မတ်မလီု၊ ဒဳဇြေမ်ဗာ ၂၂
ပ္ဍဲတွဵုရးဍုၚ်မန် ဟိုတ်နူသၞောဝ်ယိုက်လျိုၚ်ပၞာန် ကံၚ်ဇြဳပၞာန်တံဂှ်တုဲ ညးဒဒုၚ်ပကောံပကောန်ပၞာန် ဟွံအောန်နူကဵု ၁၇၀၀ နွံကၠုၚ်ဂှ် ဂွံတီကေတ် အတိုၚ်တၚ်နၚ် သြၚ်လောန်တိုၚ်(မ်) မပကောံပကေဝ်လဝ်ဂှ်ရ။
လၟိဟ်ကောန်ပၞာန်ဒးဒုၚ်ပကောံလဝ်ဂှ်ဝွံ ဒှ်တန်ဗ္တောန်ကွတ်ပၞာန် နူလၟေၚ် (၁) စဵုကဵု လၟေၚ် (၈) တုဲ သွက်တန်ဗ္တောန်ကွတ်ပၞာန် လၟေၚ် (၉) ဂတဏံဂှ်လေဝ် လ္ပာ်ကံၚ်ဇြဳပၞာန် ပကောံဒၟံၚ်မၞိဟ်တၟိ နွံဒၟံၚ်ရ။
ပ္ဍဲအရာပကောံကောန်ပၞာန်သာ်ဏံဂှ် ကၠာတေံဂှ် စန်ဒက်ဂွံလဝ် ကောန်ကလောန်ဆုဲပြံၚ်တံကဵု ညးဝါတ်ကျာတ်တံ နကဵုသြန်ကီုလေဝ် ပ္ဍဲကဵုတန်ဗ္တောန်ကွတ်ပၞာန် လၟေၚ် (၈) မပံက်လဝ် အပ္ဍဲဂိတုဒဳဇြေမ်လၟုဟ်ဏံဂှ် ရပ်ဒက်ကၠုၚ်ဗွဲအဓမ္မတုဲ ပလံၚ်ဏာလဝ် ဘာတန်ဗ္တောန်ကွတ်ပၞာန်တံရ။
ဟိုတ်နူပေါဲဗ္တိုက်ဗလးတိတုဲ ဇြဟတ်ဒပ်မ္ဒးလေၚ်ဒိုက်အာတံဂှ် ကံၚ်ဇြဳပၞာန် ပ္တိတ်ဒၟံၚ်ဇြဟတ် သ္ဂောံကလေၚ်ဗပေၚ်ဂှ်ဝွံ ဗွဲကြဴဏံ ဒှ်ကၠုၚ်စဵုကဵုရုပ်ရဴလီု အကာဲအရာပရေံဒၟံၚ်ရ။
ညးဒေသတွဵုရးဍုၚ်မန် ဟွံမိက်ထ္မံက်ယၟုမွဲတၠဂှ် ပ္ဍဲအရာပကောံပကောန်ပၞာန်တံဂှ် ရပ်ဒက်ပပဝ်တာ ကုသၟတ်အပ္ဍဲဒေသတံ အခိၚ်ဗ္တံတံဂှ် နွံကၠုၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“လၟုဟ်တှ်ေ ပရေံဂှ်တှ်ေ အခိၚ်ဗ္တံမ္ဂး ဍေံတံကဵုလဝ်ပေါဲသ္ဘၚ်။ စဴနူပေါဲတှ်ေ ဍေံတံမၚ်ဒၟံၚ်။ ဒှ်သၟတ်တံတှ်ေ ဖ္ဍိုက်ပ္တိုန်ဏာဟဂှ်ရ။ ကလေၚ်နုက်ကဵုသြန်ဟွံမာန်မ္ဂး ပလံၚ်ပ္ဍဲဒပ်ပၞာန်ဏောၚ်ဟီုတှ်ေ ရဲသ္ပမာန်တံဂှ်တှ်ေ ကလေၚ်နုက်ဏာရ။ လၟုဟ်ဂှ် သၟတ်ဂမၠိုၚ် ဒးပသတိကွေံကွေံဏောၚ်။ ညးသၟတ်တံ ဒးစွံသတိကဵု ပရေၚ်အာကၠုၚ်တံဏောၚ်။ မူဟိုတ်ရောတှ်ေ ၜိုတ်ဆဵုဂှ် တံၚ်ဂြဲဏာမံၚ်ဖအိုတ်” သာ်ဝွံ သ္ဂးရ။
အပ္ဍဲပၞာန်သီအဝဵုဏံ ဟိုတ်နူပရေၚ်ပၞာန် ၁၀၂၇ ဂကောံမဟာမိတ်ပိဂကောံဂှ်တုဲ ကံၚ်ဇြဳပၞာန် ဒးဂိကၠုၚ်ဒၟံၚ်ပ္ဍဲပရေၚ်ပၞာန် စဵုကဵုယာက္ဍိုပ်ဟွံမာန်ဂှ်ဝွံ သၞာံဏံ ပ္ဍဲဂိတုဖေဖဝ်ဝါရဳဂှ် ဂယိုၚ်ပ္တိုန်လဝ်သၞောဝ်ယိုက်ဂၠေၚ်လျိုၚ်ပၞာန်ရ။
