မတ်မလီု၊ ဒဳဇြေမ်ဗာ ၃၁
ပ္ဍဲကဵုထံၚ်စာတ်အလုံဍုၚ်မွဲဂှ် ဟိုတ်နူကံၚ်ဇြဳပၞာန် ဂစိုတ်ဂယိုၚ်ကၠုၚ်ဒၟံၚ် ဟွံမွဲကဵုသၞောဝ်၊ ဟိုတ်နူဟွံဂွံပရေၚ်လွဳလွတ်ဂဥုဲ ဗွဲမရုမ်ဂပ်ဂှ်တုဲ ကောန်ထံၚ်ပရေၚ်ဍုၚ်ကွာန် သီုတြုံတြုံ၊ သီုဗြဴဗြဴဂှ် အပံၚ်ဖအိုတ် ၃၁ တၠ ချိုတ်အာလဝ်ရောၚ် ဂွံတီကေတ် ဇရေၚ်ဇာဇၞိက်ကောန်ထံၚ်ပရေၚ်ဍုၚ်ကွာန် အလုံဍုၚ်မွဲ PPNM ရ။
နူသၞာံ ၂၀၂၄ ဂိတုဂျာန္နဝါရဳ ၁ စဵုကဵုဂိတုဒဳဇြေမ်ဗာ ၃၁ အပ္ဍဲပွိုၚ်မွဲသၞာံဂှ် ဟိုတ်နူဒပ်ကံၚ်ဇြဳပၞာန်သီအဝဵုတံ၊ သ္ဇိုၚ်ဝန်ထံၚ်တံ ဖံက်ပ္ကဝ်အခေါၚ်အရာမၞိဟ် အပ္ဍဲထံၚ်တံဂှ်တုဲ ကောန်ထံၚ်ဂမၠိုၚ် ဒးချိုတ်အာလဝ်ရ။
အတိုၚ်တၚ်လလောၚ်တြး PPNM ဂှ်မ္ဂး ပ္ဍဲကဵုထံၚ်စာတ်တံဂှ် ဒၟါနူဟွံဂွံပရေၚ်မၚ်မွဲရံၚ်စံၚ်ဂဥုဲဇဗတံ ဗွဲမရုမ်ဂပ်တုဲ ညးဗြဴကောန်ထံၚ်ပရေၚ်ဍုၚ်ကွာန် ၃ တၠ၊ ကောန်ထံၚ်ပရေၚ်ဍုၚ်ကွာန် တြုံတြုံ ၁၈ တၠ ကေုာံ ကောန်ထံၚ်ပရေၚ်ဍုၚ်ကွာန် LGBT မွဲတၠ၊ အပံၚ်ဖအိုတ် ၂၂ တၠ ချိုတ်အာလဝ်ရောၚ် ထ္မံက်ထ္ၜးလဝ်ရ။
ကြဴနူဒးဒုၚ်ရပ် ဟွံဗဗွဲကဵုသၞောဝ်တုဲဂှ် အပ္ဍဲထံၚ်ကီု၊ မ္ၚးထံၚ်ကီုဂှ် ဒးဒုၚ်ပြိုက်ဂစိုတ်ဒၟံၚ်တုဲ ကောန်ထံၚ်ပရေၚ်ဍုၚ်ကွာန် တြုံတြုံ ၈ တၠ၊ ဗြဴဗြဴ ၁ တၠ ချိုတ်အာလဝ်ရ။
မွဲလ္ပာ်ဂှ်ပၠန် နူကဵုကောန်ထံၚ်ရာဇဝတ် မဒှ်လေံဒုက်သ္ဇိုၚ်ဝန်ထံၚ်တံ ဟိုတ်နူၜုၚ်တက်ပျဲပျာံကၠုၚ် ဟွံမွဲကဵုသၞောဝ်ဂှ်တုဲ ကောန်ထံၚ်ပရေၚ်ဍုၚ်ကွာန် သီုတြုံတြုံ၊ သီုဗြဴဗြဴ ဗွဲတွဵုမအောန် ၁၄၈ တၠ ဒးဒုၚ်ၜုၚ်တက်လဝ်ရ။
သ္အာၚ်နူဂှ်ပၠန် ပ္ဍဲထံၚ်စာတ်တံဂှ် ဟိုတ်နူအာတ်မိက်အခေါၚ်အရာကောန်ထံၚ်တံတုဲ ကောန်ထံၚ်ပရေၚ်ဍုၚ်ကွာန် ဒးဒုၚ်ဆုဲပြံၚ်ထံၚ်တံဂှ် ၃၀၅၄ တၠ နွံလဝ်ရောၚ် PPNM သ္ဂးရ။
အတိုၚ်တၚ်နၚ် ဂကောံမၚ်မွဲရီုဗၚ်ကောန်ထံၚ်ပရေၚ်ဍုၚ်ကွာန် AAPP ဂှ်မ္ဂး အပ္ဍဲကာလသီအဝဵုပွိုၚ်ပန်သၞာံပြၚ်ဏံ အလုံဍုၚ်မွဲ ညးဒးဒုၚ်ရပ်လဝ် နွံကၠုၚ် စဵုကဵု ၂၈၀၀၀ ပြၚ်တုဲ ပ္ဍဲကဵုဏံ ၂၀၀၀၀ ပြၚ် ဆက်ဒးဒုၚ်ရပ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု− Social Media