ဒဒှ်မကျပၞာန်ဂှ် က္ဍိုပ်သ္ကိုပ်ပၞာန် ပတိုန်ဒုဟ် လ္တူက္ဍိုပ်သ္ကိုပ်ကောန်ဍုၚ်အရၚ်ဂမၠိုၚ်

နေဗျဳဒဝ်၊ ဂျာန္နဝါရဳ ၂

အခိၚ်ဗ္ဒိုပ်ဒပ် ကေုာံ တိဍာ်အုပ်ဓလီုလဝ်တံ ယအ်စှ်ေကၠုၚ်ဂှ် က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် ပ္တိုန်ဒုဟ် ကုဂကောံရပ်လွဟ်ကောန်ဍုၚ်အရၚ် မဗ္တိုက်ပၠန်ဂတးဒၟံၚ် သၞောတ်တၠအဝဵုပၞာန်တံဂှ်တုဲ ဒးပယျေဝ်ဒၟံၚ်မုက်မတ်ရ။

က္ဍိုပ်သ္ကိုပ်ကောန်ဍုၚ်အရၚ်လ္ၚဵုတံဂှ် ၜိုန်ရဟီုဒၟံၚ် အခေါၚ်အရာဖေဝ်ဒရာ အခေါၚ်အရာကောန်ဍုၚ်အရၚ်ကီုလေဝ် ဟွံသ္ပကာ ကုသဘာဝဒဳမဝ်ကရေဇြဳဂှ်တုဲ ပ္တဝ်မံၚ်က္ဍိုပ် ညံၚ်ကၟိန်ဍုၚ်ပံၚ်ကောံ ဂွံပြးထ္ကးဏောၚ်ဂှ် က္ဍိုပ်သ္ကိုပ်ပၞာန် စောဲစပ်ကၠုၚ်ရ။

နကဵုက္ဍိုပ်သ္ကိုပ်ဂကောံရပ်လွဟ်ဂမၠိုၚ် ထ္ၜးဟိုတ်နာနာသာ်တုဲ နွံပၟိက်ကဵု သၞောတ်ဒဳမဝ်ကရေဇြဳရောၚ် ဟီုဒၟံၚ်ကီုလေဝ် နတဲဏံ နကဵုဆန္ဒမိက်ဂွံဂွံကၠးကၠးဂှ် ခၞံဗဒှ်ဒၟံၚ် ပဋိပက္ခရပ်လွဟ်တံဂှ်ရောၚ် သ္ဂးရ။

အရာမိက်ဂွံဒှ်ကဵု အရာမဒှ်ထေက်တံဂှ် ဗ္စာရဏာချပ်ရံၚ်တုဲ ထံက်ရံၚ်ကဵုဒတုဲဖဵုကၟိန်ဍုၚ်တုဲ ထေက်ကဵုဒးရေၚ်တၠုၚ်အာ အရာမဒှ်မာန်တံ ဗွဲမစှ်ေကဵုသၞောတ်ဒဳမဝ်ကရေဇဳဲဂှ် က္ဍိုပ်သ္ကိုပ်ပၞာန် ဟီုစုတ်ဏာလဝ် ပ္ဍဲဂလာန်သၞာံတၟိ ၂၀၂၅ ဏံရ။

နာဲနဂါ ညးမၞုံအခေါၚ်ဟီုဂး ဒပ်ပၠန်ဂတးဍုၚ်မန် MSRF ဂှ် စောဲစပ်ဟီုဂးဒၟံၚ် က္ဍိုပ်သ္ကိုပ်ပၠန်ဂတးဂမၠိုၚ် နကဵုမအရေဝ်ဝေါဟာဖေဝ်ဒရာဒဳမဝ်ကရေဇြဳဂှ်ဝွံ နူကၠာဟွံဂွံသီအဝဵုတေံရဏောၚ်ဂှ် ဟီုရ။

“က္ဍိုပ်သ္ကိုပ်ပၞာန်ပကီုပရာပ် မေန်အံၚ်လှာၚ်ဏံဂှ်တှ်ေ စောဲစပ်ဟီုဂးကၠုၚ်ဒၟံၚ် ကုက္ဍိုပ်သ္ကိုပ် ကေုာံ ဂကောံပၠန်ဂတးရပ်လွဟ်တံ သာ်ဏံဂှ် နူကၠာဟွံဂွံသီအဝဵုတေံရဏောၚ်။ ဂွံလ္ၚတ်ဝေၚ်ပၠန်ဂတး ဂကောံရပ်လွဟ်ကောန်ဍုၚ်အရၚ်တံဂှ် လ္ပဟီုဏီ၊ စိုတ်လေဝ်ဟွံလုပ်စမွဲသာ် ရပ်ကၠုၚ်မအရေဝ် ဖေဝ်ဒရာဒဳမဝ်ကရေဇြဳသာ်ဏံတုဲ စောဲစပ်ကၠုၚ်က္ဍိုပ်သ္ကိုပ်တံဂှ်တှ်ေ ဇၟာပ်ပ်ဆဵုဂှ် မိက်ဂွံဗက်ကဳဒၟံၚ် ၜိုတ်ကဆံၚ်ဏံရနွံဂှ် အဲမိက်ဂွံဟီုရ” သာ်ဝွံ သ္ဂးရ။

