ပရေၚ်ဌာန်ဂအုပ်ပၞာန်ရး မစှ်ေအာဂှ် ကံၚ်ဇြဳပၞာန် သ္ၚိတ်ဇြဒၟံၚ်

နေဗျဳဒဝ်၊ ဒဳဇြေမ်ဗာ ၂၂

ဒပ်ကံၚ်ဇြဳပၞာန် သၟဝ်သ္ကိုပ်သ္ကက္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ်ဂှ်ဝွံ ဒးဆေၚ်ဒၟံၚ်မုက်ကဵုကျဗြံ ပ္ဍဲပရေၚ်ပၞာန်တံ မဂၠိုၚ်ဂၠေၚ်တုဲ အပ္ဍဲသၞာံဏံ ဒးဗလးကၠုၚ်တဲ ဒးဆောံလေၚ်လဝ် ဌာန်ဂအုပ်ပၞာန်ရးၜါ အဆက်က်ရ။

ဌာန်ဂအုပ်ပၞာန်ရးဗွဲဒိုဟ်ပလိုတ် ဖျေံသ္ဇိုၚ်ဍုၚ်အာမ် တွဵုရးရခေၚ် မဒးဗလးလဝ်တဲတဴတဴလဴလဴဂှ် အခိၚ်ကံၚ်ဇြဳပၞာန် ဒးကျဗြံကၠုၚ် အလန်ဒုတိယဂှ် က္ဍိုပ်သ္ကိုပ်ပၞာန်ကဵု ဂကောံကံၚ်ဇြဳပၞာန်တံ တိုန်ဒၟံၚ်ပေါဲသ္ဘၚ် ပ္ဍဲနေဗျဳဒဝ် ဟွံလီုရ။

ပ္ဍဲဍုၚ်ဗၟာ မလလောၚ်တြးလဝ် နဒဒှ်ကာလကာတၟေၚ်ဂှ် သွက်ဂွံထ္ၜးပျး ဒဒှ်ရၜိုဟ်သြိုဟ်ညိၚ်ဝတ်ဒၟံၚ်ဂှ် ကံၚ်ဇြဳပၞာန် ကၠောန်ဗဒှ်လတ် သ္ဘၚ်ဝေၚ်ဒြဟတ်ကောန်ဂကူ ဇၞော်ဇၞော်ရ။

ပ္ဍဲတ္ၚဲပံက်သ္ဘၚ်ဝေၚ်ဒြဟတ်ကောန်ဂကူဂှ် ဒပ်ပၞာန်ရခေၚ် AA သီဂွံလဝ် ဒပ်မၚ်ပယျဵုဖျေံသ္ဇိုၚ်မံၚ်တဝ် နခခ ၅ ဂှ်တုဲ ပ္ဍဲတ္ၚဲသ္ဘၚ်တုဲ ပ္ဍဲဂိတုဒဳဇြေမ်ဗာ ၂၀ ဂှ် ကံၚ်ဇြဳပၞာန် ဒးဆောံလေၚ်လဝ် အလုံဌာန်ဂအုပ်ပၞာန်ရးသ္ကုတ်ပလိုတ်မွဲရ။

ဆ္ဂး စပ်ကဵုပရေၚ်ဒးကျဗြံဂှ်တုဲ လ္ပာ်ကံၚ်ဇြဳပၞာန် သ္ၚိတ်ဇြဒၟံၚ်တုဲ ပ္ဍဲအသေအဟာန်ဂှ် က္ဍိုပ်သ္ကိုပ်ပၞာန် ဟီုဏာလဝ်ဂလာန် ဒဒှ်ရသ္ပစၟတ်သမ္တီ ကုညးယိုက်ဝန် ကေုာံ ကောန်ဒပ် မယိုက်ဒၟံၚ်တာလျိုၚ် အကြာတၚ်အခက်အခုဲတံဂှ်ရ။

