ဍာ်ဗု၊ ဒဳဇြေမ်ဗာ ၂၂
ဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန် ကွာန်ဇာဒဳ ပွိုၚ်ဍုၚ်ဍာ်ဗု ရးတၞၚ်သဳဂှ် ဟိုတ်နူစံၚ်ဒၟံၚ်ကွာန် ပွိုၚ်ၜါတ္ၚဲအဆက်က်ဂှ်တုဲ သ္ၚိဒၟံၚ်ဗွဲမဂၠိုၚ်ဂၠေၚ် ပၟတ်တူလီုလာ်ဒၟံၚ်ဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန် ပ္ဍဲကွာန်ဇာဒဳဂှ်ဝွံ ပ္ဍဲဂိတုဒဳဇြေမ်ဗာ ၂၀ အခိၚ်နူဂယးကဵု ဒဳဇြေမ်ဗာ ၂၁ လဒေါဝ်တ္ၚဲတံဂှ် စံၚ်ပလီုပလာ်ဒၟံၚ် သ္ၚိဒၟံၚ်မၞုံအပ္ဍဲကွာန်တံဂှ်ရ။
ဟိုတ်နူဒပ်ကံၚ်ဇြဳပၞာန် စံၚ်ပလီုပလာ်ဒၟံၚ်ဂှ်တုဲ ဂွံညာတ်ကေတ်ဒၟံၚ်ယက် နူကဵုသ္ၚိတူဒၟံၚ်တံဂှ်တုဲ ပ္ဍဲကွာန်ဂှ် ဒၟါနူဒပ်ကံၚ်ဇြဳပၞာန်နွံဒၟံၚ်တုဲ လၟိဟ်မဒးလီုလာ်အာတံဂှ် ဟွံဂွံတီကေတ် ချိုတ်တ်ပၠိုတ်တ်ပုဟ်ဂှ် ညးဒေသတံ သ္ဂးရ။
ကရောၚ်ပၞာန်ကံၚ်ဇြဳပၞာန် ဇြဟတ် ၁၀၀ ပြၚ်ပါဂှ်ဝွံ စနူဂိတုဒဳဇြေမ်ဗာ ၁၇ တုဲကၠုၚ်တေံတုဲ ထ္ပက်ဒၟံၚ်ကရောၚ်ပၞာန် ဇရေၚ်ဒၞါဲဒပ်စဵုဒၞါညးဍုၚ်ကွာန် မၞုံပ္ဍဲပွိုၚ်ဍုၚ်ဍာ်ဗုတံ နွံမာန်တံဂှ်ရ။
ဟိုတ်နူဒပ်ကံၚ်ဇြဳပၞာန် ထ္ပက်ဒၟံၚ်ကရောၚ်ပၞာန်ဂှ်တုဲ ညးဒေသဂၠိုၚ်ကဵုလ္ၚီ နူကဵုကွာန်(ဇာဒီ၊ ခွေးမဖော၊ ပယ၊ ခေါင်ပြန်၊ ဖားချောင်း) တံ ဒးဂြိပ်ဒဴပါဲဒလေတ်ဒၟံၚ်ရ။
တုဲကၠုၚ် ပ္ဍဲဂိတုဒဳဇြေမ်ဗာ ၁၉ တေံဂှ်လေဝ် အကြာဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန်ဂှ်ကဵု ဒပ်ပၠန်ဂတးတံဂှ် က္တဵုဒှ်လဝ်ပေါဲဗ္တိုက်ၜါလ္ပာ် အကြာကွာန်ပယကဵု ကွာန်ခေါၚ်ပြန်တံဂှ်တုဲ အကာဲအရာဇီုကပိုက်ချိုတ်တံဂှ် ဟွံဂွံတီကေတ်ဏီရ။
အတိုၚ်လိက်ဒုၚ်စဳရေၚ် ဂကောံသုတေသန Data For Myanmar မလလောၚ်ပ္တိတ်လဝ် ပ္ဍဲဂိတုနဝ်ဝေမ်ဗာ ၁၀ တေံဂှ်မ္ဂး အပ္ဍဲပၞာန်သီအဝဵု ပွိုၚ်ပိသၞာံပြၚ်ဏံ ဟိုတ်နူဒပ်ကံၚ်ဇြဳပၞာန် စံၚ်ပလီုပလာ်ဒၟံၚ်တံဂှ်တုဲ သ္ၚိဒၟံၚ်ကောန်အရာပ် မွဲကိုဋ်ပြၚ် ဒးလီုလာ်ဆောံလေၚ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−CJ