အလုံဍုၚ်ဗၟာမွဲ ဂကောံရပ်လွဟ်ကောန်ဍုၚ်အရၚ်တံ သ္ကိုပ်သ္ကတုဲ ဂကောံဇြဟတ်မဟာမိတ်ပၠန်ဂတးတံ သီကၠုၚ်ဒၟံၚ်ဗ္ဒိုပ်ဒပ်တံဂှ်တုဲ နကဵုဆန္ဒမိက်ဂွံထ္ပက်ကၠာ်ဂှ် ဟီုပ္တိတ်ကၠုၚ်လဝ်သာ်ဏံရောၚ် နာဲနဂါ ထံက်ထ္ၜးလဝ်ရ။

နကဵုက္ဍိုပ်သ္ကိုပ်ပၞာန် ကြဴနူသီအဝဵုတုဲဂှ် ပဋိပက္ခရပ်လွဟ်မက္တဵုဒှ်ဒၟံၚ်အလုံဍုၚ်မွဲ၊ ပွမဆုတ်ယုတ်စှ်ေကၠုၚ်၊ ဍုၚ်ကွာန်မဒးဂိဇီုကပိုက်ဒၟံၚ်တံဂှ်ဝွံ ဒှ်ဟိုတ်နူဂကောံရပ်လွဟ်ကောန်ဍုၚ်အရၚ်တံကဵု ဂကောံဇြဟတ်ပၠန်ဂတးတံရောၚ်ဂှ် လေပ်ပ္တိုန်ကၠုၚ်ဒၟံၚ်ဒုဟ်ရ။

အကာဲအရာမက္တဵုဒှ်လဝ် အပ္ဍဲသၞာံ ၂၀၂၄ ဂှ်လေဝ် နကဵုညးဟွံမွဲပၟိက်ကဵု ဒတုဲဖဵုကောန်ဍုၚ်ကွာန်တံ စွံပွန်ကဵုဂီုကၠီုဍုၚ်ကွာန် ကေုာံ သွာၚ်ပရေၚ်ပိုန်ဒြပ်နာနာသာ် အဓိကတုဲ ဗက်ပလီုပလာ်ဒၟံၚ်ရောၚ် စောဲစပ်လဝ်ရ။

ဒှ်ပြဝရဲဟွံမွဲကဵုညာန်ပညာ မသ္ကဵုဇီုကပိုက်ကဵု ဌာန်ဒေသဇကုမံၚ်၊ ဂကူဇကုတံဂှ်ဂးတုဲ ပြဝဒပ်ပၞာန်ဍေံတံ မကလိလောန်လဝ် အမှုရာဇဝတ်ပၞာန် လ္တူကောန်ဍုၚ်အရၚ်တံဂှ်တှ်ေ သ္ကိုပ်ပၞာန်ဇၞော် မေန်အံၚ်လှာၚ်ဂှ် မွဲလှ်ေမှ ဟွံဟီုပ္တိတ်ကၠုၚ်လဝ်ရ။

ပဒိုဝ်သဝ်တဝ်နဳ ညးမၞုံအခေါၚ်ဟီုဂး ဗော်သွးကောန်ဂကူကရေၚ် KNU ဂှ် က္ဍိုပ်သ္ကိုပ်ပၞာန်လၟုဟ်ဂှ်ဝွံ အကာဲအရာဟွံခိုဟ်ရပုဟ်ဟီုဂှ် ဒှ်ဒၟံၚ်နမတ်ရတုဲ ပ္တိုန်ဒၟံၚ်ဒုဟ် ကုညးတၞဟ်ဂှ်ရောၚ် ခၠေဝ်ပလန်လဝ်ရ။

“အဲမိက်ဂွံဟီုမွဲဂှ်တှ်ေ အကာဲအရာက္ဍိုပ်သ္ကိုပ်ပၞာန်လၟုဟ်ဂှ်တှ်ေ ဟွံခိုဟ်ရပုဟ်ဂှ် ဂွံဆဵုကေတ်နမတ်ရဏောၚ်။ ဟိုတ်ဂှ်ရ ဂွံပၞုက်အကာဲအရာဇကုတုဲ ပ္တိုန်ဒၟံၚ်ဒုဟ် မၞိဟ်တေံမၞိဟ်ဏံ ဂၠိုၚ်တိုန်ဒၟံၚ်အရိုဟ်တ္ၚဲဂှ် ဂွံဆဵုကေတ်ရ။ ဆ္ဂး မိက်ဂွံဟီုဂှ်တှ်ေ အရာတံဏံဂှ် ပိုယ်တံ စိုတ်ဟွံလုပ်စပုဟ်။ မညးတံဟီုလဝ်ဂှ်လေဝ် မုမွဲမှဟွံကၠောန်ကၠုၚ် ဓဝ်ပတှ်ေလေဝ်ဟွံမွဲဂှ်တုဲ အရာမ္ဒးကၠောန်ဂှ်ရ ပိုယ်တံ ဆက်ကၠောန်အာဏောၚ်” သာ်ဝွံ သ္ဂးရ။

