မတ်မလီု၊ ဒဳဇြေမ်ဗာ ၂၆
AA သီဂွံလဝ် ဌာန်ဂအုပ်ပၞာန်ရးပလိုတ်တုဲ သွက်ပေါဲအံၚ်ဇၞး အလုံဍုၚ်ရခေၚ်မွဲ မညောန်ကြပ်ကဵုပရေၚ်ဗၠးၜး နူသၟဝ်တဲသၞောတ်တၠအဝဵုပၞာန် ကိုပ်ကၠာအိုတ်ဂှ် ဂကောံပၠန်ဂတး မန် ကေုာံ ပအိုဝ်တံ ပလံၚ်ဗစိုပ်လဝ်လိက်သဝဏ် ပ္ဍဲဂိတုဒဳဇြေမ်ဗာ ၂၅ တေံရ။
လိက်သဝဏ်ဏံဂှ် ဗော်ဍုၚ်မန်တၟိ ဗ္တိုက်သရိုဟ်တၠအဝဵုပၞာန် NMSP AD ၊ ကံၚ်ဇြဳဖေဝ်ဒရာဍုၚ်မန် MSFC ၊ ဂအုပ်ဂကောံဗၠးၜးကောန်ဂကူပအိုဝ် PNLO ကေုာံ ကံၚ်ဇြဳဖေဝ်ဒရာကောန်ဂကူပအိုဝ် PNFC တံ ပံၚ်တောဲလလောၚ်တြးလဝ်ရ။
ဟိုတ်ဒၟါနူပရေၚ်အာက္ဍိုပ် သၟဝ်ဂအုပ်ဂကောံကောန်ဂကူရခေၚ် ULA၊ ဟိုတ်နူ AA လုပ်ကၠုၚ်ပေါဲဗ္တိုက် ဗွဲမသ္ကေက်သ္ကာတံဂှ်တုဲ ပ္ဍဲဂိတုဒဳဇြေမ်ဗာ ၂၀ ဂှ် သီဂွံလဝ် ဌာန်ဂအုပ်ပၞာန်ရးပလိုတ် (နပခ) ဖျေံသ္ဇိုၚ်ဍုၚ်အာမ် နွံတွဵုရးရခေၚ်ဂှ်ရ။
အခိၚ်ကာလဟွံသ္ၚောဲဏံ ညံၚ်ဒပ်ကံၚ်ဇြဳပၞာန် နွံဒၟံၚ်အလုံဍုၚ်ရခေၚ် ဂွံအိုတ်အးအာဂှ် စပ်ကဵုအစောံသတ္တိ AA ကေုာံ မဆက်လုပ်အာပေါဲဗ္တိုက်တံဂှ်တုဲ ပ္တိုန်ဏာစရာဲ ကရောံလိက်သဝဏ်ဏံဂှ် ဂကောံပၠန်ဂတးမန် ကေုာံ ပအိုဝ်တံ သ္ဂးရ။
နာဲဂံၚ်သကာ ညးမၞုံအခေါၚ်ဟီုဂး ဗော်ဍုၚ်မန်တၟိ ဗ္တိုက်သရိုဟ်တၠအဝဵုပၞာန် NMSP AD ဂှ် ပေါဲအံၚ်ဇၞးဍုၚ်ရခေၚ်ဂှ်ဝွံ သွက်ညးမပၠန်ဂတးဒၟံၚ် သၞောတ်တၠအဝဵုပၞာန်တံဂှ် ဒှ်တဴဒြဟတ်မွဲရောၚ် ဟီုရ။
“ ရံၚ်ကဵုဗ္ၜတ်အလုံဍုၚ်မွဲမ္ဂး ဍုၚ်ရခေၚ် ဂွံဒှ်တိဍာ်ကံၚ်ဇြဳပၞာန်အိုတ်အးကၠာအိုတ်ဂှ် တၟံကၠံဂၠိုၚ်အိုတ်ရဏောၚ်ဂှ် ဒးဟီုရ။ တုဲပၠန် ပရေၚ်ဗၠးၜးဍုၚ်ရခေၚ်သၟးဟွံက ဂကူဗၟာမၞုံအလုံဍုၚ်မွဲတံကီု ကောန်ဂကူကောန်ဍုၚ်အရၚ်ဘဝတုပ်တံကီု သွက်ပရေၚ်ဗၠးၜးညးတံဂှ်လေဝ် စပ်ကဵုစွံလဝ်တၚ်ရန်တၟံ ပရေၚ်ပၞာန်၊ ပရေၚ်ဍုၚ်ကွာန်ဂှ်တုဲ နတဲဏံ ကဵုဇြဟတ်ရီုဗၚ်ပံၚ်တောဲပၠန်ဂတးဒၟံၚ်ဂှ်လေဝ် ဂွံဆဵုကေတ်တုဲ ပိုယ်တံ ကေတ်ဂုဏ်စရာဲကွေံကွေံရ” သာ်ဝွံ သ္ဂးရ။
နကဵုဒပ်ပၞာန်ရခေၚ် AA အပ္ဍဲဂိတုဒဳဇြေမ်ဗာဏံဂှ် သီဂွံလဝ်ပိဍုၚ်တုဲ ဂွံဂွံသီဂွံဍုၚ်ဂွဂှ်လေဝ် ဟွံသ္ၚောဲရဂှ်တုဲ ပ္ဍဲတွဵုရးရခေၚ်ဂှ် သွက်ဂွံဆက်သီအာ ဍုၚ်သေတ်တိုဲ၊ ဍုၚ်ကျံက်ဖျူ ကေုာံ ဍုၚ်မာန်အံၚ်တံရ သှ်ေဒၟံၚ်ရ။
