ဍာ်ဗု၊ ဒဳဇြေမ်ဗာ ၂၄
ရးတၞၚ်သဳ ပွိုၚ်ဍုၚ်ဍာ်ဗု ပ္ဍဲကွာန်ဇာဒဳဂှ် ပၞောဝ်ကဵုညးဒေသ ကရောၚ်ပၞာန်ကံၚ်ဇြဳပၞာန် မရပ်ဒက်လဝ်ဂမၠိုၚ် ဂွံကလေၚ်ဆဵုကေတ်လဝ် ဇွမၞိဟ်တြုံမွဲတၠ မဒးဒုၚ်ဂစိုတ်ဂယိုၚ်လဝ်ဂှ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဒပ်ကံၚ်ဇြဳပၞာန်ဝွံ စနူဂိတုဒဳဇြေမ်ဗာ ၂၀ တုဲကၠုၚ်တေံတုဲ ထ္ပက်ကရောၚ်ပၞာန် လုပ်စိုပ်ကၠုၚ် ပ္ဍဲကွာန်ဇာဒဳဂှ်တုဲ ညးဒေသၜိုတ်ဆဵုပ္ဍဲဂၠံၚ်တံဂှ် ရပ်ဒက်လဝ်ရ။
ပၞောဝ်ကဵုညးဒေသ ဒပ်ကံၚ်ဇြဳပၞာန် မရပ်ဒက်လဝ်ဂမၠိုၚ် ပ္ဍဲဂိတုဒဳဇြေမ်ဗာ ၂၃ ပယျာံနူဂယးဂှ် ဂွံကလေၚ်ဆဵုကေတ်လဝ် ဇွဥူအံၚ်ကျဳတုၚ် အာယုက် ၄၀ သၞာံ ဗ္ဒါဲသုသာန်ကွာန်ဂှ်ရ။
အခိၚ်ကလေၚ်ဆဵု ဇွဥူအံၚ်ကျဳတုၚ်ဂှ် ကလိဂွံလဝ်ဝပ် ၜုၚ်တက်ပျဲပျာံလဝ်တံ၊ ဝပ်ဒးလဝ်မကမ်တံဂှ်ရောၚ် ညးဒေသတံ ဟီုရ။
အတိုၚ်ဂလာန်ညးဒေသတံဂှ်မ္ဂး ပ္ဍဲကဵုမၞိဟ် ကရောၚ်ပၞာန်ကံၚ်ဇြဳပၞာန်တံ မရပ်ဒက်လဝ်တံဂှ် သီုကောန်ၚာ်တံမပါလုပ် မၞိဟ်တြုံ၊ မၞိဟ်ဗြဴ ဟွံအောန်နူကဵု ၁၅ တၠ နွံဒၟံၚ်တုဲ ဒဵုကဵုအခိၚ်လၟုဟ် ညးမွဲမှ ဟွံကလေၚ်ဗလးကၠုၚ်ဏီပုဟ်ဂှ် ဂွံတီကေတ်ရ။
ဒပ်ကံၚ်ဇြဳပၞာန် လုပ်စိုပ်ဖျေံလဝ်ဒပ် ပ္ဍဲကွာန်ဇာဒဳဂှ်ဝွံ တုဲကၠုၚ်ပ္ဍဲဂိတုဒဳဇြေမ်ဗာ ၂၀ ကဵု ၂၁ တုဲကၠုၚ်တေံဂှ်လေဝ် ကလိလောန် စံၚ်ပလီုပလာ်လဝ် သ္ၚိဒၟံၚ်အပ္ဍဲကွာန်တံဂှ်တုဲ အတိုၚ်ညးဒေသတံ ချိၚ်ခယျလဝ်ဂှ်မ္ဂး သ္ၚိဒၟံၚ်ဟွံအောန်နူကဵု ၁၅ မ ပၟတ်တူလီုလာ်အာလဝ်ရ။
ဒပ်ကံၚ်ဇြဳပၞာန်ဝွံ တုဲကၠုၚ် ပ္ဍဲဂိတုဒဳဇြေမ်ဗာ ၁၇ တေံ ကြဴနူကုန်ဗ္ဒိုပ်တိုၚ်တာဝါ ဒေသ(ကံပေါက်) ပွိုၚ်ဍုၚ်ဍာ်ဗု ဒးဒုၚ်ဗ္တိုက်သီတုဲဂှ် လုပ်စိုပ်ထ္ပက်ကၠုၚ်ကရောၚ်ပၞာန် ပ္ဍဲကွာန်ဒၞါဲကောန်ဒပ်စဵုဒၞါညးဍုၚ်ကွာန် PDF တံ နွံမာန်တံဂှ်ရ။
ဟိုတ်နူဒပ်ကံၚ်ဇြဳပၞာန် ထ္ပက်လဝ်ကရောၚ်ပၞာန်ဂှ်တုဲ ညးဒေသဂၠိုၚ်ကဵုလ္ၚီ နူကဵုပွိုၚ်ဍုၚ်ဍာ်ဗု ကွာန်(ခွေးမဖော၊ ပယ၊ ဇာဒီ၊ ခေါင်ပြန်၊ ဖားချောင်း) တံ ထောံလသာဌာန်ဒၟံၚ် ဒးဂြိပ်ဒဴပါဲဒလေတ်ဒၟံၚ်တုဲ ဒဵုကဵုအခိၚ်လၟုဟ် စဴဌာန်ဒၟံၚ်ဟွံမာန်ဏီရ။
ပရိုၚ်−သြၚ်လောန်တိုၚ်(မ်)
ဗီု−CJ