အတိုၚ်သၞောဝ်ယိုက်ဂၠေၚ်လျိုၚ်ပၞာန်ဂှ်မ္ဂး ဒှ်မၞိဟ်တြုံမ္ဂး နူအာယုက် ၁၈ စဵုကဵု ၄၅ သၞာံ၊ ဒှ်မၞိဟ်ဗြဴမ္ဂး နူအာယုက် ၁၈ စဵုကဵု ၃၅ ဂှ် အောန်အိုတ် နူ ၂ သၞာံ စဵုကဵု ၅ သၞာံ ဒးယိုက်လျိုၚ်ပၞာန်တွဵုဏောၚ်တုဲ ယဝ်ဟွံယိုက်လျိုၚ်ပၞာန်မ္ဂး အောန်အိုတ် ဒးဒုၚ်ဒဏ်ထံၚ် ပိသၞာံမာန်ရ။
ညးမၞုံအခေါၚ်ဟီုဂး ဒပ်ပၠန်ဂတးဍုၚ်မန် MSRF နာဲနဂါဂှ်တှ်ေ ကံၚ်ဇြဳပၞာန် ပကောံကၠုၚ်ကောန်ပၞာန်ဂှ်ဝွံ ရပ်စပ်စကာဒၟံၚ်ဒပ်ပၞာန် သွက်ဒတုဲမြမောဝ်က္ဍိုပ်သ္ကိုပ်ပၞာန်တံဏောၚ်ဂှ် ဟီုရ။
“ကံၚ်ဇြဳပၞာန်ဂှ်တှ်ေ သွက်ဂွံကလေၚ်ဗပေၚ် ဇြဟတ်ဒပ်တံဂှ် ရပ်ဒက်ဒၟံၚ်သၟတ်အဝဲဍောတ်သွတ်တံ ဟွံဗဗွဲကဵုသၞောဝ်ရ။ မွဲပၠန်ဂှ် တိဍာ်နူကဵုသ္ကုတ်သၟဝ်ကျာ ဒးဆောံလေၚ်လဝ်တံဂှ် ကံၚ်ဇြဳပၞာန် လ္ပအ်တုဲပ္တိတ်ဒၟံၚ်ဇြဟတ် သွက်ဂွံကလေၚ်ကေတ်ရ။ ပြဝကၠောန်ကၠုၚ်ဒၟံၚ်သာ်ဏံ သီုဖအိုတ်ဂှ်ဝွံ ဍေံတံ သၠးအာအဝဵုကၟိန်ဍုၚ် လောဲလောဲသွာသွာ ဟွံသေၚ်ပုဟ်။ သွက်ဂွံစဵုဒၞါ ဒတုဲမြမောဝ်ဍေံတံဂှ် စကာဒၟံၚ်ဒပ်ပၞာန်ဂှ်ဏောၚ်ဂှ် အဲမိက်ဂွံဟီုဏာအဏံ သောၚ်ၚ်ကၠးကၠးရ” သာ်ဝွံ သ္ဂးရ။
ဟိုတ်နူသၞောဝ်ယိုက်လျိုၚ်ပၞာန်ကံၚ်ဇြဳပၞာန်တုဲ သၟတ်အပ္ဍဲဒေသတံဝွံ တိတ်စ္ဍးအာဍုၚ်သ္အာၚ် နကဵုလၟိဟ်ဗွဲမဂၠိုၚ်ဂၠေၚ်ကီု၊ ပါဲဒလေတ်အာ ပ္ဍဲတိဍာ် ဂကောံဇြဟတ်ပၠန်ဂတးတံ မထိၚ်ဒက်လဝ်တံ နွံဒၟံၚ်ရ။
ပ္ဍဲတွဵုရးဍုၚ်မန်ဂှ်တှ်ေ ညးဒးဒုၚ်ပကောံပကောန်ပၞာန်တံဂှ် ကဵုဒၟံၚ်တန်ဗ္တောန်ကွတ်ပၞာန် ပ္ဍဲဘာဗ္တောန်ကွတ်ကဆံၚ်သၠုၚ် ဒပ်ပၞာန် စၟတ် ၄ ဖျေံသ္ဇိုၚ်ကွာန်ဝါကလိ ပွိုၚ်ဍုၚ်ဇြပ်ဗုဂှ်ကဵု ပ္ဍဲဘာတန်ဗ္တောန် ပ္ကတ်ပ္ကေၚ်သ္ဇိုၚ်ပၞာန် စၟတ် ၉ ဖျေံသ္ဇိုၚ်ပွိုၚ်ဍုၚ်သဓီုတံဂှ်ရ။
အတိုၚ်တၚ်နၚ် ဂကောံလ္ၚတ်ပဋိပက္ခ ကေုာံ ကေၚ်ကာဗၟာ BACS ဂှ်မ္ဂး တန်ဗ္တောန်ကွတ်ပၞာန် နူလၟေၚ် ၁ စဵုကဵု လၟေၚ် ၅ ဂှ် ကောန်ဒပ်ဒးဒုၚ်ပကောံလဝ် ဟွံအောန်နူကဵု ၂၁၀၀၀ နွံတုဲ ညးမစှ်ေနူတန်ဗ္တောန်ကွတ်ပၞာန် သွက်ပိလၟေၚ် လၟိဟ် ၁၃၀၀၀ ဂှ် ပလံၚ်ဏာလဝ်မုက်ပၞာန်ရ။
ပရိုၚ်−သြၚ်လောန်တိုၚ်(မ်)
ဗီု−MOI