မုၚ်ယဲ၊ ဒဳဇြေမ်ဗာ ၂၆
ရးသက်ကိုၚ် ပွိုၚ်ဍုၚ်မုၚ်ယဲ ပ္ဍဲကဵုဗ္ဒိုပ်ဗၠာဲသၟိၚ်ၝောံဍုၚ်မုၚ်ယဲဂှ် ကောန်ထံၚ်ပရေၚ်ဍုၚ်ကွာန် မဒှ် LGBT မွဲတၠဂှ် ဟိုတ်နူဟွံဂွံအခေါၚ်လွဳယဲတုဲ ချိုတ်အာလဝ်ရောၚ် ဂွံတီကေတ် ဇရေၚ်ဇာဇၞိက်ကောန်ထံၚ်ရေၚ်ဍုၚ်ကွာန်အလုံဍုၚ်ဗၟာ PPNM ရ။
ကောန်ထံၚ်ပရေၚ်ဍုၚ်ကွာန် မဒုၚ်ဂိုၚ်ကေတ်လဝ် LGBT မၞုံယၟု (ဘုံဘုံ) ဂှ်ဝွံ ဒးဒုၚ်စသိုၚ်လဝ်ယဲကောန်တၟအ်၊ ယဲလတေၚ်ဇက်တံ တၟာဂလိုၚ်တုဲ ပ္ဍဲဂိတုဒဳဇြေမ်ဗာ ၂၅ ဂှ် ဒးချိုတ်အာလဝ်ရ။
အကာဲအရာပရေၚ်ထတ်ယုက် ကောန်ထံၚ်ပရေၚ်ဍုၚ်ကွာန် (ဘုံဘုံ) ဂှ်ဝွံ ပပ္တံနူဂိတုနဝ်ဝေမ်ဗာ သတ္တာဟဒုတိယဂှ်တုဲ ယဲကောန်တၟအ်ဂှ် ပရေံကၠုၚ်တုဲ ဂွံဂွံလွဳယဲဂှ် ကဵုလဝ်သမ္တီ ကုညးတာလျိုၚ် ဗ္ဒိုပ်ဗၠာဲသၟိၚ်ၝောံဍုၚ်တံဂှ်ရောၚ် သ္ဂးရ။
ဆ္ဂး ညးတာလျိုၚ်ဗ္ဒိုပ်ဗၠာဲသၟိၚ်ၝောံဍုၚ်တံဂှ်ဝွံ ဟွံပလံၚ်ကဵုကောန်ထံၚ်ပရေၚ်ဍုၚ်ကွာန် (ဘုံဘုံ)ဂှ် ရုၚ်ဂဥုဲမွဲသာ် ကဵုလွဳလဝ် ပ္ဍဲကဵုဗ္ဒမ်အချုက်ဂှ်ယာယဳတုဲ ရပ်ချုက်လဝ်ရ။
ကြဴနူဂှ်တုဲ (ဘုံဘုံ)ဝွံ စနူဂိတုဒဳဇြေမ်ဗာ သတ္တာဟဒုတိယဂှ်တုဲ ဂၠံၚ်လေဝ်ကွာ်ဟွံဂွံခိုဟ်ဟ် စၞစမ္ၚိုဟ်ဟ်တံဂှ်လေဝ် စသုၚ်ဟွံဂွံတုဲ ဒးထောံအာလဝ်ရောၚ် ကိုဝ်တိုက်ထောန်ဥူ ကောန်ကမ္မတဳက္ဍိုက်ပ် PPNM ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲကဵုဗ္ဒိုပ်ဗၠာဲသၟိၚ်ၝောံဍုၚ်မုၚ်ယဲဂှ် ကောန်ထံၚ်ပရေၚ်ဍုၚ်ကွာန် သီုမၞိဟ်တြုံ၊ သီုမၞိဟ်ဗြဴဂှ် နွံဒၟံၚ်ဗ္ဒါဲ ၃၀၀ တုဲ ပ္ဍဲကဵုထံၚ်ဏံဂှ် ကောန်ထံၚ်ဂမၠိုၚ် ပါဲနူဟွံဂွံစစၞအာဟာရ ရုမ်မ်ဂပ်ပ်ဂှ် ဒၞါဲမံၚ်ဂှ်လေဝ် ဒးမံၚ်ၜေတ်ကြေပ်ဒၟံၚ်တုဲ ညးဒှ်ကၠုၚ်ဝေဒနာ ကာယဘုံသၟဝ်ဍိုန်စှ်ေတံ ဂၠိုၚ်ကၠုၚ်ဂှ် သ္ဂးရ။
ဘုံဘုံ မဒုၚ်ဂိုၚ်လဝ် နဒဒှ် LGBT ဂှ်ဝွံ တုဲကၠုၚ်ပ္ဍဲဂိတုဖေဖဝ်ဝါရဳ ၂၄ သၞာံ ၂၀၂၄ ဏံဂှ် ကြဴနူဒးဒုၚ်ရပ်လဝ် ဗ္ဒါဲအိုဝ်ယှေန်သေန်တာ နွံအရာပ်အံၚ်ဇေယျ ဍုၚ်မုၚ်ယဲဂှ်တုဲ နကဵုၝောံပိုဒ်ပကီုပရာပ်ဂှ် ပ္ဍဲဂိတုဒဳဇြေမ်ဗာ ၂၃ ဂှ် ဒးဒုၚ်ဖျေံလဝ်ဒဏ်ထံၚ် ၁၀ သၞာံရ။
အလုံဍုၚ်မွဲ ပ္ဍဲကဵုထံၚ်စာတ်တံဂှ် အပ္ဍဲသၞာံဏံ ဟိုတ်ဒၟါနူဟွံဂွံပရေၚ်မၚ်မွဲရံၚ်စံၚ် ပရေၚ်ထတ်ယုက် ရုမ်မ်ဂပ်ပ်ဂှ်တုဲ ကောန်ထံၚ်ပရေၚ်ဍုၚ်ကွာန် သီုတြုံတြုံ၊ သီုဗြဴဗြဴဂှ် ဟွံအောန်နူကဵု ၂၀ တၠ ချိုတ်အာလဝ်ရောၚ် PPNM လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−CJ