ဟွံဒေါအ်ဒဝ်ဏံ ဆၜိုတ်ပရေၚ်ဗၠးၜးဍုၚ်ရခေၚ်မွဲဓဝ်တုဲ သွက်ပရေၚ်ဗၠးၜးအလုံညးဍုၚ်ကွာန်မွဲ နကဵုလညာတ်မသၠဲလး ULA/AA ပံၚ်တောဲရေၚ်တၠုၚ်ဒၟံၚ်ဂှ် ကေတ်တဴဂုဏ်စရာဲဗွဲတၟေၚ်ရောၚ် ထ္မံက်ထ္ၜးလဝ် ပ္ဍဲလိက်သဝဏ်ဂှ်ရ။
နကဵုမန် ကေုာံ ပအိုဝ်တံဝွံလေဝ် ပေါဲအံၚ်ဇၞးလၟုဟ်ဝွံ ဒှ်ပေါဲအံၚ်ဇၞးညးဍုၚ်ကွာန်ရခေၚ်တံတုဲ သီုဒှ်ပေါဲအံၚ်ဇၞး အလုံညးဍုၚ်ကွာန်မွဲဂှ်တုဲ နကဵုလစွံစိုတ် သီုညးဖအိုတ်ဗၠးၜးမှ ကလိဂွံပရေၚ်ဗၠးၜးမဍာံဇေတ်တံဏောၚ်ဂှ် သွက်ပရေၚ်ဗၠးၜးညးညးအဲအဲ သွက်သီုညးဖအိုတ်ဂှ် ပံၚ်တောဲလုပ်ဒၟံၚ်ပေါဲဗ္တိုက်ရောၚ် သ္ဂးရ။
နာဲမန်သာၚ် ညးမၞုံအခေါၚ်ဟီုဂး ကံၚ်ဇြဳဖေဝ်ဒရာဍုၚ်မန် MSFC ဂှ်တှ်ေ ညံၚ်ရဴရခေၚ်တံဂှ် ဇြဟတ်ဟွံခိုဟ်ကီုလေဝ် ၜိုတ်သ္ပမာန် ပကောံပ္ကေဝ်တုဲ ပ္တိတ်ဒၟံၚ်ဇြဟတ် သွက်ပၠန်ဂတးဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ပိုယ်တံ သီုမန် သီုပအိုဝ်ဂှ် ညံၚ်ရခေၚ် ညံၚ်ကချေၚ်တံ ညံၚ်ကောန်ဍုၚ်အရၚ်တၞဟ်သ္အာၚ်တံဂှ် ဇြဟတ်ဟွံခိုဟ်ကီုလေဝ် ၜိုတ်ပိုယ်သ္ပမာန် ပကောံပကေဝ်နကဵုဇြဟတ်ၜိုတ်နွံဂှ်တုဲ သီုညးဖအိုတ်ဂွံပါလုပ် ပ္ဍဲပၠန်ဂတးဏံ ဒဵုကဵုဗ္ၜတ်မွဲမွဲ ဂွံပါလုပ်မာန်ဂှ်လေဝ် လ္ပာ်ပိုယ်တံ ပ္တိတ်ဒၟံၚ်ဇြဟတ်ရေၚ်တၠုၚ်ဒၟံၚ် နွံရ” သာ်ဝွံ သ္ဂးရ။
ပြဟ်ဟ်ဏံ ကံၚ်ဇြဳဖေဝ်ဒရာဍုၚ်မန် MSFC ကေုာံ ကံင်ဇြဳဖေဝ်ဒရာကောန်ဂကူပအိုဝ် PNFC တံဝွံ နကဵုပရေၚ်ဍုၚ်ကွာန်ဂှ် ဒှ်ဂကောံပၠန်ဂတးကောန်ဍုၚ်အရၚ် ပါလုပ်ဒၟံၚ် ပ္ဍဲကံၚ်ဇြဳကဵုကသပ်ကောန်ဂကူ NUCC မဒှ်ရ။
မွဲလ္ပာ်ဂှ်ပၠန် ကဵုဂကောံရပ်လွဟ်ကောန်ဍုၚ်အရၚ် ပါလုပ်ဒၟံၚ်ပ္ဍဲပၠန်ဂတးတံဂှ်လေဝ် ပ္ဍဲပရေၚ်သဳကၠဳ ပရေၚ်ဍုၚ်ကွာန် သွက် Bottom up Federalism နူတွဵုရး မအာကၟိန်ဍုၚ်ပံၚ်ကောံဂှ်လေဝ် ပါလုပ်ဒၟံၚ်တုပ်ပ်ရောၚ် နာဲမန်သာၚ် သောၚ်ထ္ၜးလဝ်ရ။
ပ္ဍဲလၟေၚ်ကမၠောန် ဒက်ပ္တန်ကၟိန်ဍုၚ်ပံၚ်ကောံဖေဝ်ဒရာဒဳမဝ်ကရေဇြဳ ကေုာံ ဂွံဖအိုတ်ကၠေံ သၞောတ်တၠအဝဵုပၞာန် အလုံညးဍုၚ်ကွာန်မွဲ မနွံပၟိက်ဂှ် ပံၚ်တောဲလုပ်အာပေါဲဗ္တိုက် ကုဂကောံမဟာမိတ်ကောဒေံပိဂကောံ ကေုာံ သီုဂကောံဇြဟတ်ပၠန်ဂတးကောဒေံဘဝတုပ်တံ ဗွဲမဗိုန်ခိုၚ်ဏောၚ်ဂှ် ဂကောံပၠန်ဂတးမန် ကေုာံ ပအိုဝ်တံ ကဵုလဝ်သမ္တီရ။
ပရိုၚ်−သြၚ်လောန်တိုၚ်(မ်)
ဗီု−AA