လံၚ်လုၚ်၊ ဒဳဇြေမ်ဗာ ၂၄
ဟိုတ်နူပေါဲဗ္တိုက်ကွာန်ကျံက်နဳမဝ် ပွိုၚ်ဍုၚ်လံၚ်လုၚ် ရးတၞၚ်သဳဂှ်တုဲ ညးဍုၚ်ကွာန်ဒေသ ဗ္ဒါဲလ္ၚီ နူကဵုကွာန်ပိကွာန်ဂှ် ထောံလသာသ္ၚိဌာန် ဒးဂြိပ်ဒဴပါဲဒလေတ်ဒၟံၚ်ရောၚ် ညးဒေသပါဲဒဴဘဲပၞာန်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပပ္တံနူဂိတုဒဳဇြေမ်ဗာ ၂၃ အခိၚ်နူဂယးဂှ်တုဲ ဒပ်ပံၚ်ကောံ ဂကောံဇြဟတ်ပၠန်ဂတးတံ နကဵုဇြဟတ်လၟိဟ်ဗွဲမဂၠိုၚ်ဂၠေၚ်ဂှ် လုပ်စိုပ်ဗ္တိုက်ဒၟံၚ် ဗ္ဒိုပ်ဒပ်ပံၚ်ကောံပၞာန်မၚ်ကွာန်တံကဵု ကံၚ်ဇြဳပၞာန် မဖျေံလဝ်ဗဒိုပ် ပ္ဍဲကွာန်ကျံက်နဳမဝ်ဂှ်ရ။
ဟိုတ်နူပရေင်ဗ္တိုက်ဂှ်တုဲ ပေါဲဗ္တိုက်ၜါလ္ပာ် က္တဵုဒှ်ဒၟံၚ် ကြပ်ကၠိုဟ်တ္ၚဲတုဲ ညးဍုၚ်ကွာန်ဒေသတံလေဝ် ထောံလသာဌာန်ဒၟံၚ် ဒးဂြိပ်ဒဴပါဲဒလေတ်ဒၟံၚ်ရ။
ဟိုတ်နူပေါဲဗ္တိုက်တုဲ ညးဍုၚ်ကွာန်ဒေသ ဗၞတ်လ္ၚီ နူကဵုကွာန်ကျံက်နဳမဝ်၊ အံက်ကျံက်ဝတ်၊ ကျံက်ဝတ်ပျေန်တံဂှ်ဝွံ ဒးဂြိပ်ဒဴပါဲဒလေတ်ဒၟံၚ် လ္ပာ်ကွာန်ဒၞါဲဗၠးဘဲတံ နကဵုဂၠုၚ်စက်၊ ကွဳလိုန်ဓာတ်၊ ကွဳစက်တံဂှ်ရောင် ညးဒေသပါဲဒဴဘဲပၞာန်မွဲတၠ ဟီုရ။
စပ်ကဵုပေါဲဗ္တိုက်ကျံက်နဳမဝ်ဂှ်တုဲ နူကဵုသြၚ်လောန်တိုၚ်(မ်) ဆက်စၠောံသၟာန်သၟုက်လဝ် ဒပ်ပၠန်ဂတးဖျေံသ္ဇိုၚ်ပွိုၚ်ဍုၚ်လံၚ်လုၚ်တံဂှ်ကီုလေဝ် ဒဵုကဵုအခိၚ်လၟုဟ် ဟွံဂွံကလေၚ်ပရိုၚ်ဏီရ။
ပ္ဍဲထလဳဂရာမ်ချာန်နေဝ် ရဲထံက်ဂလာန်ဒပ်ပၞာန်တံှဂ်တှ်ေ ဗ္ဒိုပ်ဒပ်ပၞာန် နွံပ္ဍဲကွာန်ကျံက်နဳမဝ်တံ ဒးဒုၚ်ဗ္တိုက်ဒၟံၚ် နကဵုဇြဟတ်လၟိဟ်ဗွဲမဂၠိုၚ်ဂၠေၚ်ဂှ်တုဲ အာတ်မိက်ဒၟံၚ် သွက်ဂွံကဵုပၞာန်ရီုတံ နွံဒၟံၚ်ရ။
အတိုၚ်ဂလာန်ညးဒေသတံဂှ်မ္ဂး ပ္ဍဲကွာန်ကျံက်နဳမဝ်ဂှ် ဗ္ဒိုပ်ဒပ်ကံၚ်ဇြဳပၞာန် ဖျေံလဝ်သ္ဇိုၚ်ဂှ် နွံပိတုဲ ဇြဟတ်ၜိုတ် ၈၀ နွံရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−Social Media