မတ်မလီု၊ ဒဳဇြေမ်ဗာ ၂၆
တွဵုရးဍုၚ်မန် ပ္ဍဲပွိုၚ်ဍုၚ် ၁၀ ဍုၚ်ဂှ် လ္ပာ်ကံၚ်ဇြဳပၞာန် ပတေၚ်ဂြတ်ကၠုၚ်ပရေၚ်ဂီုကၠီုတုဲ ကၟာတ်လဒဵုတုဲရပ်ဒက်ကၠုၚ်တံ ကၠောန်ဒၟံၚ်အဆက်က်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဒပ်ကံၚ်ဇြဳပၞာန်ဝွံ စနူဂိတုဒဳဇြေမ်ဗာ သတ္တာဟတတိယဏံတုဲ မ္ၚးနူကဵုကျာ်ထဝ်၊ ၜဳကလေၚ်၊ သဓီု၊ ရေဝ်၊ ဇြပ်ဗု၊ ကျာ်မြဟ် ဒၞါဲဒးဂွိၚ်ကဵုပရေၚ်ဂီုကၠီုတံဂှ် ပ္ဍဲပွိုၚ်ဍုၚ်ပံၚ်၊ မုဟ်ဍုၚ်၊ မတ်မလီု ကေုာံ ပ္ဍဲပွိုၚ်ဍုၚ်ၜါသွာၚ်တံဂှ်လေဝ် သၠုၚ်ပ္တိုန်လဝ်ပရေၚ်ဂီုကၠီုရ။
ဗွဲတၟေၚ် တိဍာ်ဒပ်ပၠန်ဂတးတံ ချဳဒရာၚ်ဇြဟတ်ခိုဟ် ပ္ဍဲကဵုပွိုၚ်ဍုၚ်ကျာ်ထဝ်၊ ပွိုၚ်ဍုၚ်ၜဳကလေၚ်၊ ပွိုၚ်ဍုၚ်သဓီု ကေုာံ ပ္ဍဲပွိုၚ်ဍုၚ်ရေဝ်တံဂှ် သၠုၚ်ပ္တိုန်လဝ်ဇြဟတ်ဗွဲမဂၠိုၚ်ဂၠေၚ်တုဲ ဒၞါဲလုပ်တိတ်ဍုၚ်တံဂှ်လေဝ် ကၟာတ်လဒဵုစၟဳတ်ဒၟံၚ်တံ သာကၠောန်သ္ပကၠုၚ်ရ။
သ္အာၚ်နူဂှ်ပၠန် မ္ၚးနူကဵုသၞေဟ်ကၚ်စၟဳတ်တံဂှ် ပ္ဍဲဗ္ဒိုပ်ဒပ် တမ်ဒပ်တံဂှ်လေဝ် ထပ်သိုၚ်ခၞံလဝ် ဗာန်ကာပရေၚ်ဂီုကၠီုတံ ဗွဲမခိုၚ်ကၠိုက်ရောၚ် ညးဒေသတံ ဟီုရ။
အတိုၚ်ဂလာန်ညးဒေသတံဂှ်မ္ဂး ကောန်ဒပ်ကံၚ်ဇြဳပၞာန် မသၠုၚ်ပ္တိုန်လဝ် ပရေၚ်ဂီုကၠီုတံဂှ်ဝွံ ကြဴနူကၟာတ်လဒဵုစၟဳတ် ပ္ဍဲဒၞါဲလုပ်တိတ်ဍုၚ်တံတုဲဂှ် ထ္ၜးဟိုတ်နာနာသာ်တုဲ ရပ်ဒက်အာတ်မိက်ဒၟံၚ်သြန် ဇရေၚ်ညးဍုၚ်ကွာန်ဒေသတံ နွံဒၟံၚ်ရောၚ် ဂွံတီကေတ်ရ။
မွဲလ္ပာ်ဂှ်ပၠန် အခိၚ်ဗ္တံတံဂှ်လေဝ် နကဵုတၚ်စောဲစပ်ဝးပ္ကဝ် အမိၚ်ဒေသန္တရဂှ် ကံၚ်ဇြဳပၞာန် ရပ်ဒက်ညးသၟတ်တံတုဲ ပကောံဒၟံၚ်ကောန်ပၞာန်တံဂှ် ကၠောန်သ္ပဒၟံၚ်ရ။
ကံၚ်ဇြဳပၞာန် သၠုၚ်ပ္တိုန်ပရေၚ်ဂီုကၠီုဂှ်ဝွံ ဟိုတ်နူပရိုင် သၞာံတၟိမံက်ဏံ ဒပ်ပၠန်ဂတးတံ ဝေၚ်ကၠုၚ်ပေါဲဗ္တိုက်သီဗ္ဒိုပ်တံ ဒှ်မာန်ဂှ် သ္ၚဳဂၠိပ်ဟီုဂးဒၟံၚ်တံ နွံဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီု−MOI