ပ္ဍဲလံၚ်လုၚ် ကံၚ်ဇြဳပၞာန် ကၟာတ်လဒဵု အခေါၚ်ဖ္ဍိုက်ဗၞိက်စၞစသုၚ် ကေုာံ ကၠေၚ်စက်

လံၚ်လုၚ်၊ ဂျာန္နဝါရဳ ၂

ပ္ဍဲပွိုၚ်ဍုၚ်လံၚ်လုၚ် ရးတၞၚ်သဳ ပရေၚ်ပၞာန်ၜါလ္ပာ် မသ္ကာတ်မြဟ်ဒၟံၚ်ဂှ် ကံၚ်ဇြဳပၞာန် ကၟာတ်လဒဵုလဝ် အခေါၚ်ဖ္ဍိုက်ဏာနၚ်ဗၞိက်စၞစသုၚ်တံကဵု ကၠေၚ်စက်တံဂှ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ပ္ဍဲကွာန်ကျံက်နဳမဝ် ပွိုၚ်ဍုၚ်လံၚ်လုၚ်ဂှ် ပန်တ္ၚဲအဆက်က် ပေါဲဗ္တိုက်က္တဵုဒှ်တုဲဂှ် သၞေဟ်ကၚ်စၟဳတ် ဒဒန်ကမျောကေန် ဍုၚ်ထဝါဲဂှ် စနူဂိတုဒဳဇြေမ်ဗာ ၂၈ ဂှ်တုဲ ကၟာတ်လဒဵုလဝ် အခေါၚ်ဖ္ဍိုက်ဏာနၚ် ဗၞိက်စၞစသုၚ် ကေုာံ ကၠေၚ်စက် အပ္ဍဲပွိုၚ်ဍုၚ်လံၚ်လုၚ်ဂှ်ရ။

အတိုၚ်ဂလာန်ညးဒေသ ဍုၚ်လံၚ်လုၚ်ဂှ်မ္ဂး ကၠာတေံ ကဵုလှုဲတုဲဖ္ဍိုက်ဂွံဒၟံၚ်ကီုလေဝ် အခိၚ်လၟုဟ်ဂှ် ဗၞိက်စၞစသ္ဇိုၚ် မပ္တံကဵုသ္ၚု၊ ကၠေၚ်၊ ၜဵု၊ ကသိုန်တံ၊ ကၠေၚ်စက်တံဂှ် သၞေဟ်ကၚ်စၟဳတ်ကမျောကေန် ဟွံကဵုအခေါၚ်တတ်ကၠောံရပုဟ်ဂှ် ဟီုရ။

ပ္ဍဲပွိုၚ်ဍုၚ် မၞုံပ္ဍဲရးတၞၚ်သဳတံဂှ် ယဝ်ပေါဲဗ္တိုက်ဒှ်ကၠုၚ်မ္ဂး နူကဵုကၠာတေံရ လ္ပာ်ကံၚ်ဇြဳပၞာန် ထပိုတ်ဒၟံၚ်ဗၞိက်စၞစသုၚ် ကေုာံ ကၠေၚ်စက်တံဂှ်တုဲ အခိၚ်လၟုဟ် ပ္ဍဲကဵုပွိုၚ်ဍုၚ်လံၚ်လုၚ်တံဂှ်လေဝ် အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ ဂကောံဇြဟတ်ပၠန်ဂတးတံဂှ် ပရေၚ်ပၞာန်ၜါလ္ပာ် ကြံၚ်မ္ၚိုဟ်ဒၟံၚ်ဂှ်တုဲ ကၟာတ်လဒဵုလဝ်သာ်ဏံရောၚ် သ္ဂးရ။

ဟိုတ်နူကံၚ်ဇြဳပၞာန် ကၟာတ်လဒဵုကၠုၚ်ဂှ်တုဲ ပ္ဍဲကဵုကွာန်လ္ၚဵုတံဂှ် မၞိဟ်ရာန်ပကောံကၠုၚ် ကၠေၚ်စက်တံကဵု ဗၞိက်စၞစသုၚ်တံ နွံဒၟံၚ်တၟာဂလိုၚ်တုဲ ဒးဂဗဒၟံၚ်ကဵု အကာဲအရာ ကပေါတ်ဗၞိက်ဗွဲမဂၠိုၚ် ပိုတ်အိုတ်ကၠုၚ်မာန်ဂှ်ရ။

ဂကောံအုပ်ဓုပ်ညးဍုၚ်ကွာန် ပွိုၚ်ဍုၚ်လံၚ်လုၚ်ဂှ်လေဝ် ထံက်ပၚ်ကဵုလဝ် ညးဍုၚ်ကွာန်အပ္ဍဲပွိုၚ်ဍုၚ် မဒးထောံလသာသ္ၚိဌာန်ဒးဂြိပ်ဒဴပါဲဒလေတ်ဒၟံၚ်နူကဵုကွာန်တံ သ္ၚုရိုက်ဍောတ် ၁၀၀ ရိုက်ရောၚ် လလောၚ်ပ္တိတ်လဝ်ရ။

ဒပ်ပံၚ်ကောံစဵုဒၞါညးဍုၚ်ကွာန်တံ စဗ္တိုက်လဝ် ဗ္ဒိုပ်ဒပ်ပံၚ်ကောံ ပျူသဝ်ထဳ ကေုာံ ကံၚ်ဇြဳပၞာန် ပ္ဍဲကွာန်ကျံက်နဳမဝ် ပ္ဍဲဂိတုဒဳဇြေမ်ဗာ ၂၃ ဂှ်တုဲ ဒဵုကဵုအခိၚ်လၟုဟ် ပရေၚ်ပၞာန်ၜါလ္ပာ် ကြံၚ်မ္ၚိုဟ်ဒၟံၚ်ရ။

အပ္ဍဲပေါဲဗ္တိုက်ၜါလ္ပာ်ဂှ် ဒပ်ကံၚ်ဇြဳပၞာန် ဘိုၚ်ပန်ကဵုလဝ်နကဵုပၞာန်ကျာ၊ ဘိုၚ်ပန်ကဵုလဝ် နကဵုလွဟ်ဇၞော် နူကဵုက္ၜၚ်ပၞာန်ဒပ်ဍာ်တံဂှ်တုဲ သီုကဵုထောံလဝ်မခတိုဟ်ဒရုၚ်တံဂှ်ရ အပ္ဍဲကွာန်ကျံက်နဳမဝ်ဂှ် သ္ၚိ ၂၀ ပြၚ် ပၟတ်တူလီုလာ်အာလဝ်ရ။

နူသၞာံတုဲကၠုၚ်တေံရ ကံၚ်ဇြဳပၞာန် ကၟာတ်လဒဵုလဝ် အခေါၚ်ဖ္ဍိုက်သ္ၚု ကေုာံ ဇွောံမ လ္ပာ်ပွိုၚ်တိုက်(တောၚ်ပျောက်) ပွိုၚ်ဍုၚ်တယိတ်ချံၚ်၊ လ္ပာ်ထဝါဲ (အရှေ့တော) ၊ ပွိုၚ်ဍုၚ်ပဠဝ်၊ ပွိုၚ်ဍုၚ်တၞၚ်သဳ ရးတၞၚ်သဳ နူကဵုသၞာံတုဲကၠုၚ်တေံဂှ် ဂွံတီကေတ်ရ။

ပရိုၚ်−သြၚ်လောန်တိုၚ်(မ်)

ဗီု−CJ