အကြာပ်ဒပ်ဇြေယျ သ္ပလဝ် CDM နူကဵုဒပ်စဵုဒၞါဘဲသၞပၞာန်ကျာဂှ် ဒှ်ဒၟံၚ်အကာဲအရာ ကံၚ်ဇြဳပၞာန် ဟွံဂံၚ်ဒုၚ်ဝန် ပရေၚ်ကျဗြံတံဂှ်တုဲ ပမံၚ်ပၞ ညံၚ်မုဟွံဒှ်ဏီဂှ် ဟီုရ။

“ဍေံတံ ကျဟီုကီုလေဝ် ဍေံတံ သ္ၚိတ်ဒၟံၚ်။ အဓိကဂှ်တှ်ေ ပပၞဗီုပြၚ် ညံၚ်မုဟွံဒှ်ဏီတုဲ ကၠောန်ကၠုၚ်ဒၟံၚ်ပေါဲသ္ဘၚ်တံ အဆက်က်ရ။ ဟိုတ်ဂှ်ရ ပ္ဍဲကဵုပရေၚ်ကျဗြံဍေံတံဂှ် ဖေက်မၞိဟ်တံစိုတ်ဓာတ်လီုတုဲ ဒှ်ဒၟံၚ်အကာဲအရာ ဟွံဂံၚ်ဒုၚ်ဝန်ပရေၚ်ကျဗြံတံဂှ်ရ။ ညအ်ဂှ် လၟုဟ်ဟွံသေၚ်ပုဟ်။ ကၠာတေံလေဝ် ကၠောန်ကၠုၚ်လဝ် အဆက်က်ရ။ ဍေံတံၜိုတ်လဵုဒးဒုၚ်ဒးဒုၚ် ကၞုက်လဒဵုလဝ်ပရေၚ်ကျဗြံဍေံတံဂှ် ဒှ်ဗီုပြၚ်ဍေံတံရဏောၚ်’ သာ်ဝွံ သ္ဂးရ။

အပ္ဍဲပၞာန်သီအဝဵုဏံ အပ္ဍဲကဵုပရေၚ်ပၞာန် ၁၀၂၇ သ္ကုတ်ပထမကဵု သ္ကုတ်ဒုတိယ ရးသေံသ္ကုတ်သၟဝ်ကျာတေံ ကံၚ်ဇြဳပၞာန်တံ မဒးဂိအာလဝ်ဂှ် သွက်ကောန်ဒပ်ပ္ဍဲမုက်ပၞာန်တံဂှ် ထံက်ပၚ်သြန်ကီု၊ ဍုန်တိုပ်ပလံၚ်ဗစိုပ်ကဵုလဝ်စၞစသုၚ်တံ ကၠောန်သ္ပလဝ်ရ။

ပ္ဍဲလိက်ပရိုၚ်ကၟိန်ဍုၚ်ပိုၚ်တံဂှ် သွက်ကောန်ပၞာန်စိုပ်မုက်ပၞာန်တံဂးတုဲ ဌာနဝန်ဇၞော်တံ တၠကမၠောန်တံ ကဵုဒါန်သြန်တုဲ တြးကၠုၚ်လဝ် ဗီုရုပ်ဍုန်တိုပ်ပလံၚ်ကဵုဒၟံၚ် စၞစသုၚ်တံရ။

ဆ္ဂး နူအခိၚ်ဒးဗလးလဝ်တဲ ဌာန်ဂအုပ်ပၞာန်ရးဨသာန် ဖျေံသ္ဇိုၚ်လာယှိုဝ် စဵုကဵုဒးကျလဝ် ပ္ဍဲမုက်ပၞာန်ရခေၚ်ဂှ် ကံၚ်ဇြဳပၞာန် ကၠောန်ကၠုၚ်ပရေၚ်သၠုၚ်ပ္တိုန်စိုတ်ဓာတ် ကုကောန်ဒပ်စိုပ်မုက်ပၞာန်တံ လအာတုပ်သာ်ဏံဂှ် ဟွံဂွံဆဵုကေတ်ဏီရ။

