မတ်မလီု၊ ဂျာန္နဝါရဳ ၁
ပ္ဍဲတွဵုရးဍုၚ်မန် ယာန်လာၚ်ဇြေန်ဟွံမွဲတံဂှ် ဂကောံပံၚ်ကောံကံၚ်ဇြဳပၞာန်တံ ရပ်ဒက်ကၠုၚ် နကဵုကိုန်စဳမာန်မွဲတုဲ ဘပဠအာတ်ဒၟံၚ်သြန်တံသၟးဟွံက သီုပံက်ကၠုၚ်ဂဗုတ်ကေတ်ကၠုၚ်အရေဝ် ကုမၞိဟ်တံ နွံဒၟံၚ်ဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဂကောံပံၚ်ကောံကံၚ်ဇြဳပၞာန်တံဝွံ ပပ္တံနူဂိတုဒဳဇြေမ်ဗာ သတ္တာဟတတိယဂှ်တုဲ ပ္ဍဲကဵုပွိုၚ်ဍုၚ်ညးတံ မထိၚ်ဒက်လဝ်တံဂှ် ရပ်ကၠုၚ်ဒၟံၚ်ယာန်ဟွံမွဲကဵုလာၚ်ဇြေန်တံ နကဵုကိုန်အစဳဇန်ရ။
ဒၞါဲရပ်ဂှ်တှ်ေ မ္ၚးနူကဵုကွဳစက်လာၚ်ဇြေန်ဟွံမွဲဂှ် ရပ်ဒၟံၚ်သီုကဵုကွဳလိုန်ဓာတ်ဟၟဲကဵုလာၚ်ဇြေန်တံဂှ်တုဲ အာတ်ကၠုၚ်ဒၟံၚ်သြန် ဂၠိုၚ်ကဵုစှော်ကိုဋ်တုဲ ကလေၚ်ဗလးကဵုလဝ်နွံတုဲ ပ္ဍဲလၟေၚ်ဒဒှ်လ္ၚဵုတံဂှ်တှ်ေ ရပ်ကၠုၚ်သီုကဵုမၞိဟ်တံ နွံဂှ် ညးဒေသတံ ဟီုရ။
ညးဒေသရေဝ် ဟွံမိက်ထ္မံက်ယၟုမွဲတၠဂှ်တှ်ေ ပ္ဍဲအရာရပ်ဒက်ယာန်ကွဳစက် ဟွံမွဲကဵုလာၚ်ဇြေန်တံဂှ် တန်တဴကဵုဂကူကွဳလိုန်ဓာတ်တုဲ ဗွဲတွဵုမအောန် နူ ၅ ကိုဋ်ဒ္ကေဝ် စဵုကဵု ၃၀ ကိုဋ်ဒ္ကေဝ် အာတ်မိက်ဒၟံၚ်တံ နွံဒၟံၚ်ရောၚ် ဟီုရ။
“ကွဳလိုန်ဓာတ်ဂှ်တှ်ေ အဏံဍေံတံရပ်ဒၟံၚ် ကဵုကိုန်စဳဇန်။ ကိုန်စဳဇန်ဟီုဂှ် ရပ်ဒၟံၚ်ကဵုဂကောံစုၚ်လေဝ် နွံ။ တန်တဴကဵုလ္တူကွဳလိုန်ဓာတ်တုဲ ဒးကဵုဒၟံၚ် နူ ၅ ကိုဋ် စဵုကဵု ၃၀ ကိုဋ်။ ကွဳလိုန်ဓာတ်တဲခိုဟ်တှ်ေ ဗီုခိုဟ်ဂှ် ဒးကဵု။ အခိၚ်လၟုဟ် ကိစ္စယိုက်လျိုၚ်ပၞာန်တံဂှ်လေဝ် ဍေံတံဒးကေတ်ဒၟံၚ်မၞိဟ်သေၚ်ဟာ။ အရာဏံဂှ်လေဝ် ဍေံတံရပ်ကၠုၚ်ဒၟံၚ်နွံဏောၚ်။ လ္ၚဵုတံဂှ်တှ်ေ ကော်ကေတ်လဝ် သီုကွဳ သီုမၞိဟ်ဂှ်နွံ” သာ်ဝွံ သ္ဂးရ။