သၞာံ ၂၀၂၅ ဝွံ သၞောတ်တၠအဝဵုပၞာန်ဂွံသရိုဟ်စှ်ဂှ်ေ ဒှ်အခိၚ်အခါမဒးရးမွဲတုဲ နကဵုကောန်ဒပ်ကံၚ်ဇြဳပၞာန် မၞုံပၟိက်ကဵုပရေၚ်ပြုပြေၚ်ပြံၚ်လှာဲတံ ဂတမုက်လ္ပာ်ညးဍုၚ်ကွာန်တံတုဲ သွက်ဂွံပံၚ်တောဲ ကုဂကောံဇြဟတ်ပၠန်ဂတးတံဂှ် ပဒိုဝ်သဝ်တဝ်နဳ ဖ္တိုက်ဖ္အောဝ်လဝ်ရ။

က္ဍိုပ်သ္ကိုပ်ပၞာန်ဂှ်တှ်ေ သွက်ဒတုဲဖဵုညးဍုၚ်ကွာန် ကေုာံ သွက်ဒတုဲဖဵုကၟိန်ဍုၚ်ဂှ် ပဋိပက္ခရပ်လွဟ်တံအိုတ်အးတုဲ တၚ်ရန်တၟံမိက်ဂွံထ္မံက်ရုပ်ရဴ ပွဳပွူမၜိုဟ်သြိုဟ်ညိၚ်ဝတ်မွဲ နွံဂှ် ထ္ၜးလဝ်ဟိုတ်ရ။

သ္အာၚ်နူဂှ်ပၠန် ဟိုတ်နူပရေၚ်ပၞာန်သီအဝဵုတုဲ ညးဍုၚ်ကွာန်ဍုၚ်ဗၟာ မ္ဒးဆေၚ်ဒၟံၚ်မုက်ဒဒိုက်နာနာတံဂှ်လေဝ် ညံၚ်ဂကောံရပ်လွဟ်တံ ဂွံစိုပ်လ္တူဂၠံၚ်တရဴဒဳမဝ်ကရေဇြဳဂှ် ဒးကဵုဇြဟတ်ဂရိုဟ်ဏောၚ်ဂှ်လေဝ် ဖ္တိုက်ဖ္အောဝ်လဝ်ဏီရ။

ပေါဲရုဲမာဲ မဒှ်တၚ်ရန်တၟံကံၚ်ဇြဳပၞာန်လက္ကရဴအိုတ်ဂှ် သွက်ဂွံကၠောန်ဗဒှ် ဗွဲမအံၚ်ဇၞးမာန်ဂှ် ဖန်ဇန်ဒၟံၚ်တုဲ ညံၚ်ကၟိန်ဍုၚ်ဏံ ဂွံကလေၚ်စိုပ်လ္တူဂၠံၚ်တရဴဒဳမဝ်ကရေဇြဳဂှ် ရေၚ်တၠုၚ်ကဵုဏောၚ် က္ဍိုပ်သ္ကိုပ်ပၞာန် ဟီုကြီုလဝ်ရ။

အတိုၚ်ဂလာန် BNI-Myanmar Peace Monitor ဂှ်မ္ဂး အပ္ဍဲပရေၚ်ပၞာန်သီအဝဵုဏံ ဂကောံရပ်လွဟ်ကောန်ဍုၚ်အရၚ်တံကဵု ဂကောံဇြဟတ်ပၠန်ဂတးတံ ထိၚ်ဂွံလဝ် ၈၉ ဍုၚ်ရ။

အပ္ဍဲသၞာံဏံ မွဲသၞာံဓဝ်ဂှ် ပ္ဍဲကဵုကချေၚ်၊ ချေၚ်၊ ရးသေံသၟဝ်ကျာ၊ ရခေၚ်၊ သက်ကိုၚ် ကေုာံ ပ္ဍဲမာန္တလေဝ်တံဂှ် ပ္ဍဲကဵုတိဍာ်ကံၚ်ဇြဳပၞာန်အုပ်ဓလီုလဝ်ဂမၠိုၚ်ဂှ် ဒးဗလးလဝ်တဲဆောံလေၚ်လဝ် ဒဵုကဵု ၆၀ ဍုၚ်တုဲ ပ္ဍဲကဵုဏံ ဌာန်ဂအုပ်ပၞာန်ရးၜါဂှ်လေဝ် ဒးအုပ်ကၠေံလဝ်နိဂီုရ။

ပရိုၚ်−သြၚ်လောန်တိုၚ်(မ်)

ဗီု−Social Media