အကာဲအရာပေါဲဗ္တိုက်ဗလးတိတံဂှ်လေဝ် ကံၚ်ဇြဳပၞာန် လလောၚ်ပ္တိတ်လဝ်ဟွံမွဲတုဲ နူကဵုချာန်နေဝ်တြးဝါဒထလဳဂရာမ်ကံၚ်ဇြဳပၞာန်တံရဂှ် ဒးမၚ်ရံၚ်ဒၟံၚ် တၚ်လလောၚ်တြးသ္ပဒတန် နူကဵုဂကောံလ္ပာ်တံဏံရ။

ဗိုလ်ဇၞော်ကံၚ်တူဝေန် သ္ပလဝ်ဇြဳဒဳအာမ်ဂှ် မွဲဒမြိပ်ဝၚ် စိုပ်ဒၟံၚ်ဍာ်သဝ်အိုတ်ဂှ်တုဲ ကောန်ဒပ်ဂမၠိုၚ်ဝွံ ဓဝ်ပတှ်ေလ္တူဒပ်ပၞာန်တံ စှ်ေကၠုၚ်ဒၟံၚ်ဟွံအောန်ဂှ် ဟီုလဝ်လညာတ်ညးရ။

“ကံၚ်ဇြဳပၞာန်ဂှ်တှ်ေ အကာဲအရာလၟုဟ်ဂှ် စိုပ်ဒၟံၚ်အကာဲအရာပရေံအိုတ်ရ။ စိုပ်ဒၟံၚ်အကာဲအရာညးတံသဝ်အိုတ်ဂှ်ရ။ သ္အာၚ်နူဂှ်ပၠန် အလဵုကောန်ဒပ်သၟဝ်တဲညးတံ နွံဒၟံၚ်အပ္ဍဲဒပ်တံဂှ် ဓဝ်ပတှ်ေလ္တူဒပ်ပၞာန် ယအ်စှ်ေကၠုၚ်ဒၟံၚ်ရ။ ဒေါအ်ဟွံဂွံတုဲ ဒးမံၚ်ဒၟံၚ်အပ္ဍဲဒပ်။ လ္ၚဵုတံဂှ်တှ်ေ ဒှ်ဒၟံၚ်ဒဵုကဵုကဆံၚ် စှ်ေကၠုၚ်စိုတ် ဒပ်ပၞာန်မုကၠောန်ဟွံမာန်တံဂှ်ရ” သာ်ဝွံ သ္ဂးရ။

က္ဍိုပ်သ္ကိုပ်ပၞာန်ဂှ်တှ်ေ အပ္ဍဲဍုၚ် အခိၚ်ဒးဂဗဒၟံၚ်ကဵု ပရေၚ်လုပ်စိုပ်ပလာပ်ပထုဲ အန္တရာယ်အပ္ဍဲဍုၚ်၊ မ္ၚးဍုၚ်တံဂှ် ပရေၚ်ဗ္တိုက်ကၠုၚ် နူဒိုဟ်နာနာသာ်တံဂှ် ဒးစဵုဒၞါအာ နကဵုစိုတ်ဓာတ်ညဳညဳသာသာဏောၚ်ဂှ် ဟီုဏာလဝ် ပ္ဍဲတ္ၚဲသ္ဘၚ်ဝေၚ်ဒြဟတ်တုဲဂှ်ရ။