ဂကောံပံၚ်ကောံကံၚ်ဇြဳပၞာန်တံဝွံ ထ္ၜးဟိုတ်နာနာသာ်တုဲ ရပ်ဒက်ဒၟံၚ် ယာန်ကွဳစက်ညးဒေသ မဟၟဲကဵုလာၚ်ဇြေန်တံနွံကီုလေဝ် ရဲမစုက်ကဵုညးတံ ယဝ်ဍိုက်ကၠုၚ်ယာန် လာၚ်ဇြေန်ဟွံမွဲတံဂှ်မ္ဂး ရပ်ဒက်ကၠုၚ်ဟွံမွဲပုဟ်ဂှ် ညးဆက်ဟီုရ။
ညးဒေသသဓီု ဟွံမိက်ထ္မံက်ယၟုမွဲတၠဂှ်လေဝ် ပါဲနူကဵုကွဳစက်၊ ကွဳလိုန်ဓာတ် လာၚ်ဇြေန်ဟွံမွဲတံဂှ် သီုကဵုသၠာပိတံဂှ် ပ္ဍဲကဵုဒၞါဲလုပ်တိတ်ဍုၚ် ပ္ဍဲသၞေဟ်ကၚ်စၟဳတ်ကံၚ်ဇြဳပၞာန်တံဂှ် မၚ်ရပ်ဒၟံၚ်တံ နွံဒၟံၚ်ရောၚ် ဟီုရ။
“ ရပ်ဂှ်ရပ်ဒၟံၚ်ရ။ ရပ်ဒၟံၚ်ကွဳစက်လာၚ်ဇြေန်ဟွံမွဲတံ၊ ရပ်ဒၟံၚ်ကွဳလိုန်ဓာတ်တံ။ ရပ်ဒၟံၚ်ကွဳလှာပိတံ ပ္ဍဲကဵုသၞေဟ်ကၚ်တံဂှ်ရ။ ကွဳလှာပိတံဂှ်တှ်ေ တိုန်လ္တူဂၠံၚ်ဇၞော်တှ်ေ ရပ်ဏောၚ်။ ဒှ်ဒၟံၚ်သာ်ဏံတုဲ ဍေံတံဂှ်တှ်ေ ဗီုဒးစိုတ်ဂှ် လုပ်ရပ်ဒၟံၚ်ရ” သာ်ဝွံ သ္ဂးရ။
ယာန်ကွဳစက် လာၚ်ဇြေန်ဟွံမွဲ အပ္ဍဲကဵုတွဵုရး ဗွဲမဂၠိုၚ်ဂှ်ဝွံ နူကဵုပယျဵုတံဂှ်မွဲကဆံၚ် ကဵုလှုဲကုသၞေဟ်ကၚ်စၟဳတ်ကံၚ်ဇြဳပၞာန်တံဂှ်တုဲမှ လုပ်စိုပ်ကၠုၚ်လဝ်ရ။
အပ္ဍဲကာလပၞာန်သီအဝဵုဏံ စနူကဵုဇၞော်သ္ကိုပ်ဒပ်ဗၠာဲသၟိၚ်တံကဵု ဒပ်ကံၚ်ဇြဳပၞာန်တံဂှ် က္ဍိုက်ပ်ပၠောပ်ပ္တိုန်နၚ် ယာန်ကွဳစက်လာၚ်ဇြေန်ဟွံမွဲတံ နွံဒၟံၚ်ရောၚ် ဂွံတီကေတ် အတိုၚ်ဂလာန်သၞာဲဒဴကံၚ်ဇြဳပၞာန် ဟွံမိက်ထ္မံက်ယၟုတံဂှ်ရ။
ပရိုၚ်−သြၚ်လောန်တိုၚ်(မ်)
ဗီု−CJ