လဒဵုလဝ် အခေါၚ်ဖ္ဍိုက်ဗၞိက်စၞစသုၚ် လ္ပာ်ကွာန်တံဂှ်တုဲ သီုကဵုစၟဳတ်ဒၟံၚ် ဗွဲမတေၚ်ဂြတ်ရ။
တုဲကၠုၚ် ပ္ဍဲဂိတုဒဳဇြေမ်ဗာ ၁၅ တေံဂှ်လေဝ် ဗ္ဒါဲကွာန်ဝါဒက်ကွေန် ဍုၚ်ဒုၚ်သယိတ်ဂှ် အကြာဒပ်ကံၚ်ဇြဳပၞာန်ကဵု ဒပ်ပၠန်ဂတးတံ ပေါဲဗ္တိုက်က္တဵုဒှ်လဝ်တုဲ ကောန်ဒပ်ကံၚ်ဇြဳပၞာန်ၜါတၠ ချိုတ်အာလဝ်ရ။
ပရိုၚ်−သြၚ်လောန်တိုၚ်(မ်)
ဗီု−Social Media