ဂွံကၠောန်ဗဒှ်ကၠုၚ် ပေါဲဝေၚ်ဒြဟတ်သာ်ဏံမာန်ဂှ်ဝွံ ဟိုတ်နူသရာဲသဂံၚ် မစဵုဒၞါကဵုဒၟံၚ်ညံၚ်ဍုၚ်ကွာန်ဂွံဂီုကၠီုတံနွံ ဒှ်တုဲ ကောန်ဒပ်၊ ကောန်ဂကောံယိုက်လျိုၚ်ပၞာန်တံကဵု သ္ဇိုၚ်ဝန် မ္ဒးပြဟ်လလုဲအာတံဂှ် ပ္တိုန်စရာဲသ္ပစၟတ်သမ္တီရှ်ေသှ်ေဂှ် သ္ဂးရ။

အတိုၚ်တၚ်နၚ် ဂကောံသုတေသနဗၠးၜးတံဂှ်မ္ဂး အပ္ဍဲပရေၚ်ပၞာန်သီအဝဵုဏံ အလုံဍုၚ်မွဲ နကဵုကံၚ်ဇြဳပၞာန် ဒးဆေၚ်ဒၟံၚ်မုက်ကဵု ပၞာန်ထ္ပက်ပၠန်ဂတးအလုံဍုၚ်မွဲဂှ် ပ္ဍဲကဵုဍုၚ်ဇၞော် နွံပ္ဍဲတိဍာ်အုပ်ဓလီုဂမၠိုၚ် ဒးဆောံလေၚ်လဝ် ၜိုတ် ၉၀ ဍုၚ်တုဲ ဒးဗလးလဝ်ဗ္ဒိုပ်ဒပ် ဂၠိုၚ်ကဵုကၠံရ။

မွဲလ္ပာ်ဂှ်ပၠန် အပ္ဍဲပေါဲဗ္တိုက်ဗလးတိတံဂှ် ဇြဟတ်ဒပ်လေၚ်ဒိုက်ကီု၊ ဂြိပ်တိတ်ကီု၊ ပစူအလာံဗု ဖျေံလွဟ် ဒုၚ်ကျတံှဂ်လေဝ် နွံဒၟံၚ်တုဲ သွက်ဂွံဗပေၚ်ဇြဟတ်ဂှ် ရပ်ဒက်ကၠုၚ်ဒၟံၚ်သၟတ်တံ ဗွဲအနိၚ်အပိုၚ် နွံဒၟံၚ်ပၠန်ရ။

ပ္ဍဲအကာဲအရာ ပရေံကၠုၚ်ဒၟံၚ်သာ်ဏံဂှ် ကေတ်အခေါၚ်ခိုဟ်တုဲ ဂကောံရပ်လွဟ်ကောန်ဍုၚ်အရၚ်တံကဵု ဂကောံပၠန်ဂတးတံ မွဲအခိၚ်ဓဝ် သွက်ဂွံထ္ပက်ပၞာန် ကုဗ္ဒိုပ်ဒပ်ကံၚ်ဇြဳပၞာန် သှ်ေဒၟံၚ်တံဂှ် ထံက်ထ္ၜးဒၟံၚ်တံလေဝ် နွံဒၟံၚ်ရ။

ဗိုလ်ဇၞော် ကံၚ်တူဝေန်ဂှ်တှ်ေ စပ်ကဵုကံၚ်ဇြဳပၞာန် မကျဒၟံၚ်ပၞာန်ဏံ ခရံၚ်ခရဴဒၟံၚ်ဂှ်တုဲ ထ္ပက်ပၞာန် ကုတမ်ဒပ်ဒေသတၞဟ်ဟ်တံဂှ်မ္ဂး အံၚ်ဇၞးမာန်ကီုလေဝ် ဂွံဗ္တိုက်သီ ဌာန်ဂအုပ်ပၞာန်ရးၝောံဍုၚ်တံဂှ် ဒးကေတ်ဒၟံၚ် မဟာဗျူဟာ၊ ဒြဟတ်၊ မကမ်လွဟ်လက်နက်တံဏီဏောၚ်ဂှ် ဟီုလဝ်ရ။

ပရိုၚ်−သြၚ်လောန်တိုၚ်(မ်)

ဗီု−MOI/Social Media